އިމްތިހާނުތަކުގެ ތާރީހު ބަދަލުކޮށް،މަޖިލިސް މެމްބަރުންގެ ބޮލުގައި އެޅުވީ ނާގާބިލުކަން ފޮރުވަން: އެމްޑީޕީ

އެޑިއުކޭޝަން މިނިސްޓްރީން ދަރިވަރުންގެ އިމްތިހާނުތައް ބާއްވާ ތާރީޚަށް  ކުއްލިއަކަށް ގެނައި ބަދަލުގެ ސަބަބުން ދަރިވަރުންނަށް ލިބުނު ކުއްލި ޝޮކާއި އަދި މިނިސްޓްރީގެ ރޭވުންތެރިކަމެއް ނެތުމުން ކުރަން މަޖުބޫރުވީ ކަންތައްތައް އިދިކޮޅު އެމްޑީޕީގެ މަޖިލިސް މެމްބަރުންގެ ބޮލުގައި އެޅުވީ މިނިސްޓްރީގެ ވެރިންގެ ނާޤާބިލުކަން ފޮރުވަން ކަމަށް އެޕާޓީން ބުނެފިއެވެ.

އެމްޑީޕީން މިފަދައިން ބުނީ، 19 މާރިޗު 2024 ވަނަ ދުވަހު ރައްޔިތުންގެ މަޖިލީހުގައި އެޑިޔުކޭޝަން މިނިސްޓަރ ޑޮކްޓަރ އިސްމާއީލް ޝަފީއު ދެއްކެވި ބައެއް ވާހަކަ ތަކާއި ގުޅިގެން އެޕާޓީން ނެރުނު ނޫސް ބަޔާނެއްގައި އެވެ. އެމްޑީޕީން ނެރުނު ނޫސްބަޔާނުގައި ބުނީ ދިރާސީ ކަލަންޑަރަށް ގެނައި ބަދަލާ ގުޅިގެން އައި ޕްރެޝަރު ކުޑަކުރުމަށްޓަކައި މަޖިލިސް މެމްބަރުންގެ ބޮލުގައި އެކަން އަޅުވައި، ދަރިވަރުންގެ އިމްތިހާނު އަވަސްކޮށް އިތުރު ޕްރެޝަރަށް ދަރިވަރުންނާއި ބެލެނިވެރިންނާއި ޓީޗަރުން ވައްޓާލުމުގެ ސަބަބުން އަގު ނުކުރެވޭނެ ފަދަ ގެއްލުންތައް ތަޢުލީމީ ނިޒާމަށް ކުރަމުންދާކަމަށެވެ.

"ފުރަތަމަކަމަކަށް ކުއްލިއަކަށް ދަރިވަރުންގެ އިމްތިހާނުތައް ބާއްވާ ތާރީޚަށް ކުރިން އެންގުމަކާނުލާ ގެނެވުނު ބަދަލުގެ ސަބަބުން ދަރިވަރުންނަށް ލިބުނު ކުއްލި ޝޮކާއި އަދި މިނިސްޓްރީގެ ރޭވުންތެރިކަމެއް ނެތުމުން ކުރަން މަޖުބޫރުވީ ކަންތައް މި ޕާޓީގެ މަޖިލިސް މެމްބަރުންގެ ބޮލުގައި އަޅުވާ މިނިސްޓްރީގެ ވެރިންގެ ނާޤާބިލުކަން ފޮރުވަން ހެއްދެވި އިތުރުފުޅު ކުށްވެރިކުރަމެވެ."

އެމްޑީޕީން ބުންޏެވެ.

އެމްޑީޕީން ބުނީ، އެޑިއުކޭޝަން މިނިސްޓްރީން 8 ޖަނަވަރީ 2023 ގައި އާއްމު ކުރި ދިރާސީ ކަލަންޑަރުގައިވާ ގޮތުން ދަރިވަރުންގެ އިމްތިހާނު ޝެޑިއުލްކޮށްފައިވަނީ 16 މާރިޗްއިން 27 އޭޕްރިލަށް ކަމަށާއި އަދި 27 އޭޕްރިލްގައި އިމްތިހާނުތައް ނިމުމުން ޕޭޕަރުތައް މާރކުކޮށް ދަރިވަރުންގެ ރިޕޯރޓު ތައްޔާރުކުރަން ޓީޗަރުންނަށް ލިބޭނީ އެންމެ 3 ދުވަސް ކަމަށެވެ. މިއީ މުދައްރިސުންނަށް ވަރަށް ބުރަކަމަކަށް ވެގެންދާނެ ކަމަށާއި މިކަމާއި ގުޅިގެން ޓީޗަރުން ޝަކުވާ ކުރަމުން ދިޔަ ކަމަށް ވެސް އެޕާޓީގެ ނޫސްބަޔާނުގައި ވެއެވެ.

