އައްޑޫ ވޯޓުގެ ސަބަބުން ރުޅިވެރިކަން އިތުރުނުވާނެ ކަމަށް އުންމީދުކުރަން: ނަޝީދު

އައްޑޫ ސިޓީގައި އިއްޔެ ނެގި ވޯޓުގެ ސަބަބުން، އެ ސިޓީގެ ރަށްތަކުގެ މެދުގައި ރުޅިވެރިކަން އިތުރުނުވުމަށް ބާރު އަޅުއްވާނެ ކަމަށް އުންމީދުކުރައްވާ ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

އައްޑޫ މީދު އާއި ހުޅުދޫ އަދި ފޭދޫގައި ވަކިވަކި ރަށު ކައުންސިލްތައް އުފެއްދުމާ މެދު އެ ތިން ރަށުގެ ރައްޔިތުންގެ ފެންނަ ނުފެންނަ ގޮތް ބެލުމުގެ ވޯޓުގައި، ވަކި ކައުންސިލެއް އުފައްދަން ފެންނަ ކަމަށް މީދޫ އަދި ހުޅުދޫގެ ރައްޔިތުން ނިންމީ އިއްޔެގެ ވޯޓުންނެވެ.

އެހެން ނަމަވެސް އިއްޔެގެ ފެންނަ ނުފެންނަ ވޯޓުގެ ވަގުތީ ނަތީއްޖާ ދައްކާ ގޮތުން ފޭދޫގެ ރައްޔިތުން ބޭނުންވަނީ ސިޓީ ކައުންސިލުގެ ބައެއްގެ ގޮތުގައި އެ ރަށް ބޭއްވުމަށެވެ.

އެކަމާއި ގުޅިގެން އެކްސްގައި ކުރެއްވި ޕޯސްޓެއްގައި ރައީސް ނަޝީދު ވިދާޅުވީ، އިއްޔެގެ ވޯޓުގައި ވޯޓު ދިން ފަރާތްތަކުގެ ތެރެއިން ވަކި ކައުންސިލެއް ހަދަން ވޯޓުދިނީ 2،176 މީހަކު ކަމަށެވެ. އަދި ސިޓީއެއްގެ ގޮތުގައި ބާއްވަން 2،251 މީހަކު ވޯޓު ދިން ކަމަށާއި، މީދޫ އާއި ހުޅުދޫގެ ވޯޓުގެ ބޮޑު އަޣުލަބިއްޔަތެއް ވޯޓު ދިނީ ސިޓީން ވަކިވާން ކަމަށް ނަޝީދު ލިޔުއްވައިފައިވެއެވެ.

"މި ވޯޓުގެ ސަބަބުން ރުޅިވެރިކަން އިތުރުވިޔަ ނުދިނުމަށް ހުރިހާ ބޭފުޅުން ވެސް ބާރު އަޅުއްވާނެ ކަމަށް އަޅުގަނޑު އުންމީދުކުރަން،" ނަޝީދު ލިޔުއްވައިފައިވައިވެއެވެ.

އިއްޔެ ވޯޓުގައި ސިޓީ ކައުންސިލުން ވަކިނުވާން ނިންމި ފޭދޫގެ ނަތީއްޖާއިން ދައްކާ ގޮތުން އެ ރަށުގައި ވަކި ކައުންސިލެއް އޮތުމަށް ވޯޓު ދިނީ 612 މީހުންނެވެ. އަދި ސިޓީ ކައުންސިލުގެ ބައެއްގެ ގޮތުގައި ފޭދޫ އޮތުމަށް 1،822 މީހަކު ވަނީ ވޯޓު ދީފައެވެ.

މީދޫގައި ވަކި ކައުންސިލެއް އޮތުމަށް ނިންމައިފައިވާއިރު، މީދޫގައި ވަކި ކައުންސިލެއް އޮތުމަށް ވޯޓު ދިނީ 841 މީހުންނެވެ. އެކަމާއި ދެކޮޅަށް ވޯޓު ދިނީ 144 މީހުންނެވެ. ހުޅުދޫގައި ވަކި ކައުންސިލެއް އޮތުމަށް ފެންނަ ކަމަށް 720 މީހަކު ވޯޓު ދިންއިރު، އެކަމާއި ދެކޮޅަށް 325 މީހަކު ވަނީ ވޯޓު ދީފައެވެ.