ގެވަޅު މައްސަލާގައި ފުލުހުން ވަނީ ވަރަށްބޮޑަށް ސިޔާސީވެފައި: އަކްރަމް

ބިންވެރިޔާ ސްކީމުން އުސޫލާ ހިލާފަށް ގޯތިދިން މައްސަލަ ބެލުމުގައި ފުލުހުން ވަރަށްބޮޑަށް ސިޔާސީވެފައިވާކަމަށް، މިދިޔަ ސަރުކާރުގެ ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވެއްޖެއެވެ.

އެޗްޑީސީގެ ތެރެއިން އުސޫލާ ހިލާފަށް އެތަނުގެ އެމްޑީ ފަޒުލް ރަޝީދުގެ ބޭބެއަށް ބިންވެރިޔާ ސްކީމުގެ ދަށުން ގެވަޅެއް ދޫކުރި މައްސަލާގައި ފުލުހުން މިހާރު ބަލަމުންދާ މައްސަލައާ ގުޅޭގޮތުން އަކްރަމް ކަމާލުއްދީން ވިދާޅުވީ، މިކަމުގައި ފުލުހުން އަމަލުކުރަމުންދަނީ ވަކިގޮތަކަށް ވަކި އަތަކަށް ބުރަވެކަމަށެވެ. މި މައްސަލާގައި ފުލުހުން އެންމެފަހުން ބޭއްވީ އެއްވެސް މާނައެއްނެތް ނެތް ސިޔާސީ ނޫސްވެރިުންގެ ބައްދަލުވުމެއްކަން ފާހަގަކުރައްވަމުން އަކްރަމް ވިދާޅުވީ، ފުލުހުން ބޭއްވި ނޫސްވެރިންގެ އެ ބައްދަލުވުމަކީ މި ހިނގާދިޔަ ކައްތައްތަ ފޮރުވުމަށް ސަރުކާރުގެ އެޖެންޑާގެ ތެރެއިން ކުރި ކަމެއްކަމަށެވެ.

އަކްރަމް ވިދާޅުވީ އެބުނާ ލިޔުމެއްގެ ސައްހަކަން ކަށަވަރުކުރުމަށް ފުލުހުންގެ ފަރާތުން ފޮރެންސިކު އެއްވެސް ތަހުގީގެއް ކޮށްފައިނުވާއިރު، ކުރީ ސަރުކާރުގެ ލިޔުމެއްކަމަށް ދޭހަވާގޮތަށް އެ ލިޔުމުގެ ވާހަކަ ދެއްކުމަކީ ސީދާ ރައްޔިތުންނަށް ހަގީގަތް އޮޅުވާލަން އުޅުން ކަމަށެވެ.

ކުރީސަރުކާރުން ދިން ލިޔުމެކޭ މީހަކު ހަމަ ބުނާއިރަށް އެވާހަކަ ދައްކާކަށެއް ނުޖެހޭ. ތަހުގީގެއް ނުކުރައްވާ.. އަނެއްކާ މިކަމުގައި ތުހުމަތުވާ މީހާ އެ ގޯސް ރަޖިސްޓްރީއެއްކަމަށް ޝައްކުވެގެން މީހަކު ގެންނަނީ.. އެހެންވީމާ ހަމަ ކުރީ ސަރުކާރޭ ބުނާއިރަށް އެ ހާމަކުރާކަށް ނުޖެހޭ ފްރެންސިކް ނުހައްދަވައެއް.

އަކްރަމް ކަމާލުއްދީން ވިދާޅުވިއެވެ

އަކްރަމް ވިދާޅުވީ އޭނާ އާ ފަޒީލް ބައްދަލުކުރައްވާފައި ނުވާނޭކަމަށާއި، ބައްދަލުކޮށްފިނަމަ އެކަމުގެ ލިޔެކިޔުންތަކާ ޔައުމީއްޔާ ހައުސިން މިނިސްޓްރީގައި ހުންނާނޭ ކަމަށެވެ. އެހެންކަމުން މިކަމުގައި ފުލުހުން މިހާތަނަށް އަމަލުކޮށްފައިވަނީ ސިޔާސީ ވިސްނުމުގައި ވަކި ބަޔަކަށް މަންފާތަކެއް ހޯދައިދިނުމަށްކަމަށް އަކްރަމް ކަމާލުއްދީން ފާހަގަކުރެއްވިއެވެ.

މި މައްސަލައާ ގުޅޭގޮތުން މިއަދުވެސް އަކްރަމް ކަމާލުއްދީން ވިދާޅުވީ ބިންވެރިޔާ ސްކީމުން ގޯތި ދިނުމަށް ކުރީ ސަރުކާރުން އުސޫލާ ހިލާފަށް އެއްވެސް ކަމެއް ކުރިއަށްގެންގޮސްފައި ނުވާނޭ ކަމަށެވެ.