އަލްހާން ފަހުމީގެ ކެމްޕެއިން ވަރަށް ތަފާތު!

މިއަހަރުގެ އެޕްރީލްމަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބަށް އެކި ފަރާތްތަކުން ދަނީ ތައްޔާރުވަމުންނެވެ. ކެމްޕެއިންގެ ހަރަކާތްތައް ރާއްޖޭގެ އެކި ކަންކޮޅުތަކުގައި ހިންގާ، އާންމުންގެ ވޯޓު ހޯދުމަށް ކެނޑިޑޭޓުން ދަނީ ކެނޑިނޭޅި މަސައްކަތް ކުރަމުންނެވެ.

މާލޭސިޓީގެ ދާއިރާތައްވެސް މިފަހަރު އޮތީ މިފަދައިންނެވެ. ސިޔާސީ ޕާޓީތަކާއި އަމިއްލަ ކެނޑިޑޭޓުންެވެސް ވާދަވެރި ރޫހެއްގައި ކެމްޕެއިންކުރަމުންދާއިރު، މިގޮތަށް އެންމެ ފޯރިގަދަ އެއް ދާއިރާއަކަށްވެފައިވަނީ ހެންވޭރު އުތުރު ދާއިރާއެވެ. ރާއްޖޭގެ ސިޔާސީ މައިދާނުގައި ނަން ހިނގާފަދަ ގިނަ ބޭފުޅުން މި ދާއިރާއަށް ކުރިމަތިލައްވާ އިރު، އޭގެ ތެރެއިން އެއް ބޭފުޅަކަށް ވެގެންދާނީ އިތުރު ތަޢާރަފަކަށް ބޭނުންނުވާ، އަލްހާން ފަހުމީއެވެ.

އަލްހާންގެ ކެމްޕެއިންގެ ތެރެއިން ތަފާތު އެތަކެއް ހަރަކާތްތަކެއް ފެނިގެން ގޮސްފައިވާއިރު، މީގެ ތެރެއަށް މިރޭ މިވަނީ އެއްބޮޅު އިތުރުވެފައެވެ. އަލްހާން ފަހުމީ ވަނީ ސިޔާސީ ފިކުރަށް ބެލުމެއް ނެތި އެބޭފުޅާގެ މުޅި ރާއްޖެއަށް ހުޅުވާލައިގެން ރާޒުވާ މުބާރާތެއް އިފްތިތާހުކުރައްވާފައެވެ.

މިއަދުން ފެށިގެން މިމަހުގެ 16ވަނަ ދުވަހުގެ ނިޔަލަށް ބާއްވާ މި މުބާރާތުގައި ގިނަ އަދަދެއްގެ ފަރާތްތަކުން ބައިވެރިވާކަމަށް މި މުބާރާތް އިންތިޒާމުކުރާ އަލްހާން ފަހުމީގެ ކެމްޕެއިން ޓީމްގެ ފަރާތުން މައުލޫމާތުދެއެވެ.

އަލްހާން ފަހުމީގެ ކެމްޕެއިން ޖަގަހައިގައި ކުރިއަށްގެންދާ މި މުބާރާތުގައި މޮޅުވާ ފަރާތްތަކަށް ފައިސާގެ އިނާމު ދޭގޮތަށްވެސް ވަނީ ހަމަޖެހިފައެވެ. އެގޮތުން އެއްވަނައަށްދާ ފަރާތަކަށް 15،000ރުފިޔާ، 2ވަނައަށްދާ ފަރާތަކަށް 10،000ރުފިޔާ އަދި 3 ވަނައަށްދާ ފަރާތަކަށް 5000 ރުފިޔާ ދިނުމަށް ވަނީ ހަަމަޖެހިފައެވެ.

މި މުބާރާތުގެ އިންްތިޒާމީ ކޮމެޓީން ވޮއިސްއަށް މައުލޫމާތުދިންގޮތުގައި އަލްހާންގެ ވިސްނުންފުޅު ހުންނެވީ ކެމްޕެއިން ހަރަކާތްތަކަކީ ރަނގަޅު ނިޔަތެއްގައި ކުރެވޭ ކަންކަމަށް ހެއްދެވުމެވެ. އެގޮތުން ރާޒުވާ އަކީ ސިކުނޑި ތަނަވަސްކޮށްދީ، ހެޔޮ ނިންމުންތައް ނިންމުމަށް ދަސްކޮށްދޭ ކުޅިވަރެއްކަމުން ރާޒުވާ މުބާރާތެއް ބޭއްވުމަށް ނިންމީކަމަށް އެ ފަރާތުން ބުންޏެވެ.

އަަލްހާން ފަހުމީގެ ކެމްޕެއިން ހަރަކާތްތަކުގެ ތެރޭގައި މި ރާޒުވާ މުބާރާތުގެ އިތުރުން ފުޓްސަލް މުބާރާތެއް ބޭއްވުމަށްވެސް ވަނީ ހަމަޖެހިފައެވެ. ތަފާތު ކަންކަމުން ނޫސްތަކުގެ ފަލަ ސުރުޚީ ހޯއްދަވާ އަލްހާން، މިފަހަރު ޖާގަ ހޯއްދެއްވީ މޮޅު ރާޒުވާ މުބާރާތަކުންނެވެ.