ޕަބްލިކް ވާކްސް ޔުނިޓް ގާއިމުކުރާނެ އިތުރު 14 ރަށެއް ކަނޑައަޅައިފި
ލިޔުންތެރިޔާ
އަހުމަދު ހަމީދު އާދަމް
ޕަބްލިކް ވާކްސް ޔުނިޓް ގާއިމުކުރާނެ ރަށްތައް ކަނޑައަޅާފައިނުވާ 14 އަތޮޅުގައި އެކަމަށް ހާއްސަ ރަށްތައް ކަނޑައަޅާ އިއުލާނު ކޮށްފި އެވެ.
ރައްޔިތުންނާއި ގާތުން ރާއްޖޭގެ ހުރިހާ އަތޮޅެއްގައި އާންމު ހިދުމަތް ދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާފައިވާ ނިންމެވުމުގެ ދަށުން ރަށްރަށުގެ މަގުތައް މަރާމާތު ކުުރުމާއި ވެލިމަގު ހެދުމާއި އަލަށް އާބާދުވާ ސަރަޙައްދުތަކުގައި ހަދަން ޖެހޭ މަގުތައް ހެދުމަށްޓަކާ ނަގަންޖެހޭ ރުއްގަސް ނެގުމާއި ޗަކަ ބިންތަކަށް ވެލިއަޅައި ބިންގަނޑު އެއްވަރުކުރުމާއި ކާނުތައް ސާފުކުރުން ފަދަ އާންމު ހިދުމަތް ދެވޭނެ އިންތިޒާމު ހަމަޖެއްސުމަށް ކޮންމެ އަތޮޅަކުން ރަށެއް ކަނޑައަޅަން ނިންމި އެވެ.
މިހާތަނަށް 14 އަތޮޅެއްގައި އޮތީ ރަށެއް ކަނޑަ ނާޅާ އެވެ.
ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވުޒާރާ އިން މިއަދު ވަނީ އެ 14 ރަށް ކަނޑައަޅާފަ އެވެ.
ޕަބްލިކް ވަރކްސް ޔުނިޓް ޤާއިމުކުރާނެ ރަށްތަކަކީ ހއ. ދިއްދޫ އާއި ށ. ފުނަދޫ އާއި ނ. މަނަދޫ އާއި ބ. އޭދަފުއްޓާއި ޅ. ނައިފަރާއި ކ. ތުލުސްދޫ އާއި އއ. ރަސްދޫ އާއި އދ. މަހިބަދޫ އާއި ވ. ފެލިދޫ އާއި މ. މުލި އާއި ފ. ނިލަންދޫ އާއި ދ. ކުޑަހުވަދޫ އާއި ތ. ވޭމަންޑޫ އަދި ގއ. ވިލިނގިލިއްޔެވެ.
ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވުޒާރާ އިން ބުނީ މި ރަށްތައް ކަނޑައެޅުމުގައި އާންމު މިންގަނޑެއް ކަމަށް ބަލާފައިވާނީ އަތޮޅުގެ އަތޮޅު ކައުންސިލް ހިންގާ ރަށްރަށް ކަމަށެވެ. އަދި ބުނީ ސަރުކާރުގެ މި ނިންމެވުމާއި ގުޅިގެން އާންމު ހިދުމަތްދޭ ޔުނިޓްތައް ގާއިމު ކުރުމަށް ބޭނުންވާ މީހުންނާއި ވަސީލަތްތައް ހޯދުމުގެ އިދާރީ މަސައްކަތް ކުރަމުންދާ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
