އިހަވަންދިއްޕޮޅުގައި ބައިނަލްއަޤްވާމީ ބަންކަރިންގ ޚިދުމަތް އަންނަ ހަފުތާގައި ފަށަނީ

ރާއްޖޭގެ އެންމެ އުތުރުގައިވާ އިހަވަންދިއްޕޮޅުގައި ބައިނަލްއަޤްވާމީ ބަންކަރިންގ ޚިދުމަތް އަންނަ ހަފުތާ ފެށުމަށް ހަމަޖެހިފައިވާ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މަޢުލޫމާތު ދީފިއެވެ. މި ޚިދުމަތް ފޯރުކޮށްދޭނީ އެމްޕީއެލް އާއި ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ގުޅިގެންނެވެ.

އެމްޕީއެލްގެ ސީއީއޯ މުޙައްމަދު ވަޖީހު ވިދާޅުވި ގޮތުގައި، މި ޚިދުމަތް ފެށުމުގެ އެންމެ ފަހުގެ ތައްޔާރީތައް ދަނީ ފުރިހަމަ ކުރަމުންނެވެ. އަންނަ ހަފުތާގެ ބުދަ ދުވަހު އުލިގަމުގައި "އުލިގަމު އިންޓަނޭޝަނަލް ޝިޕް އެންޑް ޕޯޓް ސެކިއުރިޓީ ގޭޓް" ނަމުގައި ޚާއްޞަ އިމާރާތެއް ހުޅުވުމަށްފަހު، ބުރާސްފަތި ދުވަހުން ފެށިގެން ބޭރުގެ ބޯޓުފަހަރަށް ބަންކަރިންގ ޚިދުމަތް ދޭން ފަށާނެ ކަމަށް އޭނާ ވިދާޅުވިއެވެ.

މި ޚިދުމަތް ފެށުމާ ގުޅިގެން، އުތުރު މެރިޓައިމް ސާވިސަސް (ޔޫއެމްއެސް) ނަމުގައި ޚާއްޞަ ވެބްސައިޓެއް ވަނީ އިއްޔެ ލޯންޗްކޮށްފައެވެ. މި ވެބްސައިޓް މެދުވެރިކޮށް ޚިދުމަތް ހޯދަން ބޭނުންވާ އުޅަނދުފަހަރަށް ކުރިއާލައި ބުކިންގ ހެދުމުގެ ފުރުޞަތު ލިބިގެންދާނެއެވެ.

ބަންކަރިންގ ޚިދުމަތުގެ އިތުރުން، ފެނާއި ކާބޯތަކެތި ފޯރުކޮށްދިނުން، ކުރޫ ބަދަލުކުރުން، ޑޮކިންގ ޚިދުމަތް، ކުނި އުކާލުން، ޓަގް ސަރވިސް އަދި މެއިންޓަނަންސްގެ ޚިދުމަތްތައް ވެސް މި ސަރަހައްދުން ލިބެން ހުންނާނެއެވެ.

އިހަވަންދިއްޕޮޅު ނުވަތަ މޯލްޑިވްސް އިކޮނޮމިކް ގޭޓްވޭގައި ބައިނަލްއަޤްވާމީ ބަންކަރިންގ ފެސިލިޓީއެއް ޤާއިމުކުރުމަށް އެސްޓީއޯ އިން ނެދަލޭންޑްސްގެ "ވިޓޯލް" ކުންފުންޏާއެކު މިދިޔަ މާރިޗު މަހު އެއްބަސްވުމެއްގައި ސޮއިކޮށްފައިވެއެވެ.

ސަރުކާރުން ދީފައިވާ މަޢުލޫމާތުގައިވާ ގޮތުން، ރާއްޖެ އޮންނަ ސަރަހައްދުގެ ގޮތުން އިހަވަންދިއްޕޮޅު ކައިރިން ދުވާލަކު 300 އަށްވުރެ ގިނަ އާގުބޯޓު ދަތުރުކުރެއެވެ. މި ޚިދުމަތް ފެށުމުން، ރާއްޖޭގެ އިޤްތިޞާދަށް ފައިދާކުރާނެ ކަމަށް ބެލެވެއެވެ.