ރާއްޖެ އިން ބޭރަށް 10،000 ޑޮލަރަށް ވުރެ ގިނައިން ގެންދެވޭނީ ފައިސާ ހޯދީ ކިހިނެއްތޯ ބެލުމަށްފަހު: ވަޒީރު އިހުސާން

މީގެ ފަހުން ރާއްޖެ އިން ބޭރަށް ދާއިރު 10،000 ޑޮލަރަށްވުރެ ގިނައިން ގެންދެވޭނީ އެ މީހަކު އެ ފައިސާ ހޯދީ ކިހިނެއްތޯ ބެލުމަށްފަހުގައި ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހްސާން ވިދާޅުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ވަޒީރު އިހުސާން ވިދާޅުވީ، ރާއްޖެ އިން ބޭރަށް ނަގުދު ފައިސާ ބޭރުކުރުމުގައި ކަސްޓަމްސްގެ ކޭޝް ޑިކްލަރޭޝަން ގަވާއިދަށް އިސްލާހު ގެނެވިފައިވާ ކަމަށާއި، އޭގެ ތެރޭގައި 10،000 ޑޮލަރަށް ވުރެ މަތިން ރާއްޖެ އިން ބޭރަށް ފައިސާ ގެންދާ ނަމަ، އެ ފައިސާ ހޯދި ގޮތެއް ސާބިތުކޮށްދިނުން ހިމެނޭ ކަމަށެވެ.

ވަޒީރު އިހުސާން ވިދާޅުވީ، މީގެ ކުރިން 10،000 ޑޮލަރަށް ވުރެ މަތިން ހިފައިގެންދިޔަ ނަމަވެސް، ބައިނަލްއަގްވާމީ އިދާރާތަކުގައި މިކަމަށް މިންގަނޑުތަކެއް އޮންނަ ކަމަށާއި، އެއީ އެމީހާ ކޮންތާކުން ހޯދި ލާރިއެއްތޯ ބަލަން ޖެހޭ ކަމަށެވެ.

"ބޭރު މީހަކު ވިޔަސް ދިވެއްސަކު ވިޔަސް ރާއްޖެ އިން ބޭރަށް 10،000 ޑޮލަރަށް ވުރެ ގިނައިން ހިފައިގެންދާ ކަމަށްވާ ނަމަ، ރަނގަޅަށް ޑިކްލައިކޮށް ކޮންތާކުން ކިހިނެއް ހޯދި އެއްޗެއްތޯ ގާނޫނީ އިމުގެ ތެރެއިން ބަލާއިރު ހަމަޖެހޭ ވާހަކައެއްތޯ އެމީހަކު އެ ދައްކަނީ ބަލާފައި އެ ޑިކްލަރޭޝަން ނިމުނީމަ ނޫނީ އެ ފައިސާ އަޅުގަނޑުމެން ދުލެއް ނުކުރަން"

ވަޒީރު އިހުސާން ވިދާޅުވިއެވެ.

މަސައްކަތްތެރީންގެ ގޮތުގައި ރާއްޖެ އަށް އެތެރެވާ ބިދޭސީން ހަފުތާއަކު އެއް ފަހަރު ރާއްޖެ އިން ބޭރަށް ދާއިރު ލިބޭ އާމްދަނީއަށް ވުރެ ބޮޑު އަދަދެއް ގެންދާއިރު، ބައެއް ބިދޭސީން ލައްކައެއްހާ ޑޮލަރު ގެންދާކަން ފާހަގަކުރައްވާ ވަޒީރު އިހުސާން ވިދާޅުވީ، އަލަށް އެކުލަވާލީ އުސޫލުގެ ދަށުން ދިވެހިންނާއި ބިދޭސީންނަށް ވެސް 10،000 އަށްވުރެ ގިނަ ޑޮލަރު ބޭރަށް ގެންދާނަމަ އެއީ އެމީހަކަށް ކިހިނެއް ލިބުނު ފައިސާއެއްތޯ މީގެ ފަހުން ބުނެދޭން ޖެހޭނެ ކަމަށެވެ.