ތިން ޒުވާނަކު ނިޔާވުން؛ އާއިލާއާ ރަހްމަތްތެރީންނާއި ކުންފުނިތަކަށް ފުން ހިތާމައެއް

މިދިޔަ 48 ގަޑިއިރުތެރޭ ތިން ޒުވާނަކު ނިޔާވެ އާއިލާތަކާ ރަހްމަތްތެރީންނާއި އެ ޒުވާނުން ވަޒީފާ އަދާކުރަމުން އައި ކުންފުނިތަކުގެ މުވައްޒިފުންނަށް ފުން ހިތާމައެއް ލިބިއްޖެ އެވެ.

ޒުވާން އުމުރުގައިވާ ނިޔާވާ މީހުންގެ އަދަދު ރާއްޖޭގައިވެސް ދަނީ އިތުރުވަމުންނެވެ. ބައެއް މީހުން އެކި ބަލިބަލީގަ އެވެ. އަނެއް ބަޔަކު ކުއްލި ގޮތަކަށެވެ.

އަޅުގަނޑުމެން ފަދަ ކުޑަކުޑަ މުޖްތަމައެއްގައި ކައިރިކައިރީ ގިނަ ޒުވާނުންތަކެއް ނިޔާވުމަކީ މުޅި މުޖްތަމައުއަށް ލިބޭ ބޮޑު ހިތާމަ އެކެވެ. މިދިޔަ ދެ ތީން ދުވަސްތެރޭ ނިޔާވެފައި ވަނީ ހުސައިން ހުޝާމް (ކުޑަބަރޯ) އާއި އުމުރުން 24 އަހަރުގެ އަހްމަދު ޝާޛިން އާއި 27 އަހަރުގެ އިބްރާހިމް އަމީން ހަސަން ދީދީ އެވެ.

ވަރަށް ހިތްވަރުގަދަ ހުޝާމް އަކީ ތެލެސީމިއާ ޒުވާނެކެވެ. މީހުންނާއި ވަރަށް ގުޅޭ ހިތްހެޔޮ އަދި ކަންކަމުގައި އިސްނަގާ އުޅުނު ޒުވާނުންގެ ލީޑަރެކެވެ. ހުޝާމް ނިޔާވުމަކީ ތެލެސީމިއާ އާައިލާ އެކުވެރީންނަށް ލިބުނު ފުން ހިތާމަ އެކެވެ.

ޝާޛިން އަކީ އެމްއޭސީއެލްގެ މުވައްޒިފެކެވެ. ޝާޛިން ނިޔާވުމާއި ގުޅިގެން އެ ކުންފުނިން ވަނީ ހިތާމަފާޅުކޮށް އާއިލާއަށް ތައުޒިޔާ ކިޔާފަ އެވެ. ޝާޛިން އަކީ އައިޖީއެމްއެޗްގެ ފައިނޭންސް ޑިޕާޓްމަންޓްގެ ޗީފް ކޭޝިއާ އަހްމަދު ޝަފީގުގެ ދަރިފުޅެވެ، މި ހިތާމަވެރި ވަގުތު އެ ހޮސްޕިޓަލުން ވެސް ވަނީ ޝަފީގުއާ އާއިލާއަށް ތައުޒިޔާ ކިޔާފަ އެވެ.

އިބްރާހިމް އަމީން ނިޔާވީ މިއަދު ހެނދުނު އެވެ. މިއީ އައްޑޫ ސިޓީ ވެމްކޯ މުވައްޒިފެކެވެ. އަމީން ނިޔާވުމާއި ގުޅިގެން އެ ކުންފުނިން ވަނީ އާއިލާއަށް ތައުޒިޔާ ކިޔާފަ އެވެ.

އަމީން، އައްޑޫ އިކުއަޓޯރިއަލް ހޮސްޕިޓަލަށް ގެނައީ މިއަދު ހެނދު 6:00 ގަ އެވެ. އޭރު ވަނީ ނިޔާވެފަ އެވެ. އެ ހާދިސާއާ ގުޅިގެން ބަލަން ޖެހޭ ކަންތައްތަކެއް ހުރުމުން ފުލުހުން ދަނީ އެކަން ބަލަމުންނެވެ. ނަމަވެސް އޭގެ ތަފްސީލެއް ފުލުހުން ނުދެ އެވެ.

ކީރިތިﷲ, މި ޒުވާނުންގެ ފާފަތައް ފުއްސަވާ ހެޔޮ ރަހްމަތުގައި ލައްވާށިއެވެ. އާމީން