މައުލޫމާތު ފުރިހަމަކޮށް ހުށަހެޅުމުން ދެ ހަފްތާ ތެރޭ ބޭރުގައި ކިޔަވާ ކުދިންނަށް ފައިސާ ދޫކުރެވޭނެ: ޑރ. ހައިދަރު
ބޭރުގައި ކިޔަވަން ތިބި ދަރިވަރުންގެ މައުލޫމާތު ފުރިހަމަކޮށްފައި އެޕްލިކޭޝަން ހުށަހެޅުމުން ދެ ހަފްތާ ތެރޭގައި ސަރުކާރުން ފައިސާ ދޫކުރާނެ ކަމަށް ހަޔާ އެޑިއުކޭޝަން މިނިސްޓަރ ޑރ. ޢަލީ ހައިދަރު އަޙްމަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ އިޖުތިމާއީ ކަންކަމާ ބެހޭ ކޮމިޓީގައި ވާހަކަ ދައްކަވަމުން މިނިސްޓަރު ޑރ. ހައިދަރު ވިދާޅުވީ ފަންޑު ދޫކުރުން ލަސްވަނީ ދަރިވަރުން މައުލޫމާތު ފުރިހަމަނުކޮށް އެޕްލިކޭޝަން ހުށަހެޅުމުން ނުވަތަ ފައިސާ ދެއްކުމުގެ ސުންގަޑި ކައިރިވުމުން އެޕްލައި ކުރުމުން ކަމަށެވެ.
ސުންގަޑިއާ ކައިރިކޮށް ހަޔާ އެޑިއުކޭޝަން މިނިސްޓްރީއަށް އެޕްލިކޭޝަން ހުށަހެޅުމުން ގޮންޖެހުންތަކެއް ކުރިމަތިވާކަން މިނިސްޓަރ ފާހަގަކުރެއްވިއެވެ. އެގޮތުން ފިނޭންސް މިނިސްޓްރީއަށް ފޮނުވުމުގެ ކުރިން ހަޔާ އެޑިއުކޭޝަން މިނިސްޓްރީއަށް ފޮނުވާ މައުލޫމާތު ޔަގީންކުރަން ޖެހޭ ކަމަށް މިނިސްޓަރ ވިދާޅުވިއެެވެ. މި ހުރިހާ މަރުހަލާތަކަށް ވަގުތު ނަގާކަން މިނިސްޓަރު ފާހަގަކުރެެއްވިއެވެ.
ނަމަވެސް މައުލޫމާތު ފުރިހަމަ އެޕްލިކޭޝަނަކާއިއެކު އެއް ހަފްތާއާއި ދެ ހަފްތާގެ ތެރޭގައި ފައިސާ ދޫކުރުން އަވަސްވެގެންދާނެ ކަމަށް މިނިސްޓަރ ވިދާޅުވިއެވެ.
މިނިސްޓްރީގެ ފަރާތުން ކޮމިޓީއަށް ހާޒިރުވި މަންދޫބު މަރިޔަމް މުޙައްމަދު ވިދާޅުވީ ރާއްޖެއިން ބޭރުގެ ސްޓޫޑެންޓް ލޯނާއި ސްކޮލަޝިޕް ފަންޑު ދޫކުރަނީ އަހަރެއްގެ މައްޗަށް ދެ ބަޔަކަށް ބަހާލައިގެން ކަމަށެވެ. ލޯނު ލިބޭ ފަރާތްތަކަށް ފުރަތަމަ ފައިސާ ދެއްކުމުގައި ޓިއުޝަން ފީ އާއި ހަ މަސް ދުވަހުގެ ސްޓައިޕެންޑް ހިމެނޭއިރު ދެވަނަ ބުރުގައި ދޫކުރާނީ ބާކީ ހަ މަހުގެ ސްޓައިޕެންޑު ކަމަށް އޭނާ ވިދާޅުވެފައިވެ އެވެ.
ޕްރެޒިޑެންޝަލް ސްކޮލަޝިޕް ލިބޭ ފަރާތްތަކަށާއި އެހެނިހެން ސްކޮލާޝިޕްގެ ދަށުން ކިޔަވާ ކުދިންގެ ޓިއުޝަން ފީ ދޫކުރަނީ ޔުނިވާސިޓީ އިންވޮއިސް ލިބުމުން ކަމަށާއި، ލިވިން އެލަވަންސް ދޭނީ އަހަރަކު ދެ ފަހަރަށް ކަމަށް މިނިސްޓަރ ވިދާޅުވެފައި ވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
