މޫސުމީ ބަދަލަކީ ހަގީގަތެއް؛ ތަރައްގީގެ މަޝްރޫޢު ހިންގަނީ އެކަމަށް ޚާއްސަ ފިޔަވަޅު އަޅައިގެން: ރައީސް މުޢިއްޒު
ލިޔުންތެރިޔާ
ޚަދީޖާ އަރުފާ
މޫސުމީ ބަދަލަކީ ހަގީގަތެއް ކަމަށާއި، ދިވެހިރާއްޖޭގައި ތަރައްގީގެ މަޝްރޫއުތައް ހިންގަނީ އެ ކަމަށް ވިސްނައި، ޚާއްސަ ފިޔަވަޅުތައް އަޅުއްވައިގެން ކަމަށް ރައީސުލްޖުމުހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ޗައިނާއަށް ކުރެއްވި ރަސްމީ ދަތުރުފުޅުގެ ތެރެއިން، އެ ގައުމުގެ ސީޖީޓީއެން ޗެނަލަށް ދެއްވި ޚާއްސަ ބަސްދީގަތުމެއްގައި، މޫސުމީ ބަދަލު ތަކާއިމެދު ރައީސް މުޢިއްޒު ދެކެވަޑައިގަންނަވާ ގޮތާއި ގުޅޭގޮތުން ކުރެވުނު ސުވާލަށް ޖަވާބު ދެއްވަމުން އެމަނިކުފާނު ވިދާޅުވީ، ވިދާޅުވީ މޫސުމީ ބަދަލުތަކަކީ ހަގީގީ ކަމެއް ކަމަށެވެ. އަދި އެކަމާ ދިވެހިންވެސް އަދި އެމަނިކުފާނު ވެސް އިންކާރު ނުކުރައްވާ ކަަމަށެވެ.
"މޫސުމީ ބަދަލަކީ ހަގީގަތެއް. އަޅުގަނޑުމެން އެ ކަމަށް އިންކާރު ނުކުރުން. އެކަމު އެންމެ މުހިންމީ، ތަރައްގީގެ މަސައްކަތް ކުރިއަށް ގެންދާއިރު، އެ ކަމަށް (މޫސުމީ ބަދަލަށް) ޚާއްސަ ސަމާލުކަމެއްދީގެން، ރަނގަޅު ފިޔަވަޅުތައް އެޅުން. އެއީ އަޅުގަނޑުމެންގެ ރާއްޖޭގެ އަމާޒަކީ،"
ރައީސުލްޖުމްހޫރިއްޔާ ޑރ މުހައްމަދު މުޢިއްޒު
މޫސުމީ ބަދަލުތަކަށް ޚާއްސަ ސަމާލުކަމެއްދީގެން ރާއްޖެއިން ކުރިއަށް ގެންދާ މަޝްރޫއު ތަކާއި، ތަރައްގީގެ މަޝްރޫޢުގެ ތެރެއިންވެސް އެކަމަށް ދެއްވާ ސަމާލުކަމުގެ މިސާލު ޖައްސަވަމުން ރައީސް މުޢިއްޒު ވަނީ ދާދިފަހުން ދުބާއިގައި ބޭއްވުނު ކޮޕް28 ސަމިޓަށް ވަޑައިގެން އެ މަނިކުފާނު އިއުލާނުކުރެއްވި، ފަސް އަހަރުގެ ތެރޭގައި ފަސް މިލިއަން ގަސް އިންދުމުގެ މަޝްރޫއު ނަންގަވާފައެވެ.
އަދި ހަމައެހެންމެ، މިސަރުކާރުގެ ބޯހިޔާވަހިކަމުގެ އެންމެ ބިޔަ މަޝްރޫޢު، ފުށިދިއްގަރު ފަޅު ހިއްކައިގެން ހިންގާ ރަސްމާލެ މަޝްރޫއަށްވެސް އަލި އަޅުވާ ލައްވައި، އެ ރަށަކީ ސޭފް އައިލެންޑް ނުވަތަ ރައްކާތެރި ރަށުގެ ކޮންސެޕްޓަށް، މޫސުމީ ބަދަލުތަކަށް ވިސްނައިގެން ހިންގާ މަޝްރޫއުއެއް ކަން އެމަނިކުފާނު ފާހަގަކުރެއްވިއެވެ.
އަޅުގަނޑުމެންގެ ބިން ހިއްކުމުގެ އައު މަޝްރޫޢު، (ފުށިދިއްގަރު ފަޅު ހިއްކުމުގެ މަޝްރޫޢު) ގައި 1100 ހެކްޓަރ ހިއްކައިގެން އެތަން މި ތަރައްގީ ކުރަނީ ސޭފް އައިލެންޑްގެ ގޮތުގައި. އެ ސިޓީ ހުންނަނީ މޫދުގެ ލޮނުގަނޑަށް ވުރެ 3 މީޓަރ އުހުގައި. ވަރަށް ހިނަ ގަސްތައް ހުންނާނެ. ވަރަށް ފެހި ވާނެ އެ ސިޓީ.
ރައީސުލްޖުމްހޫރިއްޔާ ޑރ މުހައްމަދު މުޢިއްޒު
މީގެ އިތުރުން އަދި ކުރިއަށްހުރި ދުވަސްތަކުގައި ތެޔޮ އަންދައިގެން ހަކަތަ އުފައްދާ މިންވަރު 33 ޕަސެންޓު މަދުކޮށް، އިއާދަކުރަނިވި ހަކަތައިން އުފެއްދުން ވެސް ހިމެނޭކަމަށް ރައީސް ފާހަގަކުރެއްވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
