އެއްލައްކަ ރުފިޔާއިނާމާއެކު، އުރީދޫ މަސްރޭސް ފަށައިފި

ރާއްޖޭގެ އެންމެ ފޯރިގަދަ މަސްރޭހުގެ ގޮތުގައި ފާހަގަކުރެވިފައިވާ "އުރީދޫ މަސްރޭސް" މިއަހަރުގެ އިވެންޓް މިއަދު ފަށައިފިއެވެ.

ރާއްޖޭގައި ތިން ސަރަހައްދެއްގައި ކުރިއަށްގެންދިއުމަށް ހަމަޖެހިފައިވާ އުރީދޫ މަސްރޭސް ފަށާފައިވަނީ މާލެ އަތޮޅު ހިންމަފުށިންނެވެ. މިއަހަރުގެ މަސްރޭސް ކުރިއަށްދާނީ ކ.ހިންމަފުށީގެ އިތުރުން ޅ. ނައިފަރާއި ތިނަދޫ ސިޓީގައެވެ. އެކި ސަރަހައްދުތަކުގައި އުރީދޫ މަސްރޭސް ކުރިއަށްގެންދިއުމުގެ މަގްސަދަކީ ވީހާވެސް ގިނަ ބަޔަކަށް މި އުފަލުގައި ބައިވެރިވުމުގެ ފުރުސަތު ދިނުންކަމަށް އުރީދޫއިން ވަނީ ބުނެފައެވެ.

މިފަހަރުގެ މަސްރޭސް މަސްވެރިކަމާއި ކަނޑުގެ ވަޞީލަތްތަކާއި ބެހޭ ވުޒާރާއާ ގުޅިގެން ކުރިއަށްދާއިރު، މިފަހަރުގެ މަސްރޭހުގައި 21 ޓީމަކުން ވާދަކުރެއެވެ.

މަސްރޭހުގައި ޕޮއިންޓް ދިނުމަށް ހަމަޖެހިފައިވާގޮތް

ޓީމުތަކަށް ޕޮއިންޓްސް ދިނުމުގައި ބަލާނީ، ބޭނިމަސް ނިސްބަތްވާ ކެޓަގަރީއާއި ބަރުދަނަށެވެ. އެގޮތުން ކޮންމެ ކެޓަގަރީއަކުން ބޭނިމަހުގެ ބަރުދަން ގުނަ ކެޓަގަރީ ޕޮއިންޓް އަކީ ކެޓަގަރީއަށް ލިބުނު ޖުމްލަ ޕޮއިންޓެވެ. ޓީމުގެ އަސްލު ޕޮއިންޓްގެ ގޮތުގައި ބެލެވޭނީ ހުރިހާ ކެޓަގަރީއެއްގެ ޖުމްލަ އެއްކުރުމުން އަންނަ ޢަދަދެވެ.

އުރީދޫ މަސްރޭހުގެ ވަނަތައް ހޮވުމަށް ހަމަޖެހިފައިވަނީ ކޮންމެ ސިޓީއެއް ވަކިންނެވެ. އެގޮތުން ކޮންމެ ރެއަކު ހޮވާ ވަނަތަކަށް ފައިސާގެ އިނާމް ވަނީ ކަނޑައެޅިފައެވެ. އެގޮތުން އެއްވަނަ ހޯދާ ޓީމަކަށް 25،000 ރުފިޔާ ދިނުމަށް ހަމަޖެހިފައިވާއިރު، ދެވަނަ ހޯދާ ޓީމަކަށް ދިނުމަށް ހަމަޖެހިފައިވަނީ، 10،000 ރުފިޔާއެވެ. އަދި ތިންވަނަ ހޯދާ ޓީމަކަށް ދިނުމަށް ހަމަޖެހިފައިވަނީ، 5،000 ރުފިޔާ އެވެ.

ޓީމް ވަނަތަކުގެ އިތުރުން އެންމެމޮޅު ފިރިހެން އަދި އަންހެން މަސްވެރިޔާވެސް ހޮވުމަށް ވަނީ ހަމަޖެހިފައެވެ. އެންމެ މޮޅު އަންހެން މަސްވެރިއަކަށް 1،000 ރުފިޔާ އަދި އެންމެ މޮޅު ފިރިހެން މަސްވެރިޔާއަށްވެސް ވަނީ 1،000 ރުފިޔާގެ ފައިސާގެ އިނާމް ދިނުމަށް ހަމަޖެހިފައެވެ.