މަހިބަދޫގައި 100 ހައުސިންގ ޔުނިޓް އެޅުމުގެ މަސައްކަތް އަންނަ އަހަރު ފަށާނަން: ރައީސް މުޢިއްޒު

ކުރިއަށް އޮތް 2025 ވަނަ އަހަރުގެ ތެރޭގައި އދ. މަހިބަދޫ ގައި، 100 ހައުސިންގ ޔުނިޓް އެޅުމުގެ މަސައްކަތް ފަށްޓަވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ އދ އަތޮޅަށް ކުރައްވަމުންދާ ދަތުރުފުޅުގެ ތެރެއިން މަހިބަދޫއަށް ވަޑައިގެން އެ ރަށު ރައްޔިތުންނާ ބައްދަލު ކުރެއްވުމަށް ބޭއްވި ޖައްސާގައި ވާހަކަ ދައްކަވަމުން، އެމަނިކުފާނު ވިދާޅުވީ، 2025 ވަނަ އަހަރުގެ ބަޖެޓަކީ ގެދޮރުވެރިކަމުގެ ބަޖެޓެއް ކަމަށެވެ.

އެގޮތުން ގެދޮރުވެރިކަމަށް ވެވަޑައިގެންނެވި ވައުދުތައް ފުއްދުމުގެ މަސައްކަތް އަންނަ އަހަރު ފެށިގެންދާނެކަން ފާހަގަކުރައްވައި އެމަނިކުފާނު ވިދާޅުވީ، ވަޢުދުފުޅާއި އެއްގޮތަށް އަންނަ އަހަރު މަހިބަދޫގައި 100 ހައުސިންގ ޔުނިޓް އެޅުމުގެ މަސައްކަތް ފަށްޓަވާނެ ކަމަށެވެ.

އަންނަ އަހަރަކީ މިރަށުގައި (100 ހައުސިންގ ޔުނިޓް ) ގާއިމް ކުރުމަށް އަޅުގަނޑު ވެފައިވާ ވަޢުދު ފުއްދާ ދުވަސް. އެ 100 ޔުނިޓްގެ މަސައްކަތް ފަށާނަން. އަދި ވީހާވެސް ބާރު މިނެއްގައި، ނިންމައިދޭނެ ކަމުގެ ޔަގީންކަން އަރުވަން.

ރައީސް ޑރ. މުޙައްމަދު މުޢިއްޒު

ރައީސް މުޢިއްޒު އިތުރަށް ވިދާޅުވީ، ދާއިރާގެ ރައްޔިތުން އެދިފައިވާ ގޮތަށް މާފަރުފަޅު ތަރައްޤީ ކުރުމުގެ މަސައްކަތް 2025 ވަނަ އަހަރު ތެރޭގައި ފަށްޓަވާނެ ކަމަށާ އެގޮތުން ބިން ހިއްކުމާއި، ދެން ކުރަންޖެހޭ މަސައްކަތްތައް ތަރުތީބުކޮށް، ހަގީގީ މާނައިގައި އެ ރަށް އާރބަން ސެންޓަރެއްގެ ގޮތުގައި ހަމަޖައްސަވައިދެއްވާނެކަމަށެވެ.

މީގެ އިތުުރުން މަހިބަދޫގެ ހޭންޑްބޯލް ކޯޓުގެ މަސައްކަތް ކުރައްވާނެ ކަމަށާ ފުޓުބޯޅަ ދަނޑުގައި ލައިޓް ހަރުކުރުމުގެ މަސައްކަތް އަންނަ އަހަރުގެ ކުރީކޮޅުގައި ފަށްޓަވާނެ ކަމަށް އެމަނިކުފާނު ވިދާޅުވިއެވެ. އަދި މަހިބަދޫ ޒުވާނުންގެ މަރުކަޒުވެސް ވަސީލަތްތަކާއެކު ތަރައްގީކޮށް ހުޅުވާނެ ކަމަށް ވިދާޅުވިއެވެ. އެކަންކަން އަންނަ އަހަރުގެ ތެރޭގައި ކުރިއަށްދާނެ ކަމުގެ ޔަގީކަން އެމަނިކުފާނު ދެއްވާފައި ވެއެވެ.