ކާރަކާއި ސައިކަލެއް ޖެހި ނުރައްކާތެރި އެކްސިޑެންޓެއް؛ ސައިކަލް ދުއްވި މީހާގެ ހާލު ސީރިއަސް

ހުޅުމާލޭ ފޭސް 2 ގައި ކާރަކާއި ސައިކަލެއް ޖެހި ނުރައްކާތެރި އެކްސިޑެންޓެއް ހިނގައިފިއެވެ.

ފުލުހުން ބުނީ، ހުޅުމާލޭ ފޭސް 2 ގެ އެޗް 5 ކައިރިން ކާރަކާއި ސައިކަލެއް ޖެހި، ނުރައްކާތެރި އެކްސިޑެންޓެއް ހިނގި ކަމަށް މިއަދު ހެނދުނު 8:13 ގައި ފުލުހުންނަށް ރިޕޯޓް ކުރެވިފައިވާ ކަމަށެވެ.

މި އެކްސިޑެންޓްގައި ކާރާއި ސައިކަލް ޖެހުމަށްފަހު، އެ ސައިކަލު ކޮންޓްރޯލް ނުވެ އެހެން ކާރަކާ ވެސް ޖެހުނު ކަމަށް ފުލުހުން ބުންޏެވެ.

އަދި އެކްސިޑެންޓްގައި ސައިކަލް ދުއްވި 19 އަހަރުގެ ދިވެހި ފިރިހެނަކަށް އަނިޔާވެ، މިވަގުތު ހުޅުމާލެ ހޮސްޕިޓަލުގައި ފަރުވާ ދެމުން ގެންދާ ކަމަށާ، ހޮސްޕިޓަލުން ފުލުހުންނަށް މަޢުލޫމާތު ދީފައިވާ ގޮތުގައި އޭނާގެ ހާލަތު ސީރިއަސްކަމަށް ފުލުހުން ބުންޏެވެ.

މީގެ އިތުރުން ފުލުހުންގެ ތަޙްޤީޤަށް އެނގިފައިވާ ގޮތުގައި، އެކްސިޑެންޓްގައި އަނިޔާވި ފަރާތަކީ ސައިކަލް ދުއްވުމުގެ ލައިސަންސް ނެތް މީހެއް ކަމަށްވެސް ބުނެފައިވެއެވެ.

މި މައްސަލައިގެ ތަޙްޤީޤު ފުލުހުން ދަނީ ކުރިއަށް ގެންދަމުންނެވެ.