އަޅުގަނޑު އިންޑިޔާއަށް ކުޑައިމީސް ކުރި ކަމަށް ބުނެ ދައުރު ކުރަނީ ފޭކް ޓުވީޓެއް: ފާތިމަތު

މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ މެނޭޖިން ޑިރެކްޓަރު ފާތިމަތު ތައުފީގު އިންޑިޔާއަށް ކުޑައިމީސް ކޮށް ކުރައްވާފައިވާ ޓުވީޓެއް ކަމަށް ބުނެ ދައުރު ކުރަނީ ފޭކު ޓުވީޓެއް ކަމަށް ވިދާޅުވެއްޖެއެވެ.

ސަރުކާރުގެ ޑެޕިއުޓީ މިނިސްޓަރުންތަކެއް އިންޑިއާގެ ބޮޑުވަޒީރު ނަރެންދުރަ މޯދީއަށް ކުޑައިމީސް ކުރި މައްސަލާގައި ދެގައުމުގެ މެދުގައި ނުތަނަވަސްކަން އުފެދި، އެގައުމުގެ ރައްޔިތުން މީސްމީޑިއާގައި ދިވެހިރާއްޖެ ބޯއިކޮޓް ކުރުމަށް ގޮވާލާ މި ދަނޑިވަޅުގައި ފާތިމަތު، އިންޑިއާއާ ދެކޮޅު ޕޯސްޓެއް ކުރެއްްވި ކަމަށްބުނެ އެފަދަ ޕޯސްޓެއްގެ ސްކްރީން ޝޮޓެއް ވަނީ އާއްމު ވެފައެވެ. އެ ޕޯސްޓް އޭނާ ކޮށްފައިވަނީ މިދިޔަ ސެޕްޓެމްބަރ މަހުގެ ތެރޭގައި ކަން ތާރީޚުން އެނގެއެވެ.

އެ ސްކްރީންޝޮޓް ހިއްސާ ކުރި ފަރާތުން ވަނީ، ދިވެހި ރާއްޖޭގެ ފަތުރުވެރިކަން ޕްރޮމޯޓް ކުރުމުގެ ޒިންމާ އޮންނަ އެމްއެމްޕީއާރުސީގެ މެނޭޖިންގ ޑިރެކްޓަރ އެފަދައިން ޕޯސްޓް ކުރި ކަމަށްބުނެ ވަރަށްބޮޑަށް ފާޑުވިދާޅުވެފައެވެ.

އެކަމާއި ގުޅިގެން، "ވޮއިސް" އަށް މަޢުލޫމާތު ދެއްވަމުން ފާތިމަތު ވިދާޅުވީ، އެއީ ފޭކު ސްކްރީން ޝޮޓެއް ކަމަށެވެ.

މިއީ ފޭކު ސްކްރީން ޝޮޓެއް. މިކަހަލަ އެއްވެސް ކޮމެންޓެއް އަޅުގަނޑު ކޮށްފައެއް ނޯންނާނެ. މިއީ އަޅުގަނޑު ބަދުނާމު ކުރުމަށް ފަތުރަމުންދާ ދޮގު ވާހަކަތަކެއް.

ފާތިމަތު ތައުފީގު

މިއާއެކު ފާތިމަތު ވިދާޅުވީ، ޑެޕިއުޓީ މިނިސްޓަރުން އިންޑިޔާގެ ބޮޑުވަޒީރު ނަރެންދުރަ މޯދީއަށް ކުޑައިމީސް ކުރި މައްސަލާގައި އޭނާ ހުންނަވާނީ، އެމައްސަލާގައި ސަރުކާރުން ނެންނެވި ސްޓޭންޑް މަތީގައި ކަމަށެވެ.

އަދި ދިވެހިރާއްޖޭގެ ފަތުރުވެރިކަން ޕްރޮމޯޓް ކޮށް ކުރިއެރުވުމުގައި އެކުވެރި ހުރިހާ ގައުމަކާއި އެކުވެސް ރަނގަޅު ގުޅުމެއް ދަމަހައްޓަވާނެ ކަމަށްވެސް އޭނާ ވިދާޅުވި އެވެ.

މީގެ އިތުރުން، އިންޑިޔާ އަކީ ފަތުވެރިކަމުގެ ބޮޑު މާކެޓެއް އޮންނަ ގައުމެއް ކަމަށާ، 2023 ވަނަ އަހަރު އެންމެ ގިނަ ފަތުވެރިން ރާއްޖެއަށް ޒިޔާރަތް ކުރީވެސް އިންޑިޔާއިން ކަން އޭނާ ފާހަގަކުރެއްވިއެވެ.

އިންޑިޔާއަށް ކުޑައިމީސް ކުރި މައްސަލާގައި ހިމެނޭ ޑެޕިއުޓީ މިނިސްޓަރުން ސަރުކާރުން ވަނީ ސަސްޕެންޑްކޮށްފަ އެވެ. އަދި އެ ފަރާތްތަކުގެ އެ ވާހަކައަކީ، ސަރުކާރުގެ ވިސްނުން ނޫން ކަމަށްވެސް ބުނެފައިވެއެވެ.