އަޅުގަނޑުމެން މަގުމައްޗަށް ނެރެ އެއްލާލީ: ގާސިމް

ވެރިކަން ލިބުމާއި އެކު ޖުމްހޫރީ ޕާޓީ މަގުމައްޗަށް ނެރެ އެއްލާލީކަމަށް އެޕާޓީގެ ލީޑަރ އަދި ރައްޔިތުންގެ މަޖިލީހުގެ ރައީސް، ގާސިމް އިބްރާހިމް ވިދާޅުވެއްޖެއެވެ.

ގާސިމް މިހެން ވިދާޅުވީ މިއަހަރުގެ ރައްޔިތުންގެ މަޖިލީހުގެ އިންތިޚާބުގައި ޖޭޕީގެ ފަރާތުން ޕްރޮގްރެސިވް ކޯލިޝަންގެ ފަރާތްތަކަށް ތާއިދުކުރާކަން ހާމަކުުރުމަށް ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުންނެވެ.

ގާސިމް ވިދާޅުވީ ވެރިކަން ލިބުމާއި އެކު ޖުމްހޫރީ ޕާޓީ އަނެއްކާވެސް މަގުމައްޗަށް ނެރެ އެއްލާލާފައިވާކަމަށެވެ. އަދި މަޖިލިސް ހިންގަމުންދަނީ ވައުދުވި ގޮތާއި އެއްގޮތަށް ނޫންކަމަށް ރައީސުލްޖުމްހޫރިއްޔާ ވިދާޅުވުމުން އެކަމާއި ހިތާމަކުރައްވާ ކަމަށްވެސް ގާސިމް ވިދާޅުވިއެވެ.

މީގެ އިތުރުން ގާސިމް ވަނީ ހަތަރު ލީޑަރުންގެ މެދުގައި ބާއްވަންޖެހޭ މަޝްވަރާ ބައްދަލުވުންތައްވެސް ބާއްވަމުން ނުދާކަން ފާހަގަކޮށްފައެވެ.

އަދި އެބޭފުޅާ މަސައްކަތް ކުރައްވަމުން ދަނީ ގާނޫނު އަސާސީގައި ބުނާގޮތަށްކަމަށްވެސް ގާސިމް މިރޭ ވަނީ ވިދާޅުވެފައެވެ.

މިރޭގެ ބައްދަލުވުމުގައި ޖޭޕީން ވަނީ މަޖިލިސް އިންތިހާބުގައި ވާދަކުރާ އިދިކޮޅު ޕްރޮގްރެސިވް ކޯލިޝަނުގެ 32 ކެންޑިޑޭޓުންނަށް ތާއިދު ކުރުމަށް ނިންމިކަން ރަސްމީކޮށް އިއުލާންކޮށްފައެވެ.