ރަލާއި އޫރުމަސް ނުވިއްކައި ގެސްޓް ހައުސް ހިންގޭނެ: ރައީސް ނަޝީދު

ރަލާއި އޫރުމަސް ނުވިއްކި ނަމަވެސް ދިވެހިރާއްޖޭގައި ގެސްޓްހައުސްގެ ވިޔަފާރި ކުރެވޭނެ ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

ރޭ ތިނަދޫގައި ބޭއްވި އެމްޑީޕީގެ ކެމްޕޭން ޖަލްސާއެއްގައި އެމަނިކުފާނު މިހެން ވިދާޅުވި އިރު މީގެ ކުރިން އެ މައުޟޫއަށް އެމަނިކުފާނު ދެއްކެވި ވާހަކަތަކަށް ގިނަ ބައެއްގެ ފާޑުކިޔުން އަމާޒުވިއެވެ.

އޭރު ރައީސް ނަޝީދަށް ފާޑުކިޔުން އަމާޒުވީ، ދުނިޔޭގައި އެންމެ ފާއިދާ ބޮޑު ވިޔަފާރިތަކުގެ ތެރޭގައި ރަލުގެ ވިޔަފާރި ހިމެނޭ ކަމަށް ވިދާޅުވުމުންނެވެ. ރައީސް ނަޝީދުގެ އެވާހަކަތައް ބައެއް ފަރާތްތަކުން ސިފަކުރީ ރަލުގެ ވިޔަފާރި ކުރުމަށް ހިތްވަރު ދެއްވުން ގޮތުގައެވެ.

ތިނަދޫގައި އެމްޑީޕީގެ މެންބަރުންނާއި މުޚާތަބުކުރައްވައި ވާހަކަފުޅު ދައްކަވަމުން ރައީސް ނަޝީދު ވިދާޅުވި ގޮތުގައި ރަލާއި އޫރުމަހުގެ ވިޔަފާރީގެ ފައިދާ ބޮޑު ވިޔަސް އެތައްޗާއި ނުލައި ވެސް ރާއްޖޭގައި ގެސްޓްހައުސް ވިޔަފާރި ކުރެވިދާނެ ކަމަށެވެ.

އެމްޑީޕީގައި ތިބީ މޮޅެތި މީހުންކަން ފާހަގަކުރައްވައި ރޭގެ ޖަލްސާގައި ރައީސް ނަޝީދު ވިދާޅުވި ގޮތުގައި އެ ޕާޓީގެ ކެންޑިޑޭޓުންނަކީ ސަރުކާރުގެ ކެންޑިޑޭޓުން ކަމަށެވެ. އަދި އެމްޑީޕީގެ ކެންޑިޑޭޓުން ހޮވިއްޖެ ނަމަ އެޖެންޑާ 19 ގެ ތެރެއިން ހުވަދު އަތޮޅަށްވެސް ގެސްޓްހައުސް ވިޔަފާރި ފުޅާ ކުރެވިގެންދާނެ ކަމަށް ރައީސް ނަޝީދު ވިދާޅުވިއެވެ.