ނިރުބަވެރިކަމާއި ދެކޮޅަށް ކުރާ މަސައްކަތްތަކުގައި އޭގެ އަސްލު ސަބަބަށް ބެލިފައެއް ނުވޭ: ޝާހިދު

ދުނިޔޭގެ ގައުމުތަކުން ނިރުބަވެރިކަމާއި ދެކޮޅަށް ކުރި މަސައްކަތްތަކުގައި އޭގެ އަސްލު ސަބަބަށް ރަނގަޅަށް ބަލާފައިނުވާކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.

އެބޭފުޅާ މިހެން ވިދާޅުވީ އަޒަރްބައިޖާންގެ ވެރިރަށް ބާކޫގައި މިހާރު ކުރިއަށްދާ ނަން އެލައިންޑް މޫވްމަންޓް (ނާމް)ގެ ޤައުމުތަކުގެ އެންމެ އިސްވެރިންގެ 18 ވަނަ ސަމިޓްގައި ވާހަކަފުޅު ދައްކަވަމުންނެވެ.

މިނިސްޓަރ ޝާހިދު ވިދާޅުވީ ނިރުބަވެރިކަމާއި ދެކޮޅަށް ކުރަމުންދާ މަސައްކަތަކީ އުނދަގޫ މަސައްކަތެއްކަމަށާއި އެކަމުގެ ސަބަބުން ނިރުބަވެރިކަން އެއްކޮށް ނައްތާލެވިދާނެކަމާއި މެދު ސުވާލުއުފެދިފައިވާކަމަށެވެ. އަދި އެ ސުވާލަށް ޖަވާބުދިނުމަކީ ފަސޭހަކަމެއް ނޫންކަމަށް މިނިސްޓަރ ވިދާޅުވިއެވެ.

އެބޭފުޅާ ވިދާޅުވި ގޮތުގައި ނިރުބަވެރިކަމާއި ދެކޮޅަށް މަސައްކަތްކުރުމަށް ބިލިޔަނުން ވަނީ މިހާތަނަށް ދުނިޔެއިން ޚަަރަދުކޮށްފައެވެ. ނަމަވެސް އެކަން ކޮށްފައިވަނީ ނިރުބަވެރިކަމުގެ އަސްލު ސަބަބުތަކާއި އެކަން އުފެދުމަށް ބާރުދޭ ސަބަބުތައް ރަނގަޅަށް ދެނެނުގަނެވިކަމަށެވެ. އެއީ ޕޮޕިއުލިޒަމް، ގައުމިއްޔަތު ނުވަތަ ދީނީ ހަރުކަށި ޚިޔާލުތައް ވިޔަސްކަމަށް މިނިސްޓަރ ޝާހިދު ފާހަަގަކުރެއްވިއެވެ.

ޝާހިދު އިތުރަށް ވިދާޅުވީ ނިރުބަވެރިކަމަށް ފަސޭހަ ހައްލެއް ނެތްކަމަށާއި ނަމަވެސް އެކަމަށް ފަހުން ހައްލެއް ހޯދުމަށް ބެހެއްޓުމަކީވެސް ކުރެވެން އޮތްކަމެއް ނޫންކަމަށެވެ.

ފަލަސްތީނުގެ މައްސަލައިގައި ވާހަކަ ދައްކަވަމުން މިނިސްޓަރ ޝާހިދު ވަނީ ފަލަސްތީނުގެ މައްސަލައިގައި ދިވެހިރާއްޖެއިން އަބަދުވެސް ގެންގުޅެމުންދާ ސިޔާސަތާއި ބެހޭ ގޮތުން ވާހަކަ ދައްކަވައި، ފަލަސްތީނުގެ މިނިވަން ދައުލަތެއް ޤާއިމްކުރުމަށް ދިވެހިރާއްޖެއިން ކުރާ ތާޢީދު ތަކުރާރުކުރައްވާފައެވެ.

ފޮރިން މިނިސްޓަރ އަބްދުﷲ ޝާހިދުގެ އަރިހުގައި ނާމް ސަމިޓްގައި ބައިވެރިވެވަޑައިގަންނަވަނީ ފޮރިން ސެކްރެޓަރީ އަބްދުލްޣަފޫރު މުހައްމަދު އާއި، އެމްބެސެޑަރ އެޓް ލާޖް އަހުމަދު މާހިރުގެ އިތުރުން އެޑިޝަނަލް ސެކްރެޓަރީ އަމީން ޖާވިދު ފައިޒަލްއެވެ.

120 މެމްބަރު ޤައުމުގެ މައްޗަށް އެކުލެވޭ ނަން-އެލައިންޑް މޫވްމަންޓަކީ އދ ފިޔަވައި ދުނިޔޭގެ އެންމެ ބޮޑު އެއް ޖަމާޢަތެވެ. ދިވެހިރާއްޖެއިން ނާމްގެ މެމްބަރު ޤައުމަކަށްވީ 1976 ވަނަ އަހަރުއެވެ.