އާ ޓާމިނަލް ހުޅުވުން: ރައީސްގެ ޝުކުރު ޔާމީނާއި ސޯލިހަށް
ލިޔުންތެރިޔާ
އަހުމަދު ހަމީދު އާދަމް
ވެލާނާ އިންޓަނޭޝަނަލް އެއާޕޯޓްގެ އާ ޓާމިނަލް މިރޭ ހުޅުވިގެން ދިޔައީ ނިމިދިޔަ ދެ ސަރުކާރުގެ ވެރީންގެ ވެސް ބޮޑު ބައިވެރިވުމެއް އޮވެގެން ކަން ފާހަގަ ކުރައްވާ ކުރީގެ ރައީސް އަބްދުﷲ ޔާމީން އާއި ކުރީގެ ރައީސް އިބްރާހިމް މުހައްމަދު ސޯލިހަށް, ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ޝުކުރު އަދާކުރައްވައިފި އެވެ.
ވީއައިއޭގެ އާ ޓާމިނަލް ހުޅުވުމަށް މިރޭ ބޭއްވި ކުލަގަދަ ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ ވީއައިއޭގެ އާ ޓާމިނަލް ހުޅުވުމަކީ ވަރަށް ބޮޑު ކާމިޔާބެއް ކަމަށެވެ. ކާމިޔާބީ ވަރަށް ބުރަ މަސައްކަތުން ވަރަށް ގިނަ ބައެއްގެ މަަސައްކަތުން ހޯދޭ އެއްޗެއްކަން ފާހަގަ ކުރައްވާ ރައީސް ވިދާޅުވީ އާ ޓާމިނަލްގެ ކާމިޔާބުގެ ސިއްރަކީ ވެސް އެއީ ކަމަށެވެ.
އެހެން ކަމުން އެ މަސައްކަތަށް އެހީތެރިވެދިން ހުރިހާ ފަރާތްތަކަށް ޝުކުރު އަދާކުރެއްވި އެވެ. ހާއްސަކޮށް އެއާޕޯޓް މަޝްރޫއުއަށް ފަންޑު ދެއްވި ހަތަރު ފަންޑުގެ ނަން ފާހަގަ ކުރެއްވި އެވެ. އަދި ވިދާޅުވީ މި މަސައްކަތުގައި މި ސަރުކާރުގެ އިތުރުން ކުރީ ދެ ސަރުކާރުގެ ބުރަ މަސައްކަތް ހިމެނޭ ކަމަށެވެ.
އެގޮތުން މި ބިޔަ ބޮޑު މަޝްރޫއު ފެށިގެން ދިޔައީ ރައީސް ޔާމީންގެ ވެރިކަމުގައި ކަން ފާހަގަ ކުރެއްވި އެވެ. އަދި ރައީސް ސޯލިހްގެ ސަރުކާރުގައި ވެސް މަޝްރޫއުގެ މުހިންމު މަސައްކަތްތަކެއް ކުރެވުނުކަން ފާހަގަ ކުރައްވާ އެ ދެ ރައީސުންނަށް ވަަރަށް ބޮޑަށް ޝުކުރު އަދާކުރެއްވި އެވެ.
"މި ދެ ރައީސުންނަށް [ރައީސް ޔާމީން އާއި ރައީސް ސޯލިހަށް] ވަރަށް ބޮޑަށް ޝުކުރު ދަންނަވަން,"
މީގެ އިތުރުން އެއާޕޯޓްގެ މަސައްކަތް ނިންމާލުމަށް ރެއާ ދުވާލު ބުރަ މަސައްކަތް ކުރެއްވި އެމްއޭސީއެލްގެ ހުރިހާ މުވައްޒިފުންނަށް އެމަނިކުފާނު ވަނީ ޝުކުރު ދަންނަވާފަ އެވެ. ރައީސް ވިދާޅުވީ އެމްއޭސީއެލްގެ މުވައްޒިފުން އެހާ ބުރަކޮށް މަސައްކަތް ނުކުރިނަމަ އާ ޓާމިނަލް ހުޅުވަން އިތުރު ދޮޅު އަހަރު ދުވަސް ހޭދަ ކުރަން ޖެހޭނެ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
