އަމާޒަކީ އިސްލާމީ ޤައުމުތަކުގެ ތެރެއިން އާބާދީގެ ނިސްބަތުން ޙާފިޡުން އެންމެ ގިނަ ޤައުމަށް ރާއްޖެ ހެދުން: ޑރ. ޝަހީމް

އިސްލާމީ އުއްމަތުގެ ޤައުމުތަކުގެ ތެރެއިން، އާބާދީގެ ނިސްބަތުން އެންމެ ގިނަ ޙާފިޡުން ތިބި ޤައުމަކަށް ދިވެހިރާއްޖެ ހެދުމަކީ ސަރުކާރުގެ ދުރުރާސްތާ އަމާޒެއް ކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

ރޭ ބޭއްވުނު ޙާފިޡުންގެ ދަސްވެނިވުމުގެ ރަސްމިއްޔާތުގައި ވާހަކަދައްކަވަމުން ވަޒީރު ވިދާޅުވީ، މިއީ ރާއްޖޭގެ ތާރީޚުގައިވެސް އެންމެ ގިނަ އަދަދަކަށް ޙާފިޡުން ދަސްވެނިވާ އަހަރު ކަމަށެވެ. އެގޮތުން މިއަހަރުގެ ތެރޭގައި ޖުމްލަ 31 ޙާފިޡުން ދަސްވެނިވާކަން ވަޒީރު ފާހަގަކުރެއްވިއެވެ.

ޒރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކީރިތި ޤުރުއާނުގެ ޢިލްމު ފެތުރުއްވުމަށް ދެއްވާ އަހަންމިއްޔަތުކަން ފާހަގަކުރައްވައި ވަޒީރު އިތުރަށް ވިދާޅުވީ، ފާއިތުވި ދެ އަހަރުގެ ތެރޭގައި ޤައުމީ ޤުރުއާން މުބާރާތުގެ އިނާމުތައް މަތިކުރައްވައި، ޙާފިޡުންނަށް ދޭ އެލަވަންސް ދެގުނައަށް ބޮޑުކުރައްވާފައިވާކަމަށެވެ.

"މިރޭ މި ބޭއްވޭ ޙަފްލާއަކީ، ދިވެހިރާއްޖޭގައި ބޭއްވޭ އުފާވެރި ޙަފްލާތަކުގެ ތެރެއިން ވަރަށްވެސް އުފާވެރި، މަތިވެރިކަން ލިބިގެންވާ ޝަރަފްވެރި ޙަފްލާއެއް،" ވަޒީރު ވިދާޅުވިއެވެ.

ތަފާސްހިސާބުތަކަށް އަލިއަޅުއްވާލައްވަމުން ޑރ. ޝަހީމް ވިދާޅުވީ، ރާއްޖޭގައި މިހާރު ތިއްބެވި ޙާފިޡުންގެ އަދަދު 301 އަށް އަރާފައިވާ ކަމަށެވެ. އަދި ސަރުކާރުގެ އަމާޒަކީ ކުރިއަށް އޮތް 5 އަހަރުގެ ތެރޭގައި މި އަދަދު 500 އަށް އިތުރުކުރުން ކަމަށް ވިދާޅުވިއެވެ. މި މަސައްކަތުގެ ދަށުން 2025 ވަނަ އަހަރު ކީރިތި ޤުރުއާނުގެ ޢިލްމު ފެތުރުމަށް 19 މިލިއަނަށްވުރެ ގިނަ ރުފިޔާ ޚަރަދުކޮށްފައިވާކަންވެސް ވަޒީރު ހާމަކުރެއްވިއެވެ.

ކީރިތި ޤުރުއާނުގެ ޢިލްމު ރާއްޖޭގެ ކޮންމެ ރަށަކަށް ފޯރުކޮށްދިނުމަށްޓަކައި، މީހުން ދިރިއުޅޭ ކޮންމެ ރަށެއްގައި ކީރިތި ޤުރުއާނާ ބެހޭ ޤައުމީ މަރުކަޒުގެ ގޮތްޕެއް ހެދުމަށް ސަރުކާރުން ނިންމާފައިވާކަން ވަޒީރު ފާހަގަކުރެއްވިއެވެ. އެގޮތުން 2026 ވަނަ އަހަރުގެ ނިޔަލަށް 50 ގޮފި އުފެއްދުމަށް މަސައްކަތް ކުރަމުންދާއިރު، މިހާތަނަށް 6 ގޮފި ރަޖިސްޓްރީ ކުރެވި، އިތުރު 34 ގޮފި ރަޖިސްޓްރީ ކުރުމުގެ މަސައްކަތް ކުރެވެމުންދާ ކަމަށް ވިދާޅުވުއެވެ.

ވަޒީރު އިތުރަށް ވިދާޅުވީ، ރާއްޖޭގައި މިހާރުވެސް 1873 ދަރިވަރުން ޤުރުއާން ހިތުދަސްކުރަމުންދާ ކަމަށާއި، އޭގެ ތެރެއިން އެންމެ ގިނަ ދަރިވަރުން ތަމްރީނުވަމުންދަނީ ކީރިތި ޤުރުއާނާ ބެހޭ ޤައުމީ މަރުކަޒުން ކަމަށެވެ.

"ކުރިއަށް އޮތް ޖީލުތަކަށް އިސްލާމީ ރިސާލަތު ވާޞިލްކޮށްދިނުމަށްޓަކައި އަދުގެ ޒުވާން ޖީލު ޙާފިޡުންގެ ގޮތުގައި އަދި އިމާމުންގެ ގޮތުގައި ތެދުވަން ޖެހޭ. އުއްމަތާއި ޤައުމު ބިނާކުރުމުގައާއި، ރާއްޖެއަކީ ތާއަބަދު އިސްލާމީ ޤައުމެއްގެ ގޮތުގައި ދެމެހެއްޓުމަށްޓަކައި ޙާފިޡުން ބިނާކުރުމަކީ ކޮންމެހެން ބޭނުންތެރި ކަމެއް،" ޑރ. ޝަހީމް ވިދާޅުވިއެވެ.