ބާޒާރުގައި ކަރާގެ އަގަށް ދެން ވާނީ ކިހިނެތް؟

މިއަހަރުގެ ރޯދަމަސް ފެށިގެންއާއިރު ބާޒާރުގައި ކަރާ ކިލޯއެއް ވިއްކަމުންއައީ 30 ރުފިޔާ އާއި 35 ރުފިޔާ އާ ދެމެދުގެ އަގުތަކެއްގައެވެ. ދަތުރުވެރިންގެ މާރުކެޓުގައި ކަރާ ވިއްކަމުން އަންނަ އަގުތަކަށް ބަލާއިރު، މިއީ މާރުކޭޓަށް ކަރާ ގަންނަންދާ މީހުންނަށް ބޮޑު އަގަކަށް ވިނަމަވެސް ކަރާ ވިއްކާ މީހުންނަށް މިއީ ފަރުޖައްސާލެވޭ އަދި ހިތްހަމެޖެހޭ އަގެކެވެ. މިފަހަރުގެ ރޯދަމަސް ފެށިގެން ފުރަތަމަ 15 ދުވަސް ވީއިރުވެސް ދަތުރުވެރިންގެ މާރުކެޓުގައި މުޅިންވެސް ވިއްކަމުންދިޔައީ ދިވެހި ކަރައެވެ.

ދަތުރުވެރިންގެ މާރުކެޓުގެ ގޮޅިތަކުން ވާހަކަދެއްކި ބައެއް މީހުން ބުނީ މިދިޔަ ދުވަސްތަކުގައި ބާޒާރުގައި މުޅިންވެސް ވިއްކަމުްނދިޔައީ ތޮއްޑޫއިން ގެންނަ ކަރަ އާއި ހައްދުންމަތިން ގެންނަ ކަރާ ކަމަށެވެ. އިއްޔެއާ ހަމަޔަށްވެސް ބާޒާރުގައި ބޭރު ކަރައެއް ނެތެވެ. ކަރާގެ އަގު ނުވެއްޓި އެއްވަރެއްގައި ހިފަހައްޓާލެވުނީ މިހެންވެއެވެ. އާއްމުގޮތެއްގައި ދަތުރުވެރިންގެ މާރުކޭޓުގައި ދިވެހި ކަރާގެ އަގު ވެއްޓުމަށް މަޖުބޫރުވަނީ އިންޑިއާއިން ކަރާ ގެނެސް ވިއްކާތީއެވެ.

ބާޒާރަށް އެންމެފަހުން އިންޑިއާ ކަރާ

ރޯދަމަސް ފެށިގެން އިއްޔެއާ ހަމަޔަށް ބާޒާރުމަތިން އިންޑިއާ ކަރާ ފެންނަން ނެތްނަމެވެސް މިއަދު ބައެއް ގޮޅިތަކުން ވަނީ އިންޑިއާއިން ގެނައި ކަރާ ވިއްކަން ފަށާފައެވެ. އިންޑިއާއިން ކަރާ ގެނެސް ވިއްކަން ފެށުމާއެކު މިއަދު ބާޒާރުގައި ދިވެހި ކަރާގެ އަގު ހުރީ 20 ރުފިޔާ އާއި 22 ރުފިޔާ އާ ދެމެދުގެ އަގުތަކެއްގައެވެ. އާއްމުކޮށް ގޮޅިން ވިޔަފާރިކުރާ މީހުނަށް 19 ރުފިޔާއަށްވެސް ލިބެއެވެ.

ބާޒާރުގެ އެކި ސަރަހައްދުތަކުން މިއަދު އިންޑިއާ ކަރާ ވިއްކަން ހުރިއިރު، އިންޑިއާ ކަރާ ކިލޯއެއްގެ އަގު މިއަދު ހުރީ ޖުމްލަގޮތެއްގައި 15 ރުފިޔާ އާއި 18 ރުފިޔާ އާ ދެމެދުގެ އަގުތަކެއްގައެވެ.

ގޮޅިތަކުން ވާހަކަދެއްކި ބައެއް މީހުން ބުނީ، ކުރިއަށް އޮތްތަނުގައި ކަރާގެ އަގު ދާނީ ދަށްވަމުންކަމަށާއި، މިހާރު ދަތުރުވެރިންގެ މާރުކޭޓަށް ގިނަ އަދަދަކަށް ދިވެހި ކަރާގެ އިތުރުން އިންޑިއާ ކަރާ ގެންނަން ފަށާފައިވާކަމަށެވެ. އެހެންކަމުން ކުރިއަށް އޮތްތަނުގައި އިންޑިއާ ކަރާ ކިލޯއެއް 12 ރުފިޔާ އަދި ދިވެހި ކަރާގެ އަގު 18 ރުފިޔާއަށް ވެއްޓޭނޭކަމަށް ލަފާކުރެވޭކަމަށް ގޮޅިތަކުން ވާހަކަދެއްކި ބައެއް މީހުން ބުންޏެވެ.

އެހެން އަހަރުތަކާ ހިލާފަށް މިފަހަރު ދަތުރުވެރިންގެ މާރުކޭޓުގައި ވިއްކަންހުރި ދިވެހި ކަރާގެ ބާވަތްތައްވެސް ގިނައެވެ.

ދަތުރުވެރިންގެ މާރުކޭޓަށް ބޭރު ކަރާ ގެންނަން ފަށާފައިވާއިރު، ރޯދަމަހަށް އިންޑިއާ ކަރާ ޝިޕްމަންޓެއް ގެނައި ނަމަވެސް ބާޒާރަށް ނުނެރެވި އުޅެނިކޮށް ކަރާތައް ވަނީ ހަލާކުވެގެން ނައްތާލާފައެވެ.

ރޯދަމަސް ފެށުނުއިރު ބާޒާރުގައި ކަރާ ކިލޯއެއްގެ އަގު 35 ރުފިޔާއަށް އަރައިގެންދިޔައީ ބޭރުން ގެންނަ ކަރާ ނުލިބުމުންނެވެ.

ނަމަވެސް ކުރިއަށްއޮތް ދުވަސްތަކުގައި އިންޑިއާ ކަރާ ބާޒާރަށް ނެރެން ފެށުމާއެކު ކަރާގެ އަގުތައް ވަރަށްބޮޑަށް ދަށަށްދާނޭކަމަށް ވިޔަފާރިވެރިން ބުނެއެވެ.