އޭޕްރިލް މަހަށްފަހު އެންމެ ގިނައިން ފަތުރުވެރިން ޒިޔާރަތްކުރީ އޮގަސްޓްމަހު

އޭޕްރިލް މަހަށްފަހު ރާއްޖެއަށް މިއަހަރު އެންމެގިނައިން ފަތުރުވެރިން ރާއްޖެއަށް ޒިޔާރަތްކޮށްފައިވަނީ ،ހުސްވި އޮގަސްޓްމަހުކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.

ޓޫރިޒަމް މިނިސްޓްރީގެ ތަފާސްހިސާބަށް ބަލާއިރު، މިއަހަރުގެ މިހާތަނަށް އެންމެގިނައިން ފަތުރުވެރިން ޒިޔާރަތްކޮށްފައިވަނީ، ފެބުރުއަރީ މަހާއި ޖެނުއަރީމަހުގެ އިތުރުން އޮގަސްޓްމަހުގައެވެ. ހުސްވި އޮަގަސްޓްމަހު ރާއްޖެއަށް 192,058 ފަތުރުވެރިން ޒިޔާރަތްކޮށްފައިވާއިރު، މިއީ މިދިޔަ އަހަރުގެ އޮގަސްޓްމަހާ އަޅާބަލާއިރު، 9 އިންސައްތަ އިތުރު އަދަދެކެވެ. މިދިޔަ އަހަރުގެ އޮގަސްޓްމަހު ރާއްޖެއަށް ޒިޔާރަތްކޮށްފައިވަނީ، 176,175 ފަތުރުވެރިންނެވެ.

ޓޫރިޒަމް މިނިސްޓްރީގެ ތަފާސްހިސާބުތަކަށް ބަލާއިރު، ހުސްވި އޮަގަސްޓްމަހުގެ ނިޔަލަށް ރާއްޖެއަށް 1,486,926 ފަތުރުވެރިން ވަނީ ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު، 9.4 އިންސައްތަ އިތުރުވުމެކެވެ. މިދިޔަ އަހަރުގެ މި މުއްދަތުގެ ތެރޭގައި ރާއްޖެއަށް ޒިޔާރަތްކޮށްފައިވަނީ، 1,359,232 ފަތުރުވެރިންނެވެ. ތަފާސްހިސާބުތަކުން ދައްކާގޮތުން މިހާރު ރާއްޖެއަށް ޖުމްލަކޮށް ކޮންމެ ދުވަހަކު 6119 ފަތުރުވެރިން ޒިޔާރަތްކުރާއިރު، މި ފަހަކަށް އައިސް މި އަދަދު ވަނީ ނިސްބަތުން ދަށަށްދާން ފަށާފައެވެ.

އަހަރުގެ މިހާތަނަށް އެންމެގިނައިން ފަތުރުވެރިން ޒިޔާރަތްކުރި ޤައުމުތައް:

- ޗައިނާ: 235,245

- ރަޝިއާ: 177,581

- އިނގިރޭސިވިލާތް: 134,114

- އިޓަލީ: 106,230

- ޖަރުމަނުވިލާތް: 102,496

- އިންޑިއާ: 85,045

ތަފާސްހިސާބުތަކުން ދައްކާގޮތުގައި މިދިޔަ އަހަރާ އަޅާބަލާއިރު މި ހުރިހާ ޤައުމަކުން މިއަހަރު ރާއްޖެއަށް ޒިޔާރަތްކުރި ފަތުރުވެރިންގެ އަދަދު ވަނީ އިތުރުވެފައެވެ. އަދި ޓޫރިޒަމްގެ އައު މާކެޓްތައް ކަމަށްވާ އޮސްޓްރޭލިއާ، އެމެރިކާ ފަދަ ޤައުމުތަކުން ޒިޔާރަތްކުރި ފަތުރުވެރިންގެ އަދަދުވެސް ވަނީ ވަރަށްބޮޑަށް އިތުރުވެފައެވެ.

ސަރުކާރުގެ އަމާޒު ހިފާފައިވަނީ މިއަހަރު ނިމުމުގެ ކުރިން 2.3 މިލިޔަން ފަތުރުވެރިން ރާއްޖެ ގެނައުމަށެވެ. ވީއައިއޭގެ އައު ޓާމިނަލް ހުޅުވުމުގެ މަސައްކަތްތައް ކުރިއަށްދާއިރު، ޖުލައި 26 ގައި ޓާމިނަލް ހުޅުވިގެންދިއުމާއެކު ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވެގެން ދާނޭކަމަށް ސަރުކާރުން ބުނެއެވެ.