ޕޯސްޓްމޯޓަމް ހަދަން އާއިލާގެ ހުއްދަ ނުލިބުމުން، ޖަލުގައި މަރުވި ޖަމީލްގެ ހަށިގަނޑު ވަޅުލައިފި

މާފުށީ ޖަލުގައި ޝަރީޢަތް ނިމެންދެން ބަންދުކޮށްފައި ހުއްޓާ ނިޔާވި މުޙައްމަދު ޖަމީލް ގެ ހަށިގަނޑުގެ ޕޯސްޓްމޯޓަމް ހަދަން އާއިލާއިން ހުއްދަ ނުލިބުމުން، ޖަމީލްގެ ހަށިގަނޑު ވަޅުލައިފިއެވެ.

ޖަމީލްގެ ހަށިގަނޑު ވަޅުލައިފައިވަނީ މިއަދު ފަތިސް ނަމާދަށް ފަހުގައެވެ.

ނުރައްކާތެރި އަދި ތޫނު ހަތިޔާރު ބޭނުންކޮށްގެން މާރާމާރީ ހިންގުމުގެ މައްސަލައެއްގައި ބަންދުކޮށްފައި ހުރި ޖަމީލު ގޮޅިން ބޭރަށް ނުނިކުމެ، ހަރަކާތް ނުކޮތް ގިނައިރު އޮތްކަން ފާހަގަ ކުރެވިގެން މާފުށީ ޖަލުގެ މެޑިކަލް ސެންޓަރަށް ގެންގޮސް ސީޕީއާރް ދީފައިވާ ކަމަށް ކަރެކްޝަނުން ވަނީ ބުނެފައެވެ.

ނަމަވެސް، ހާލަތަށް އެއްވެސް ބަދަލެއް ނައުމާ ގުޅިގެން، 12:13 ހާއިރު މާފުށީ ސިއްޙީ މަރުކަޒަށް ގެންގޮސް އޭނާއަށް ފަރުވާ ދޭން ފެށި ކަމަށާ، 12:45 ގައި ޑޮކްޓަރު ވަނީ މުޙައްމަދު ޖަމީލްގެ ހިތް ހުއްޓިގެން ނިޔާވިކަމަށް ކަނޑައަޅާފައިވާ ކަމަށް ކަރެކްޝަންސް އިން މައުލޫމާތު ދީފައިވެއެވެ.

ކަރެކްޝަނުން ބުނީ، ޖަމީލް ނިޔާވުމާ ގުޅިގެން ވަގުތުން އެކަން އޭނާގެ ޢާއިލާއަށާއި އިންސްޕެކްޓަރ އޮފް ކަރެކްޝަނަލް ސަރވިސްއަށާއި މޯލްޑިވްސް ޕޮލިސް ސަރވިސްއަށާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސްއަށާއި ނެޝަނަލް އިންޓެގްރިޓީ ކޮމިޝަން އަށް އަންގާފައިވާނެ ކަމަށެވެ.

މިކަމާއި ގުޅިގެން ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިޙްސާން ވިދާޅުވީ، ޖަމީލު ބަންދުކޮށްފައި ހުރި ގޮޅީގެ ސީސީޓީވީ ފުޓޭޖުން ފެންނަ ގޮތުގައި އެންމެ ފަހު ވަގުތު އޭނާ ހުރީ ނަމާދަށް ކަމަށާއި،  މަރުވެފައި އޮއްވައި ފެނުނީ ސަޖިދައިގައި އޮއްވައިކަމަށެވެ.

ޖަލުގައި ހިނގާ މަރުތަކުގެ މިނިވަން ތަހުގީގެއް ހިންގަނީ އިންސްޕެކްޓާ އޮފް ކަރެކްޝަނަލް ސާވިސް އިން ކަން ފާހަގަކުރައްވަމުން ވަޒީރު އިހުސާން ވިދާޅުވީ، އެފަދަ މަރަކާއިމެދު ޝައްކުވާ ކަމެއް އޮތްނަމަ އެކަން ހިއުމަން ރައިޓްސް ކޮމިޝަން (އެޗްއާރްސީއެމް)އިން ތަހުގީގުކުރާނެ ކަމަށެވެ.