ރައީސް ޔާމީންގެ ހުކުމް މާދަމާ އިސްތިއުނާފަށް ހުށައަޅަނީ

މަނީ ލޯންޑްރިންގގެ ކުށް ސާބިތުވެ ފަސް އަހަރުގެ ޖަލުހުކުމެއް ތަންފީޒުކުރައްވަމުން ގެންދަވާ ކުރީގެ ރައީސް އަބްދުﷲ ޔާމީންގެ ހުކުމް މާދަމާ އިސްތިއުނާފުކުރުމަށް ނިންމައިފިއެވެ.

މިކަން ހާމަކުރެއްވީ އެމަނިކުފާނުގެ ގާނޫނީ ވަކީލުންގެ ޓީމްގައި އިސްކޮށް ހަރަކާތްތެރިވާ ކުރީގެ ނައިބު ރައީސް ޑރ.މުހައްމަދު ޖަމީލު އަހުމަދެވެ.

އެބޭފުޅާ ވިދާޅުވީ ގާނޫނީ ހަަމަތަކުން ބަލާއިރުވެސް ރައީސް ޔާމީންގެ މައްޗަށް އުފުލާފައިވާ ދައުވާ ސާބިތުނުވާނެކަމަށާއި، އެފަދަ ދައުވާއަކާއި ގުޅިގެން އެމަނިކުފާނު ޖަލުގައި ހުންނަވަން ޖެހުމުން ކަންބޮޑުވެ ވަޑައިގަންނަވާކަމަށެވެ.

ޑރ.ޖަމީލް ވިދާޅުވީ ރައީސް ޔާމީންގެ ޖަލުހުކުމް މާދަމާ އިސްތިއުނާފަށް ހުށައަޅުއްވާނެކަމަށާއި، އެއާއި އެކު ކަފާލާތުގެ ދަށުން ދޫކޮށްލުމަށާއި ހުކުމް ތަންފީޒުކުރުން ފަސްކުރުމުގެ އަމުރަކަށްވެސް ހުށައަޅުއްވާނެކަމަށެވެ. ޖަމީލް ވިދާޅުވީ އިސްތިއުނާފުގެ މަރުހަލާ ނިމެންދެން ރައީސް ޔާމީން ގެއަށް ބަދަލުކޮށްދެއްވުމަށް އެދިވަޑައިގަންނަވާ ކަަމަށާއި، ދައުލަތުން މީގެ ކުރިންވެސް އެފަދައިން އަމަލުކޮށްފައިވާނެކަމަށެވެ.

މީގެ އިތުރުން އެބޭފުޅާ ވަނީ ރައީސް ޔާމީން މާލޭ ޖަލުގައި ހުންނެވި ހާލަތާާއި މެދުވެސް ކަންބޮޑުވުން ފާޅުކުރައްވާފައެވެ.

ޑރ.ޖަމީލް ވިދާޅުވީ މާލޭ ޖަލަކީ ހާލަތު ގޯސްތަނެއްކަމަށާއި ރައީސް ޔާމީން ހުންނަވާ ގޮޅިއަކީ ފެންވަރު ދަށް ގޮޅިއެއްކަމަށް އެމަނިކުފާނުގެ ފަރާތުން މައުލޫމާތު ލިބިވަޑައިގެންފައިވާ ކަމަށެވެ. އެގޮތުން އެގޮޅީގައި ހުންނަ އެނދުގައި އެމަނިކުފާނަށް ރަނގަޅަށް ހަށިކޮޅު ދަމާނުލެވޭ އިރު، ފާހަނާ ފްލަޝްނުކުރެވޭ ކަމަށާއި ހޫނުފެންވެސް ނުލިބޭކަމަށް ޑރ.ޖަމީލް ފާހަގަކުރެއްވިއެވެ.