މިސްޓަ މޯލްޑިވްސް ޔާންބެގެ ޞިއްޙީ ޙާލަތު ނާޒުކު: އާންމުންގެ އެހީތެރިކަމަށް އެދި ގޮވާލައިފި

މިސްޓަ މޯލްޑިވްސް ޔާންބެގެ ދެ ކިޑްނީ ފެއިލްވެ ޞިއްޙީ ޙާލަތު ނާޒުކުވެފައިވާއިރު، އޭނާ އާންމުންގެ އެހީތެރިކަމަށް އެދި ގޮވާލައިފިއެވެ.

ރާއްޖޭގެ ނަން މަޝްހޫރު ބޮޑީބިލްޑަރު އަދި ހަތަރު ފަހަރު މިސްޓަ މޯލްޑިވްސްގެ މަޤާމު ހޯދާފައިވާ މުޙައްމަދު ޔާމީން (ޔާންބެ) ގެ ދެ ކިޑްނީ ފެއިލްވެފައިވާކަން ހާމަކޮށްފައިވަނީ އިއްޔެއެވެ. މި ނާޒުކު ޞިއްޙީ ޙާލަތާ ގުޅިގެން ޔާންބެ ވަނީ އޭނާގެ ފަރުވާއަށް އާންމުންގެ އެހީތެރިކަމަށް އެދި ގޮވާލާފައެވެ.

ޔާންބެ ބުނިގޮތުގައި އޭނާގެ ކިޑްނީ ބަލީގެ ޙާލަތު ހުރީ އެންމެ ފަހު މަރުޙަލާގައެވެ. މިކަން އެނގުނީ މީގެ މަހެއްހާ ދުވަސްކުރިން ކަމަށްވާއިރު، ޑޮކްޓަރުންގެ ލަފާގައި ވަނީ ކިޑްނީ ޓްރާންސްޕްލާންޓް ހެދުމަށެވެ.

"ޒުވާން ވީމާ ޑޮކްޓަރުން ބުނީ އެންމެ ރަނގަޅުވާނީ ޓްރާންސްޕްލާންޓް ހެދުމޭ. އެ ނޫނީ ދެން އޮންނާނީ ޑަޔަލިސިސް ހެދުން،"

ޔާންބެ ބުންޏެވެ.

މި ބަލީގެ ފަރުވާއަށް، ޚާއްޞަކޮށް ޓްރާންސްޕްލާންޓް ހެދުމަށް ބޮޑު އަދަދެއްގެ ފައިސާ ބޭނުންވާތީ، ޔާންބެގެ އުފަން ރަށް ށ. ފުނަދޫގެ ރައްޔިތުން ވަނީ ފަންޑް ރެއިޒިންގ ކެމްޕެއިނެއް ފަށާފައެވެ. ޔާންބެ ބުނީ ވަރަށް ބޮޑަށް ރައްޔިތުންގެ ކިބައިން އެހީތެރިކަމަށް އެދޭކަމަށެވެ.

"އަޅުގަނޑު އެދެން ވަރަށް ބޮޑަށް އާންމުންގެ އެހީތެރިކަމަށް"

ޔާންބެ

ޔާންބެ އަކީ ރާއްޖެ އާއި ރާއްޖޭން ބޭރުގައި ވެސް އެންމެ ކާމިޔާބު އެއް ދިވެހި ބޮޑީބިލްޑަރެވެ. އޭޝިއާގެ ބޮޑީބިލްޑިން އަދި ފިޒީކް ސްޕޯޓްސް ޗެމްޕިއަންޝިޕްގެ 85 ކިލޯގެ ކެޓަގަރީން ރަން މެޑަލް ހޯދުމުގެ އިތުރުން، 2022 ގައި ބޭއްވުނު ބޮޑީ ބިލްޑިން ވޯލްޑް ޗެމްޕިއަންޝިޕްގެ ސުޕަ 90 ކިލޯގެ ކެޓަގަރީން ލޯ މެޑަލް ހޯދާފައިވެއެވެ.

ޔާންބެގެ މި ޙާލަތާ ގުޅިގެން ގިނަ ބަޔަކު ވަނީ އެހީތެރިވުމަށް އިސްނަގާފައެވެ. ޔާންބެއަށް އަވަސް ޝިފާއަކަށް "ވޮއިސް"ގެޓީމުން އެދެމެވެ.