މެޑިކަލް އިވެކުއޭޝަން އޮޕަރޭޝަންތައް ހުއްޓާނުލާ ކުރިއަށް ގެންދެވޭތޯ ރާއްޖެއާއެކު މަޝްވަރާ ކުރެވުނު: އިންޑިއާ

އިއްޔެ، ދިވެހިރާއްޖެ އާއި އިންޑިޔާގެ މަތީ ފަންތީގެ "ކޯ ގްރޫޕް" އާއިއެކު ބޭއްވުނު މަޝްވަރާ ބައްދަލުވުމުގައި، ދިވެހިރާއްޖޭގައި ގާއިމްވެތިބި އިންޑިޔާ ސިފައިން ކުރިއަށް ގެންދާ މެޑިކަލް އިވެކުއޭޝަން އޮޕަރޭޝަންތައް ހުއްޓާ ނުލާ ކުރިއަށް ގެންދެވޭނެ ގޮތަކާއި މެދު، ރާއްޖެއާއެކު މަޝްވަރާ ކުރެވުނު ކަމަށް އިންޑިޔާއިން ބުނެފިއެވެ.

ދިވެހިރާއްޖޭގައި ތިބި އިންޑިޔާ ސިފައިން ރާއްޖެއިން ބޭލުމަށް،  އެގައުމުގެ މަތީ ފަންތީގެ ބޭފުޅުންނާއި، ރާއްޖޭގެ މަތީ ފަންތީގެ ބޭފުޅުން ހިމެނޭހެން އުފައްދާފައިވާ ކޯ ގްރޫޕްގެ މަޝްވަރާ ބައްދަލުވުމެއް އިއްޔެ ހެނދުނުން ފެށިގެން ހަވީރާއި ޖެހެންދެން ދިވެހިރާއްޖޭގެ ޚާރިޖީ ވުޒާރާގައި ވަނީ ކުރިއަށް ގެންދެވިފައެވެ.

މަޢުލޫމާތު ލިބިފައިވާ ގޮތުގައި މި މަތީ ފަންތީގެ ކޮމިޓީގައި އިންޑިއާގެ ފަރާތުން މި ބައްދަލުވުމުގައި ބައިވެރިވެވަޑައިގަންނެވީ؛ 
1) އިންޑިއާއިން ރާއްޖެއަށް ކަނޑައަޅާފައި ހުންނަވާ ހައި ކޮމިޝަނަރު މުނޫ މަހާވަރު
2) އިންޑިއާގެ ހާރިޖިއްޔާގެ ފަރާތުން، އިންޑިއާ ކަނޑުގެ ކަންކަމަށް ހާއްސަ ޖޮއިންޓް ސެކްރެޓަރީ ޕުނީތު އަގަރުވާލް
3) އިންޑިއާގެ ދިފާއީ ވުޒާރާގެ މަންދޫބުން
4) އިންޑިއާގެ ކަނޑުގެ ސިފައިންގެ ބޭފުޅުން

ރާއްޖެ ތަމްސީލުކުރެއްވީ:
1) ރައީސް އޮފީހުގެ ޗީފް އޮފް ސްޓާފް އަބްދުالله ފަަޔާޒު
2) ދިވެހި ސިފައިންގެ ޗީފް އޮފް ޑިފެންސް ފޯސް މޭޖަ ޖެނެރަލް އަބްދުއްރަހީމް އަބްދުالله
3) ފޮރިން މިނިސްޓްރީގެ އެމްބެސެޑަރު އެޓް ލާޖު ޑރ. އަލީ ނަސީރު
4) އިންޑިއާގައި ހުންނަވާ ދިވެހި ސަފީރު އިބްރާހިމް ޝަހީބު

އެ މަޝްވަރާ ބައްދަލުވުމާއި ގުޅޭގޮތުން މައުލޫމާތު ހާމަކުރަމުން އިންޑިޔާގެ އިކްސްޓާނަލް އެފެއާޒް މިނިސްޓްރީން ނެރުނު ބަޔާނެއްގައި ބުނެފައިވާ ގޮތުން، އެ ބައްދަލުވުމުގައި ދެގައުމު ދެމެދުގައި ގުޅުން ބަދަހިކޮށް، އިންޑިޔާއިން މިހާރުވެސް ރާއްޖޭގައި ހިންގަމުންދާ ތަރައްގީގެ މަޝްރޫއުތައް އަވަހަށް ކުރިއަށް ގެންދިޔުމާއި ގުޅޭގޮތުން މަޝްވަރާކުރެވުނެވެ.

"މީގެ އިތުރުން، އިންޑިޔާއިން ދިވެހިރާއްޖޭގައި ދެމުންދާ ޚިދުމަތްތަކުގެ ތެރެއިން، ބަލި މީހުން އެތަނުން އަނެއް ތަނަށް އުފުލުމަށް ކުރިއަށް ގެންދާ މެޑްވެކް ހިދުމަތާއި، އިންސާނީ އެހީތެރިކަމުގެ އޮޕަރޭޝަންތައް ނުހުއްޓޭނެ ގޮތެއް ހޯދުމަށް ދެ ފަރާތުން ވެސް މަޝްވަރާ ކުރެވުނު."

އިންޑިޔާގެ ބަޔާން

އިންޑިޔާގެ ބަޔާނުގައި އިތުރަށް ބުނެފައިވާ ގޮތުން، މަތީފަންތީގެ ބޭފުޅުން ހިމެނޭ މި "ކޯ ގުރޫޕް" ގެ ދެން އޮތް ބައްދަލުވުން، ދެ ފަރާތައް ވެސް ފަސޭހަ ދުވަހަކުން އިންޑިޔާގައި ބޭއްވުމަށް އިއްޔެގެ ބައްދަލުވުމުގައި ވަނީ ނިންމާފައެވެ.

އިއްޔެ ބޭއްވުނު މި މަޝްވަރާ ބައްދަލުވުމާއި ގުޅޭގޮތުން ރާއްޖެއިން ވެސް ވަނީ ބަޔާނެއްް ނެރެފައެވެ.

އެގޮތުން ރާއްޖޭގެ ބަޔާނުގައި ބުނެފައިވާގޮތުން، އެ ބައްދަލުވުމުގައި، ރާއްޖޭގައި ތިބި އިންޑިޔާ ސިފައިން ވޭހާވެސް އަވަހަށް އިންޑިޔާއަށް ފޮނުވާލުމަށް ދެގައުމުން ވެސް އެއްބަސް ވެފައިވާ ކަން ފާހަގަކޮށްފައިވެއެވެ.

މީގެ އިތުރުން، މި ބައްދަލުވުމުގައި އަންނަ މާރިޗު 15 ގެ ކުރިން އިންޑިޔާ ސިފައިން ރާއްޖެއިން ބޭލުމަށް އެދިފައިވާނެ ކަމަށްވެސް ސަރުކާރުން ވަނީ ބުނެފައެވެ.

ރާއްޖޭގައި އިންޑިޔާ ސިފައިން ކުރިއަށް ގެންދާ މެޑިކަލް އިވެކުއޭޝަންތައް ހުއްޓާ ނުލާ ކުރިއަށް ގެންދިޔުމަށް މަޝްވަރާ ކުރެވިފައި ވާއިރު، އަންނަ މާރިޗު މަހުން ފެށިގެން ރާއްޖޭގައި އެއާ އެމްބިއުލާންސް ގެ ޚިދުމަތް ރާއްޖޭގައި ފެށުމަށް ސަރުކާރުން އަންނަނީ ތައްޔާރުވަމުންނެވެ.