ބިދޭސީންނާމެދު އިހުމާލުވާ ފަރާތްތަކަށް ހަރުކަށި އަދަބުދެވޭ އިސްލާޙް ތަސްދީޤު ކުރައްވައިފި

ބިދޭސީ މަސައްކަތްތެރިންނާމެދު އިހުމާލުވާ ފަރާތްތަކަށް ކަނޑައެޅޭ އަދަބު ހަރުކަށިކޮށް، ވަޒީފާއާބެހޭ ޤާނޫނަށް ގެނެވުނު އިސްލާހު ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވަނީ ތަސްދީޤުކުރައްވާފައެވެ.

މި އިސްލާހުގެ ދަށުން، ބިދޭސީ މަސައްކަތްތެރިން ރާއްޖެ ގެނައުމަށްފަހު އެ ފަރާތްތަކާމެދު އިހުމާލުވާ ކޮންމެ މުވައްޒަފަކަށް 50،000 ރުފިޔާގެ ޖޫރިމަނާއެއް ވަޒީފާދޭ ފަރާތުން ދައްކަންޖެހޭނެއެވެ. މީގެ އިތުރުން، އިހުމާލުވާ ފަރާތްތަކުގެ މަޢުލޫމާތު އާންމުކުރެވޭނެ ކަމަށްވެސް މި އިސްލާހުގައި ބަޔާންކޮށްފައިވެއެވެ.

އިހުމާލުގެ އަމަލުތަކުގެ ގޮތުގައި ބަލާ ހާލަތްތަކުގެ ގޮތުގައި ކަނޑައަޅާފައިވަނީ:

- މުސާރަ ނުދިނުން

- ވަޒީފާ ދޭ ފަރާތުން ފޯރުކޮށްދޭން ޖެހޭ އަސާސީ ކަންކަމުގައި ގާނޫނުގެ ދަށުން ހަދާ ގަވާއިދުގައި ކަނޑައަޅާ ކަންކަން ފުރިހަމަނުކުރުން

- ބިދޭސީ މަސައްކަތްތެރިޔާ ގެންނަ ވަޒީފާ ނޫން އެހެން ވަޒީފާއެއް އޭނާ ލައްވައި އަދާ ކުރުވުން؛ ނަމަވެސް ވަޒީފާގެ އެއްބަސްވުމުގެ ދާއިރާގެ ތެރެއިން ކުރާ އެހެނިހެން މަސައްކަތް ކުުރުމަކީ އެހެން ވަޒީއެއް އަދާކުރުން ކަމުގައި ނުބެލެވޭނެ

- ބިދޭސީ މަސައްކަތްތެރިން ރާއްޖެ ގެނައުމުގައި ނުވަތަ ރާއްޖެ ގެނައުމަށް ފަހު އެ މީހުންނާ މެދު އެކްސްޕްލޮއިޓޭޝަންގެ އަމަލެއް ހިންގުން، ނުވަތަ އެ މީހުން ލައްވައި ގާނޫނާއި ގަވަާއިދާ ހިލާފު އަމަލުތައް ހިންގުވުން

ރައްޔިތުންގެ މަޖިލީހުން މި ބިލު ފާސްކޮށްފައިވަނީ ފާއިތުވި މަހުގެ 19 ވަނަ ދުވަހުއެވެ. މި އިސްލާހުގެ މަޤްޞަދަކީ ބިދޭސީ މަސައްކަތްތެރިންގެ ހައްޤުތައް ރައްކާތެރިކޮށް، އެ ފަރާތްތަކާމެދު އިހުމާލުވުމުގެ މައްސަލަތަކަށް ހައްލެއް ހޯދުމެވެ.

މި އިސްލާހާއެކު، ބިދޭސީ މަސައްކަތްތެރިންނާމެދު އިހުމާލުވާ ކަމަށް ބެލެވޭނެ ހާލަތްތަކާއި، އެފަދަ ހާލަތްތަކުގައި އަޅާނެ ފިޔަވަޅުތައް ވަނީ ތަފްސީލުކޮށް ބަޔާންކޮށްފައެވެ.

މި ބަދަލުތަކުން ބިދޭސީ މަސައްކަތްތެރިންގެ ހާލަތު ރަނގަޅުވެ، އެ ފަރާތްތަކުގެ ހައްޤުތައް އިތުރަށް ހިމާޔަތްކުރެވިގެންދާނެ ކަމަށް އުންމީދުކުރެވެއެވެ.