ސާފް ވިމެންސް ޗެމްޕިއަންޝިޕްގައި ވާދަކުރާ ރާއްޖޭގެ ޓީމް ގޯއާއަށް ފުރައިފި
ލިޔުންތެރިޔާ
އަބްދުﷲ ހުސައިން
ސާފް ވިމެންސް ޗެމްޕިއަންޝިޕްގައި ވާދަކުރާ ރާއްޖޭގެ ސީނިއާ ޤައުމީ ޓީމް ގޯއާއަށް މިއަދު ފުރައިފިއެވެ.
ސާފް ވިމެންސް ޗެމްޕިއަންޝިޕް ފެށުމަށް ހަމަޖެހިފައިވަނީ އަންނަ ހޯމަދުވަހު އިންޑިއާގެ ގޯއާގައެވެ. ރާއްޖޭގެ ޓީމް މިއަދު ގޯއާއަށް ދިއުމަށް ފުރާފައިވާއިރު، މި މުބާރާތަކީ މިހާތަނަށް ރާއްޖެއަށް އުނދަގޫވާނެ އެއް މުބާރާތަށް ވެގެންދާނޭކަމަށް ތަޖުރިބާކާރުން ވަނީ ފާހަގަކޮށްފައެވެ.
މިފަހަރު ރާއްޖެ ހިމެނޭ ގްރޫޕް ބީއަކީ މަރުގެ ގްރޫޕެވެ. މި ގްރޫޕްގައި ހިމެނެނީ ދިވެހިރާއްޖޭގެ އިތުރުން ބަންގްލަދޭޝް އާއި އިންޑިއާ އެވެ. ބަންގްލަދޭޝްއަކީ މިދިޔަ ފަހަރުގެ މުބާރާތުގެ ޗެމްޕިއަނުންނެވެ. އަދި އިންޑިއާއަކީ އަބަދުވެސް ރާއްޖެއަށް އެންމެބޮޑަށް އުނދަގޫކުރާ ޓީމެވެ. އިންޑިއާއިން ވަނީ މި މުބާރާތް ފަސް ފަހަރު ކާމިޔާބުކޮށްފައެވެ.
މިފަހަރުގެ މުބާރާތުގައި ހަ ޤައުމަކުން ވާދަކުރެއެވެ. ރާއްޖެ ހިމެނޭ ގްރޫޕްގެ އިތުރުން ދެން ވާދަކުރަނީ، ބޫޓާން، ނޭޕާލް އަދި އަވައްޓެރި ސްރީލަންކާއެވެ.
މިފަހަރުގެ މުބާރާތުން އެއްފަރާތްވި ޓީމަކީ ޕާކިސްތާނެވެ. އެޓީމް މުބާރާތައް ނުދާން ނިންމީ އިންޑިއާގައި މުބާރާތް ބާއްވާތީއެވެ. ޕާކިސްތާނު ސަރުކާރުން ވަނީ އެޤައުމުގެ ޓީމް އިންޑިއާއަށް ނުފޮނުވާނޭކަމަށް ބުނެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
