އެމްޑީޕީގެ ވަގުތީ ޗެއާޕާސަނަކަށް ގަޕޯ އިންތިހާބުކޮށްފި

އިދިކޮޅު މައި ޕާޓީ -- އެމްޑީޕީގެ ވަގުތީ ޗެއާޕާސަންގެ މަގާމަށް ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ (ގަޕޯ) އިންތިހާބުކޮށްފި އެވެ.

އެމްޑީޕީގެ ވަގުތީ ޗެއާޕާސަންގެ މަގާމަށް އަބްދުލްޣަފޫރު އިންތިހާބުކުރީ މިރޭ އޮތް އެމްޑީޕީގެ ގައުމީ މަޖިލީހުގެ 31 ވަނަ ޖަލްސާގަ އެވެ. މި ޖަލްސާގައި އަބްދުލްޣަފޫރުގެ ނަމަށް ވޯޓަށް އެހުމުން 65 މެންބަރުން ވޯޓް ދެއްވި އެވެ. މި ބައްދަލްވުމުގައި 67 މެންބަރަކު ބައިވެރިވެ އެވެ. ވޯޓް ދެއްވާގޮތަށް ތިއްބެވީ 66 މެންބަރުންނެވެ.

ޣަފޫރުގެ ނަން ހުށައެޅީ ކުރީގެ މެންބަރު އިލްހާމް އަހްމަދެވެ. އޭނާއަކީ އެމްޑީޕީގެ އިގުރައިދޫ ދާއިރާގެ ރައީސެވެ.

އެމްޑީޕީގެ ވަގުތީ ޗެއާޕާސަންގެ މަގާމަށް އަބްދުލްޣަފޫރު އިންތިހާބުކޮށްފައިވާއިރު އެންމެ ފަހުން އޮތް ގައުމީ މަޖިލީހުގެ ޖަލްސާގައި ވެސް އެމްޑީޕީއަށް ވަގުތީ ޗެއާޕާސަންގެ މަގާމަށް ބޭފުޅަކު އިންތިހާބު ކުރަން މަސައްކަތް ކުރި އެވެ. ނަމަވެސް ރައީސް ސޯލިހާއި ރައީސް ނަޝީދުގެ ފެކްޝަންގެ އަރައިރުން ބޮޑުވެ ޖަލްސާ ކުރިއަށް ގެންދެވޭ ގޮތް ނުވީ އެވެ.

އެމްޑީޕީގެ ޗެއާޕާސަންގެ މަގާމު ހުސްވީ އެ މަގާމުގައި ކުރީން ހުންނެވި ކުރީގެ އިކޮނޮމިކް މިނިސްޓަރު ފައްޔާޒް އިސްމާއީލް މަގާމުން އިސްތިއުފާ ދެއްވުމުންނެވެ. އޭނާ އެ މަގާމުން އިސްތިއުފާ ދެއްވީ ގިނަ ތުހުމަތުތަކެއް ކުރެއްވުމަށް ފަހު އެވެ. ފައްޔާޒް މިހާރު ހުންނެވީ ރައީސް ނަޝީދުގެ ފަޅީގައި ކަަމަށް ބެލެވެ އެވެ. ރައީސް ސޯލިހާއި އޮތް ގުޅުން ވަނީ ހީނަރުވެފަ އެވެ.

މީގެ އިތުރުން ކުރިއަށް އޮތް ކައުންސިލް އިންތިހާބުގެ ޕްރައިމަރީގެ ފޯރިވެސް ވަނީ ގަދަވެފަ އެވެ. ހާއްސަ ކޮށް މާލެ ސިޓީގެ މޭޔަރު ކަމަށް ނެރޭނެ ކެންޑިޑޭޓަކު ކަނޑައެޅުމަށް އޮތް ވާދައާ ފޯރިގަދަ އެވެ. ނަޝީދާއި ފައްޔާޒްގެ ސަޕޯޓް އޮތީ އަލީ އާޒިމަށެވެ. ރައީސް ސޯލިހްގެ ޓީމްގެ ތާއީދު އޮތީ މިހާރުގެ މޭޔަރު އާދަމް އާޒިމަށެވެ. ދެ ފަރާތުން ވެސް ދަނީ ހޫނު ބަހުގެ ހަމަލާތައް ރައްދު ކުރަމުންނެވެ.