ދެ އިންތިހާބު އެއްކޮށްލުމަށް ނަގާ ވޯޓު ހުއްޓުވަން އެމްޑީޕީން ކޯޓަށް

ރިޔާސީ އިންތިހާބާއި، ރައްޔިތުން މަޖިލީހުގެ އިންތިހާބު އެއްކޮށްލުމަށް ނަގާ ފެންނަ ނުފެންނަ ވޯޓު ނެގުން ހުއްޓުވަން އިދިކޮޅު އެމްޑީޕީން ސިވިލްކޯޓަށް ހުށަހަޅައިފިއެވެ.

ދެ އިންތިހާބު އެއްކޮށްލުމަށް ނަގާ ވޯޓު ޤާނޫނާ ހިލާފްކަމަށް ބުނެ އެމްޑީޕީން މި މައްސަލަ މިއަދު ސިވިލްކޯޓަށް ހުށަހަޅާފައިވާއިރު، އެޕާޓީން ވަނީ ފެންނަ ނުފެންނަ ވޯޓު ނެގުން ހުއްޓުވުމުގެ ވަގުތީ އަމުރެއް ނެރެދިނުމަށް އެދިފައެވެ. އެމްޑީޕީން ކޯޓަށް ހުށަހެޅި މި މައްސަލާގައި ބުނެފައިވަނީ، ދެ އިންތިހާބު އެއްކޮށްލުމާ ގުޅޭގޮތުން ރައީސުލްޖުމްހޫރިއްޔާ ނެރެފައިވާ ގަރާރު ގާނޫނާ ހިލާފްކަމަށެވެ.

ފެންނަ ނުފެންނަ ވޯޓު ނެގުން ހުއްޓުވައިދިނުމުގެ އަމުރު ނެރެދިނުމަށް އެދި ކޯޓަށް ހުށަހެޅި ބަޔާނުގައި އެމްޑީޕީން ވަނީ މައިގަނޑު 6 ނުކުތާއެއް ފާހަގަކޮށްފައެވެ. އޭގެ ތެރޭގައި ޤާނޫނުގެ 26 ވަނަ މާއްދާއިން ލިބިދޭ ކެމްޕެއިން ކުރުމުގެ ހައްޤު ހަނިވުމާއި، ވޯޓު ދިނުމުގެ ހައްޤަށް އުނިކަން އަންނަކަން ވަނީ ފާހަގަކޮށްފައެވެ.

ދެ އިންތިހާބު އެއްކޮށްލުމަށް ނަގާ ފެންނަ ނުފެންނަ ވޯޓު ހުއްޓުވުމުގެ އަމުރަކަށް އެމްޑީޕީން އެދިފައިވާއިރު، އެޕާޓީގެ ޤައުމީ މަޖިލީހުން މިދިޔަ ހަފްތާގައި ވަނީ ވޯޓު ހުއްޓުވުމަށް މަސައްކަތް ކުރަން ފާސްކޮށްފައެވެ.

ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެކުގައި ބޭއްވުމަށާއި، ރައްޔިތުންގެ މަޖިލީހުގެ އުމުރު ގުނުމުގެ އުސޫލު ބަޔާންކުރުމަށްޓަކައި، ރައްޔިތުންގެ މަޖިލީހުން ފާސްކުރައްވައިފައިވާ ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީއަށް 8 ވަނަ އިސްލާހު ގެނައުމުގެ ބިލް ތަސްދީގު ކުރެއްވުމުގެ ކުރިން، ރައްޔިތުންގެ ހިޔާލު ހޯދުމުގެ އާންމު ވޯޓެއް ނެންގެވުމަށް ރައީސުލްޖުމްހޫރިއްޔާގެ ގަރާރަކުން ނިންމެވިކަން ހާމަކުރައްވާފައިވަނީ، މިމަހުގެ 16 ވަނަ ދުވަހުއެވެ.

ރައީސުލްޖުމްހޫރިއްޔާގެ ޤަރާރުގައި ރައްޔިތުންގެ ޚިޔާލު ހޯދުމުގެ ޢާންމު ވޯޓު ނެގުމަށް ކަނޑައަޅައިފައިވާ ތާރީޚަކީ ކުރިޔަށް އޮތް "ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު 2026" ބޭއްވުމަށް އިލެކްޝަންސް ކޮމިޝަނުން އިޢުލާނު ކޮށްފައިވާ 2026 އެޕްރީލް 4 ވާ ހޮނިހިރު ދުވަހެވެ.