މިގޮތަށް އިމްތިހާނުތައް ޝެޑިއުލްކުރިއިރު މި އަހަރުގެ އެސްއެސްސީ އިމްތިހާނު 25 އޭޕްރިލްގައި ފެށޭކަން އެނގިފައިނުވާ ކަމަށާއި، 25 އޭޕްރިލްއަށް އިމްތިހާނުތައް ނިންމުމުގެ މަޤްޞަދުގައި 2 ދުވަސް ކުރިއަށް ޖައްސާނަމަ އިމްތިހާނު ފަށަން ޖެހޭނީ ބަންދަށްފަހު ހުޅުވޭ ދުވަހު ކަމަށް ވެސް އެމްޑީޕީން ބުންޏެވެ. މިހެން ނުހެދޭނެތީ މިހާރު ރޯދަ މަހުގެ ފަހު 10 އަކަށް ބަންދުވުމުގެ 2 ދުވަސް ކުރިއަށް އިމްތިހާނު ފެށުމަށް ހަމަޖައްސާފައިވާ ކަމަށް ބުނެ އެޕާޓީން ވަނީ މި "ދެއުޅިއެއްނުވާ" ނިންމުން ނިންމާފައިވަނީ މަޖިލިސްގެ ކޮން ޕްރެޝަރެއް އޮވެގެންތޯ އެމްޑީޕީން ވަނީ ސުވާލުކޮށްފައެވެ.

އެމްޑީޕީން ބުނީ،ދިރާސީ އަހަރު ކުރުކޮށްހަފްތާ ބަންދެއް ރޭނގަޑެއް ރަސްމީ ބަންދެއް ބެލުމެއްނެތި މުދައްރިސުން ތާ އަބަދު މަސައްކަތުގައި ތިބުމަށް މަޖުބޫރުކުރުމުގެ ސަބަބުން ޓީޗަރުން ނަފްސާނީވެ އާއިލީ ގުޅުންތައް ހީނަރުވަމުންދާ ކަމުގެ ޝަކުވާ ކުރަމުން އަންނަ ކަމަށެވެ.

ޓީޗަރުންނާ ދޭތެރޭ ވިސްނާ ނަމަ މިފަދަ ބޮޑު ބުރައެއް ޓީޗަރުންނަށް ނުޖައްސާނެ ކަމަށާއި އިތުރު ހަރަކާތްތައް ވެސް ހުއްޓާލީ ދިރާސީ އަހަރު ކުރުކުރުމުގެ ސަބަބުން މަންހަޖުގެ ބައިތައް ނިންމުމަށް އިތުރު ވަގުތު ހޭދަކުރަން ޖެހޭތީ އެބައިތައް ސްކޫލުތަކުގައި ކުރެވެން ނެތުމުންކަން އެންމެނަށްވެސް އެނގޭ ކަމަށް ބުނެ އެމްޑީޕީން ވަނީ އެޑިއުކޭޝަން މިނިސްޓްރީ އަށް ފާޑުކިޔުންތައް އަމާޒުކޮށްފައެވެ.

މީގެ އިތުރުންވެސް އެމްޑީޕީން ވަނީ އެއްވެސް މަޝްވަރާއެއް ރޭވުމެއް ނެތި ދަރިވަރުންނަށް ކުރާނެ އަސަރަށް ނުބަލާ މިހެން ނިންމާ ނިންމުން ތަކުގެ ސަބަބުން އެކަމުގެ ނޭދެވޭ އަސަރު ދަރިވަރުންނަށް ކުރާނެތީ އެކަމާއި ކަންބޮޑުވާކަމަށް ބުނެ، ދަރިވަރުންނާ ގުޅޭ ނިންމުންތައް ނިންމުމުގައި ޒިންމާދާރުވުމަށް މިނިސްޓްރީ އޮފް އެޑިޔުކޭޝަން އަށް ގޮވާލާފައެވެ.