"ޖަންނަތު" ގެ ޓިކެޓް މިހާރު އޮންލައިނުކޮށް ބުކްކޮށްލެވޭނެ

ޑާކްރެއިނުން އޮލިމްޕަހަށް ގެނައުމަށް ތައްޔާރުވަމުންދާ ފިލްމް "ޖަންނަތު" ގެ ޓިކެޓް އޮންލައިނުކޮށް ބުކްކުރެވޭނެ އިންތިޒާމް ހަމަޖައްސައިފިއެވެ.

ރާއްޖޭގެ އެންމެ ވަރުގަދަ ޕްރޮޑަކްޝަން ހައުސްކަމަސްވާ ޑާކްރެއިނުން ވަނީ އަންނަ އޮގަސްޓްމަހުގެ 3 ވަނަ ދުވަހު "ޖަންނަތު" ރިލީޒް ކުރުމަށް ނިންމާފައެވެ. އަދި މިއަދުން ފެށިގެން އޮންލައިނުކޮށް ޓިކެޓް ބުކް ކުރެވޭނޭކަމަށް ޑާކްރެއިނުން ވަނީ ބުނެފައެވެ.

ޖަންނަތުގެ ޓިކެޓް ގަތުމަށް ބޭނުންވާ ފަރާތްތަކުން ފިލްމް ބެލުމަށް ބޭނުންވާ ތާރީހައި، ބޭނުންވާ ޝިޓް އަދަދާއި ގުޅޭނޭ ނަމްބަރު ޖެހުމަށްފަހު، 9911229 އަށް ވައިބާކޮށްލުމުން ޓިކެޓް ބުކްކުރުމުގެ އިންތިޒާމުތައް ހަމަޖެހިގެންދާނެއެވެ. އޮލިމްޕަހަށް ނުގޮސް އޮންލައިނުކޮށް ޖަންނަތުގެ ޓިކެޓް ބުކިންނަށް ހުޅުވާލިއިރު، ޑާކްރެއިނުން ވަނީ މި ފިލްމުގެ ޓީޒާ އާއްމުކޮށް ދައްކާލާފައެވެ.

ޓީޒާގައި ފެނިގެންދަނީ ނުކުޅެދުންތެރިކަން ހުންނަ މީހަކު ގޮވައިގެން ކުޑަ އަންހެންކުއްޖަކު މަގުމަތިން ދާތަނެވެ. މަންޒަރަށް ބަލާލުމުން ބޮޑަށް ސިފަވެގެންދަނީ އެއީ އެކުއްޖާގެ ބައްޕަގެ ގޮތުގައެވެ.

ޖަންނަތު މި ފިލްމަކީ އަހުމަދު ތޮލާލް އަދި އާއިޝަތު ފުއާދުގެ ލިޔެފައިވާ ސްކްރިޕްޓެއްގެ މައްޗަށް ބިނާކޮށް އަލީ ޝިފާޢު ދައިރެކްޓްކުރާ ފިލްމެކެވެ. ޓީޒާއަށް ބަލާލުމުން މިއީ ދިވެހި ސިނަމަާއިން ފެނިގެންދާނޭ ތަފާތު ފިލްމަކަށް ވެގެންދާނޭކަމަށް މިހާރު ވަނީ ޔަގީންވެފަްއެވެ.

ޑާކްރެއިނުން ވަނީ މިދިޔަ އަހަރުވެސް މުޅިން ތަފާތު ފިލްމުތަކެއް އާންމުންނާ ހަމަޔަށް ގެނެސްދީފައެވެ. އެގޮތުން މިފަހުން ގެނެސްދިން ފިލްމްތަކުގެ ތެރޭގައި، އަލްވަދާޢު އަދި އަލިފާން ފާހަގަކޮށްލެވެއެވެ.