ރާއްޖެއިން އިސްރާއީލް ޕާސްޕޯޓް މަނާކުރި ވާހަކަ، އެންމެފަހުން އެޤައުމުގެ މީޑިއާތަކަށް!
ލިޔުންތެރިޔާ
އަބްދުﷲ ހުސައިން
ދިވެހިރާއްޖެއިން އިސްރާއީލް ޕާސްޕޯޓް މަނާކުރި ވާހަކަ، އެންމެފަހުން ޔަހޫދީންގެ މީޑިއާތަކަށް އަރަންފަށައިފިއެވެ.
ރައްޔިތުންގެ މަޖިލީހުގެ ތަޅުމުން މިއަދު ވަނީ، އިސްރާއީލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންގެންދާ ލާއިންސާނީ އަމަލުތައް ހުއްޓާލަންދެން އެޤައުމުގެ ޕާސްޕޯޓް މަނާކުރުމަށް ނިންމާފައެވެ. ރައްޔިތުންގެ މަޖިލީހުން އެގޮތަށް ނިންމުމާއެކު ރައީސުލްޖުމްހޫރިއްޔާ ވަނީ، ކުޑަ ވަގުތުކޮޅެއްގެ ތެރޭގައި އިސްރާއީލް ޕާސްޕޯޓް މަނާކުރާބިލް ތަސްދީގު ކުރައްވާފައެވެ.
އިސްރާއީލް ޕާސްޕޯޓް މަނާކުރާ ބިލް ތަސްދީގު ކުރުމާއެކު އެންމެފުރަތަމަ އެވާހަކަ ގެނެސްދިން އެއް މީޑިއާއަކީ އިސްރާއީލަށް ނިސްބަތްވާ ޓައިމްސް އޮފް އިސްރާއީލެވެ. އެނޫހުން ބުނެފައިވަނީ، ދުނިޔޭގެ އެންމެ މަތީފަންތީގެ ޓޫރިޒަމް މަންޒިލުން ފަލަސްތީނާއެކުގައި އޮތްކަމަށް ބުނެ އިސްރާއީލްގެ ޕާސްޕޯޓް މަނާކޮށްފައިވާކަމަށެވެ. އޭއެފްޕީގެ އޮފިޝަލަކާ ހަވާލާދީ އެނޫހުން ބުނެފައިވަނީ ރާއްޖެއިން އިސްރާއީލް ޕާސްޕޯޓް މަނާކުރަން ނިންމީ ފަލަސްތީނުގެ ރައްޔިތުންނާ ދެކޮޅަށް ނަސްލު ނައްތާލުމަށް ހިންގަމުންގެންދާ އަމަލުތަކުގެ ސަބަބުން ކަމަށެވެ.
އިސްރާއީލްގެ ނޫހުގައި މިކަމާ ގުޅިގެން ރާއްޖެއާ ދެކޮޅަށް އެއްވެސް ވާހަކައެއް އަދި މިހާތަނަށް ގެނެސްފައި ނުވިނަމަވެސް އިސްރާއީލްގެ ފޮރިން މިނިސްޓްރީން މިދިޔަ އަހަރު އެޤައުމުގެ ރައްޔިތުން ރާއްޖެއަށް ދަތުރު ނުކުރަން އެދިފައިވާކަމަށް ވަނީ ބުނެފައެވެ.
ރާއްޖެއިން އިސްރާއީލް ޕާސްޕޯޓް މަނާކުރަން ނިންމިނަމަވެސް އަދި މިހާތަނަށް ޔަހޫދީ އޮފިޝަލުން ވަކިއެއްޗެކޭ ބުނެފައެއްނުވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
