ޑައިވަރުން މަރުވި ހާދިސާއާ ގުޅޭގޮތުން ޑޭންގެ ފުރަތަމަ ރިޕޯޓް

ވ. އަތޮޅުގައި ޑައިވިނަށް ގޮސް އުޅެނިކޮށް ގެއްލުނު އިޓަލީގެ ހަތަރު ފަތުރުވެރިން ހޯދުމަށް ކުރިއަށްގެންދިޔަ ޚާއްޞަ އޮޕަރޭޝަނާ ގުޅޭގޮތުން އެ މަސައްކަތުގައި ހަރަކާތްތެރިވި ލީޑް ޓީމް، ފިންލޭންޑްގެ  ޑައިވާސް އެލާޓް ނެޓްވޯކް، ޑޭން ގެ ފުރަތަމަ ރިޕޯޓް ޝާއިއުކޮށްފިއެވެ.

މި އޮޕަރޭޝަން ކުރިއަށް ގެންގޮސްފައިވަނީ، ބައިނަލްއަގުވާމީ ފެންވަރުގެ އޮޕަރޭޝަނެއްގެ  މިމަހުގެ 18 ވަނަ ދުވަހުން ފެށިގެން 21 ވަނަ ދުވަހުގެ ނިޔަލަށެވެ. މި ހާއްސަ އޮޕަރޭޝަނުގައި ބައިވެރިވެފައިވަނީ ދިވެހިރާއްޖޭގެ ގައުމީ ދިފާއީ ބާރު، އެމްއެންޑީއެފާއި، މޯލްޑިވްސް ޕޮލިސް ސާވިސް، ޑައިވާސް އެލާޓް ނެޓްވޯކް، ޑޭން ޔޫރަޕް، އަލިމަތާ، ވޯޓަރ ސޮލިއުޝަންސް ޕްރައިވެޓް ލިމިޓެޑް، ފޯސައިޓް ސާވެޔާސް ޕްރައިވެޓް ލިމިޓެޑް، ފިންލޭންޑްގެ ޓެކްނިކަލް ޑައިވިންގ ޓީމްގެ އިތުރުން އިޓަލީ އަދި ރާއްޖޭގެ ހާރިޖީ ވުޒާރާއެވެ.

އޮޕަރޭޝަނާ ބެހޭ ގޮތުން ޑޭނުން ނެރެފައިވާ ރިޕޯޓްގައި ބުނެފައިވަނީ، އޮޕަރޭޝަންގެ ފުރަތަމަ ދުވަހު، ހޮހަޅަ ބަލައި ފާސްކޮށް ގެއްލުނު ޑައިވަރުން ތިބި ތަންތަން ދެނެގަނެ އެ މަސައްކަތް ކާމިޔާބުކަމާއެކު ނިންމާލެވުނު ކަމަށެވެ.

އޮޕަރޭޝަނުގެ ދެވަނަ ދުވަހު މޫސުމީ ގޮތުންނާއި އޮޕަރޭޝަން ކުރިއަށްގެންދިއުމަށް ހުރި ގިންޖެހުންތަކާއެކުވެސް ގެއްލުނު މީހުންގެ ހަށިތައް ނެގުމުގެ މަސައްކަތް ކުރެވިފައިވާކަމަށް ރިޕޯޓްގައި ބުންޏެވެ. މީގެ އިތުރުން ތިންވަނަ ދުވަހު އޮޕަރޭޝަނާއި ގުޅޭ އިތުރު ކަންކަން ކުރެވުނުކަމަށް ވަނީ ފާހަގަކޮށްފައެވެ.

