ފާއިތުވި ހަފްތާގައި ދައުލަތުގެ ބަޖެޓުން އެންމެ ބޮޑު ހޭދައެއް ކުރީ ބޭރުގެ ލޯނުތައް އަދާކުރުމަށް؛ މިހާތަނަށް 9.6 ބިލިއަން ޚަރަދުކޮށްފި

ފާއިތުވި ހަފްތާގެ ތެރޭގައި ދައުލަތުގެ ބަޖެޓުން އެންމެ ބޮޑު ހޭދައެއް ކޮށްފައިވަނީ ބޭރުގެ ލޯނުތައް އަދާކުރުމަށް ކަމަށް މިނިސްޓްރީ އޮފް ފައިނޭންސް އެންޑް ޕަބްލިކް އެންޓަރޕްރައިޒަސްއިން ހާމަކޮށްފިއެވެ.

ފައިނޭންސް މިނިސްޓްރީން އާންމުކޮށްފައިވާ އެންމެ ފަހުގެ 'ވީކްލީ ފިސްކަލް ޑިވެލޮޕްމަންޓްސް' ރިޕޯޓުގައިވާ ގޮތުން، 06 އޯގަސްޓް 2026 ގެ ނިޔަލަށް ލޯނު ދެއްކުމަށް ޖުމްލަ 9.6 ބިލިއަން ރުފިޔާ ވަނީ ޚަރަދުކޮށްފައެވެ. މިއީ މިދިޔަ އަހަރުގެ އެ މުއްދަތުގައި ލޯނު ދެއްކުމަށް ހޭދަކުރި 3.9 ބިލިއަން ރުފިޔާއާ އަޅާބަލާއިރު 146.0 އިންސައްތައިގެ ބޮޑު އިތުރުވުމެކެވެ. މިއަހަރުގެ ބަޖެޓުގައި ލޯނު ދެއްކުމަށް ކަނޑައަޅާފައިވަނީ ޖުމްލަ 12.9 ބިލިއަން ރުފިޔާއެވެ.

އާމްދަނީއަށް ލިބުނު ކުރިއެރުން

ދައުލަތުގެ އާމްދަނީއަށް ބަލާއިރު، މިއަހަރުގެ އޯގަސްޓް 6 ގެ ނިޔަލަށް އާމްދަނީ އާއި ހިލޭ އެހީގެ ގޮތުގައި 26.5 ބިލިއަން ރުފިޔާ ވަނީ ލިބިފައެވެ. މިއީ މިދިޔަ އަހަރުގެ މި މުއްދަތުގައި ލިބުނު 24.2 ބިލިއަން ރުފިޔާއާ އަޅާބަލާއިރު 9.3 އިންސައްތައިގެ ކުރިއެރުމެކެވެ. އާމްދަނީ އިތުރުވުމުގެ މައިގަނޑު ސަބަބަކީ ޓެކްސްގެ ގޮތުގައި ލިބުނު އާމްދަނީ 10.1 އިންސައްތަ އިތުރުވެ، 20.5 ބިލިއަން ރުފިޔާއަށް އެރުމެވެ.

ޓެކްސް އާމްދަނީގެ ތެރެއިން ޖީ.ޖީ.އެސް.ޓީގެ ގޮތުގައި 3.4 ބިލިއަން ރުފިޔާ ލިބިފައިވާއިރު، މިއީ 10.4 އިންސައްތައިގެ އިތުރުވުމެކެވެ. އަދި ޓީ.ޖީ.އެސް.ޓީގެ ގޮތުގައި 7.1 ބިލިއަން ރުފިޔާ ވަނީ ލިބިފައެވެ. މީގެ އިތުރުން ކޯޕަރޭޓް އިންކަމް ޓެކްސްގެ ގޮތުގައި 2.7 ބިލިއަން ރުފިޔާ، އިމްޕޯޓް ޑިއުޓީގެ ގޮތުގައި 2.0 ބިލިއަން ރުފިޔާ، އަދި ގްރީން ޓެކްސްގެ ގޮތުގައި 1.3 ބިލިއަން ރުފިޔާ ވަނީ ދައުލަތަށް ލިބިފައެވެ.

ހިލޭ އެހީގެ ގޮތުގައި ލިބުނު މިންވަރުވެސް ވަނީ ފާހަގަކޮށްލެވޭ މިންވަރަކަށް އިތުރުވެފައެވެ. އެގޮތުން މިދިޔަ އަހަރު ލިބުނު 221.2 މިލިއަން ރުފިޔާގެ ބަދަލުގައި، މިއަހަރު ވަނީ ދެގުނައަށްވުރެ އިތުރު އަދަދެއް ކަމަށްވާ 454.8 މިލިއަން ރުފިޔާ ލިބިފައެވެ.

ޚަރަދުތަކުގެ ތަފްސީލް

ދައުލަތުގެ ރިކަރަންޓް ޚަރަދު ވަނީ 23.9 ބިލިއަން ރުފިޔާއަށް އަރާފައެވެ. މީގެ ތެރޭގައި މުސާރައާއި ޕެންޝަނަށް 9.4 ބިލިއަން ރުފިޔާ އަދި އިދާރީ ޚަރަދުތަކަށް 14.4 ބިލިއަން ރުފިޔާ ހޭދަވެފައިވެއެވެ. ސަބްސިޑީއަށް ކުރި ޚަރަދު 75.7 އިންސައްތަ އިތުރުވެ 3.2 ބިލިއަން ރުފިޔާއަށް އަރާފައިވާއިރު، އާސަންދައަށް 1.3 ބިލިއަން ރުފިޔާ ވަނީ ޚަރަދުވެފައެވެ.

ކެޕިޓަލް ޚަރަދުތަކަށް ބަލާއިރު، ބިމާއި އިމާރާތްތަކަށް 1.1 ބިލިއަން ރުފިޔާ، އަދި ފާލަމާއި ބަނދަރު ފަދަ އުމްރާނީ ތަރައްޤީގެ މަޝްރޫޢުތަކަށް ބޮޑެތި ހޭދަތަކެއް ވަނީ ކޮށްފައެވެ.

މި ރިޕޯޓުން ދައްކާގޮތުގައި ދައުލަތުގެ ފިސްކަލް ބެލެންސް ހުރީ 792.8 މިލިއަން ރުފިޔާގެ ޑެފިސިޓެއްގައެވެ. ނަމަވެސް ޕްރައިމަރީ ބެލެންސް ހުރީ 2.4 ބިލިއަން ރުފިޔާގެ ސަރޕްލަސްއެއްގައެވެ.