ފަތުރުވެރިކަމުގެ ސިނާއަތަށް 500 މިލިއަން ޑޮލަރުގެ ބޮޑު ގެއްލުމެއް

ރާއްޖެ އަންނަ ފަތުރުވެރިންގެ އަދަދު ދަށަށްގޮސް ޓޫރިޒަމް ސިނާއަތުގެ ވިޔަފާރިއަށް 500 މިލިއަން ޑޮލަރަށް ވުރެ ބޮޑު ގެއްލުމަކާ ކުރިމަތިލާން ޖެހިފައިވާކަމަށް ދިވެހި ޓްރެވަލް އޭޖެންޓުންގެ ޖަމިއްޔާ މަޓާޓޯ އަދި ގެސްޓްހައުސްތައް ހިއްސާވާ ޖަމިއްޔާ އެންއެޗްޖީއޭއެމް އިން ހާމަކޮށްފިއެވެ.

މަޓާޓޯ އަދި އެންއެޗްޖީއޭއެމްއިން ގުޅިގެން ނެރުނު ބަޔާނުގައި ބުނެފައިވަނީ، ފަތުރުވެރިން އަންނަ މިންވަރު ދަށްވެ ރާއްޖޭގެ ފަތުރުވެރިކަމުގެ ސިނާޢަތަށް ބޮޑެތި އިޤުތިޞާދީ ގެއްލުންތަކެއް ލިބެމުންދާކަމަށާއި، މިކަމުގެ ކަންބޮޑުވުން ނިހާޔަތަށް ކުރިމަތި ވެފައިވާކަމަށެވެ. މިހާރު ފެންނަ ބުކިން ޓްރެންޑްތަކާއި ކެންސަލޭޝަންތަކަށް ބަލާއިރު، 2026 ވަނަ އަހަރުގެ މާރިޗު މަހުން ފެށިގެން ފަތުރުވެރިކަމުގެ ސިނާޢަތަށް 500 މިލިއަން އެމެރިކާ ޑޮލަރަށް ވުރެ ބޮޑު ގެއްލުމެއް ލިބިފައިވާ ކަމަށް އަންދާޒާ ކުރެވޭކަމަށް ބަޔާނުގައި ބުންޏެވެ.

ރަސްމީ ތަފާސް ހިސާބުތައް ދައްކާ ގޮތުން މާރިޗު އަދި އެޕްރީލް މަހު ފަތުރުވެރިން އައި މިންވަރު ބޮޑުތަނުން ދަށްވެ، މެއި މަހާ ހަމައަށް ވެސް އެ ދަށްވުން ކުރިއަށް ގޮސްފައިވާ ކަމަށް ބަޔާނުގައި ބުނެފައިވެއެވެ. މި ހާލަތު ދެމިގެން ދިއުމަކީ ވިޔަފާރިތަކަށާއި ވަޒީފާތަކަށް، ބޭރު ފައިސާ ލިބުމަށް އަދި ޤައުމީ އިޤުތިޞާދުގެ ހަމަޖެހުމަށް ބޮޑު ނުރައްކަލެއްކަން ފާހަގަކުރަމުން ބަޔާނުގައި ބުނީ، މި ހާލަތުގެ އެންމެ ބޮޑު އަސަރެއް ކުރަމުންދަނީ ފަތުރުވެރިކަމުގެ ސިނާޢަތުގެ މައިބަދައިގެ ގޮތުގައި ހަރަކާތްތެރިވާ ކުދި އަދި މެދު ފަންތީގެ ވިޔަފާރިތަކާއި ގެސްޓްހައުސްތަކާއި ޓްރެވެލް އެޖެންޓުންނާއި ޓުއާ އޮޕަރޭޓަރުންނަށް ކަމަށެވެ. މި ކަމަށް ހައްލެއް ނުލިބިއްޖެ ނަމަ ގިނަ ގެސްޓްހައުސްތަކާއި ޓްރެވެލް އެޖެންސީތައް ވިޔަފާރި ހުއްޓާލަން ޖެހިދާނެ ކަމުގެ އިންޒާރު ވެސް އެ ދެ ޖަމިއްޔާ އިން ދީފައިވެއެވެ.

މަޓާޓޯ އާއި އެންއެޗްޖީއޭއެމް އިން ވަނީ ސަރުކާރާއި ކަމާ ބެހޭ އިދާރާތަކާއި މާލީ މުއައްސަސާތަކުގެ ސަމާލުކަމަށް މިކަން ގެނެސް ގިނަ ކަންތައްތަކެއް ހުށަހަޅާފައެވެ. އޭގެ ތެރޭގައި ގެސްޓްހައުސްތަކާއި ކުދި ވިޔަފާރިތަކަށް ޚާއްޞަ ލޯނު ސްކީމްތަކާއި އެމަޖެންސީ ފައިނޭންސިން ހަމަޖެއްސުމާއި، އިންޓަރެސްޓް ފްރީ މޮރަޓޯރިއަމް ދިނުމާއި ލޯނު ރީސްޓްރަކްޗާ ކުރުމާއި ޓެކްސް ފަސްކޮށްދިނުމާއި ފީ މާފުކޮށްދިނުން ހިމެނެއެވެ. މީގެ އިތުރުން އެއާޕޯޓް ތެލުގެ އަގު ބޮޑުވުމާއި ވިޔަފާރި ހިންގުމުގެ ޚަރަދުތައް އިތުރުވުމުގެ މައްސަލައަށް ވެސް އަވަސް ހައްލެއް ހޯދައިދިނުމަށް އެ ބަޔާނުގައި ވަނީ ގޮވާލާފައެވެ.

މީގެ އިތުރުން ކޮންސްޓްރަކްޝަން މެޓީރިއަލްގެ އަގު ކޮންޓްރޯލެއް ނެތި ބޮޑުވަމުން ދިއުމުގެ ސަބަބުން ފަތުރުވެރިކަމުގެ ތަރައްޤީގެ މަޝްރޫޢުތަކަށް ބޮޑެތި ގެއްލުންތައް ލިބެމުންދާކަންވެސް ވަނީ ބަޔާނުގައި ފާހަގަކޮށްފައެވެ.

ފާއިތުވި އެތައް ޒަމާނެއްގައި ރާއްޖޭގެ ފަތުރުވެރިކަމުގެ ސިނާޢަތުން ދުނިޔޭގެ އެކި ކާރިސާތަކުން އަރައިގަތުމުގެ ޤާބިލުކަން ދައްކާފައިވީ ނަމަވެސް، މިހާރުގެ ހާލަތުން އަރައިގަތުމަށް އަވަސް، ފިޔަވަޅުތަކެއް އެޅުން މުހިންމުކަމަށްވެސް ބަޔާނުގައި ވަނީ ފާހަގަކޮށްފައެވެ. އެގޮތުން ވިޔަފާރިތައް ހިމާޔަތްކޮށް ވަޒީފާތައް ރައްކާތެރިކުރުމަށް ސަރުކާރާއި މާލީ މުއައްސަސާތަކާ ގުޅިގެން މަސައްކަތް ކުރުމުގައި ދެމިތިބޭނެ ކަމުގެ ޔަޤީންކަން މަޓާޓޯ އަދި ގެސްޓްހައުސް އެސޯސިއޭޝަނުން ވަނީ ދީފައެވެ.