ރިޕޯޓްގައި ބުނީ އެ ހޮހަޅައަކީ އިރުގެ އަލިކަން ނުވާ އަދި އެތަނުގައި އޮއިވަރު ބަދަލުވާގޮތުން ވެއްޔާއެކުވެ ފެންގަނޑުގެ ކުލަ ބަދަލުވެ، ތަނުގެ ސާފްކަން ކޮންމެފަދަ ވަގުތަކުވެސް ގެއްލިދާ ތަނެއްކަމަށެވެ. މީހުން ހޯދުމަށް ހިންގި އޮޕަރޭޝަންގައި، ޑައިވް ޓީމަށް ހޮހަޅައިން އިތުރު ހަނި މަގެއް ފެނިފައިވާއިރު، މި މަގު އޮންނަނީ އެތަނަށް ވަންނަން އޮންނަ މައި މަގުގެ އެއްފަރާތުގައިކަމަށާއި، މި ބުނެވުނު އައު މަގުގެ ތެރެއަށް ފީނައިގެން ކުރި މަސައްކަތުން، ގެއްލިގެން ހޯދަމުންދިޔަ ހަތަރު ޑައިވަރުންވެސް ފެނިފައިވަނީ އެއް ސަރަޙައްދަކުންކަން ވަނީ ފާހަގަކޮށްފައެވެ.

ޑައިވަރުން ހޮހަޅާގައި ތާށިވެފައިވަނީ ޑައިވަރުންނަށް ހޮހަޅައިގެ ތެރޭގައި ދާނެ ވަކި ދިމާއެއް އޮޅި، ބޭރަށް ނިކުންނަން އޮތް މަގު ނުފެނުމުންކަމަށް ބެލެވޭކަމަށް ރިޕޯޓްގައި ވަނީ ފާހަގަކޮށްފައެވެ. މި ހާދިސާ ހިނގަން މެދުވެރިވި ސަބަބުތަކާއި ހާލަތްތައް އިތުރަށް ދެނެގަންނާނީ ފުލުހުންނާއި ކަމާބެހޭ ތަޙުޤީޤީ އިދާރާތަކުން ކުރާ ތަހުގީގުތަކަށްފަހު ކަމަށާއި، އެހެންކަމުން، މި ހާދިސާގައި މަރުވި ފަރާތްތަކާއި އެފަރާތްތަކުގެ ޢާއިލާތަކަށް އިޙުތިރާމް ކުރުމުގެ ގޮތުން، ކަށަވަރުނުވާ މަޢުލޫމާތާއި ހީތަކުގެ މައްޗަށް ބިނާކޮށް ވާހަކަ ނުފެތުރުމަށް އާންމުންނާއި މީޑިއާތަކަށް ޑޭނުން ވަނީ އިލްތިމާސްކޮށްފައެވެ.

ރިޕޯޓްގައި ވަނީ ކަމާބެހޭ ފަރާތްތަކުގެ ހުއްދަ ނެތި، އަދި ހޮހަޅަތަކަށް ފީނުމުގެ ޚާއްޞަ ތަމްރީނާއި ބޭނުންވާ ފަންނީ ވަޞީލަތްތައް ނެތި މިފަދަ ހޮހަޅަތަކަށް ނުވަނުމަށް ހަރުކަށިކޮށް އިލްތިމާސްކޮށްފައެވެ. އަދި ހޮހަޅަތަކަށް ފީނުމަކީ އޭގެ ޒާތުގައި ނުރައްކާތެރި ކަމަކަށްވާތީ، މިއީ ހަމައެކަނި އެކަމުގެ ފުރިހަމަ ތަމްރީނާއި ވަޞީލަތްތައް ހުރި ފަރާތްތަކުން ކުރަންޖެހޭކަމެއްކަމަށްވެސް ޑޭނުގެ މި ރިޕޯޓްގައި ވަނީ ފާހަގަކޮށްފައެވެ.

ވ. އަތޮޅުގައި ޑައިވިނަށް ގޮސް އުޅެނިކޮށް ގެއްލުނު އިޓަލީގެ ހަތަރު ފަތުރުވެރިން ހޯދުމަށް އެންމެފުރަތަމަ އެމްއެންޑިއެފުން ކުރިއަށްގެންދިޔަ ރެސްކިއު އޮޕަރޭޝަނުގައި ކުޅަދާނަ ޑައިވަރު އެމްއެންޑީއެފްގެ ސާޖަންޓް ފަސްޓް ކްލާސް މުޙައްމަދު މަހުދީ ވަނީ ނިޔާވެފައެވެ.