ހެރިޓޭޖު މިނިސްޓްރީއަށް ވިލަރެސްވެރިން ހޯދަނީ

ރައީސުލްޖުމުހޫރިއްޔާ ޑރ.މުހައްމަދު މުއިއްޒުގެ ވެރިކަމުގައި މުޅިން އަލަށް އުފެއްދެވި ދިވެހިބަހާއި ސަގާފަތާއި ތަރިކައާ ބެހޭ ވުޒާރާ ދަށުން ހިންގުމަށް އުފައްދާފައިވާ ދިވެހި ތަރިކަ ދިރާސާ ކުރާ ގައުމީ މަރުކަޒަށް ވިލަރެސް ވެރިން ހޯދުމަށް އެ ވުޒާރާގެ ފަރާތުން އިޢުލާން ކޮށްފިއެވެ.

ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން އިއްޔެ ގެޒެޓްކުރި މި އިއުލާނުގައި ބުނެފައިވަނީ ދިވެހިވަންތަކަމުގެ ބަހާތައް ހިމާޔަތްކޮށް ދިރުވައި އާލާކޮށް ދެމެހެއްޓުމާއިބެހޭ މަޢުލޫމާތު އެއްކުރުމާއި ދަސްކުރުމާއި ދިރާސާކުރުމާއި އަދި ދިރާސާތައް ޝާޢިޢުކުރުމުގެ މަސައްކަތަށް 10 ވިލަރެސްވެރިއަކު އެ ވުޒާރާއަށް ބޭނުންވާކަމަށެވެ.

މިނިސްޓްރީގެ އިއުލާނުގައި އިތުރަށް ބުނެފައިވަނީ ޕޮލިޓިކަލް ސައިންސާއި، ކައުންސެލިންގ އެންޑް ސައިކޮލޮޖީއާއި، ބަހާއި އަދަބިއްޔާތު އަދި ސޯޝިއޮލޮޖީ ދާއިރާއިން ތަޢުލީމު ޙާސިލުކޮށްފައިވާ ފަރާތްތަކަށް އިސްކަންދޭނެ ކަމަށެވެ. އަދި އަސާސީ ޝަރުތެއްގެ ގޮތުގައި ކަނޑައަޅާފައިވަނީ ކަމާއިގުޅޭ ދާޢިރާއަކުން ދިވެހިރާއްޖޭގެ ޤައުމީ ސަނަދުގެ އޮނިގަނޑު ލެވެލް 7 ގެ ބެޗްލާރސް ޑިގްރީއެއް ޙާޞިލުކޮށްފައިވުމެވެ.

މިނިސްޓްރީގެ އިއުލާނުގައިވާ ގޮތުން ވިލަރެސްވެރިން ނެގުމުގައި އިސްލާމް ދީނަށް ހުރުމަތްތެރިކޮށްހިތާ ޤައުމު ދެކެ ލޯބިވާ އަދި ދިވެހިވަންތަކަމުގެ ބަހާތަކަށް ލޯބިކުރާ ފަރާތަކަށް އިސްކަންދެއްވާނެއެވެ.

ވިލަރެސްވެރިންގެ ގޮތުގައި ނެގޭ ފަރާތްތަކަކީ ދެ އަހަރުގެ މުއްދަތަކަށ ކޮންޓްރެކްޓް އުސޫލުން ނެނގޭ ބަޔަކަށް ވާއިރު އެމީހުންގެ އުޖޫރައެއްގެ ގޮތުގައި ކަނޑައަޅާފައިވަނީ މަހެއްގެ މައްޗަށް 25000 ރުފިޔާއެވެ. އަދި އޭގެ އިތުރުން އެލަވަންސްއެއްގެ ގޮތުގައި 5000 ރުފިޔާ ލިބޭނެކަމަށްވެސް އިއުލާނުގައި ވެއެވެ.

ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން 10 ވިލަރެސް ވެރިއަކު ހޯދުމަސް އިއުލާނުކޮށްފައިވާ އިރު އެ މިނިސްޓްރީގެ ފަރާތުން މިހާރުވެސް އަންނަނީ ދިވެހިބަހާއި ސަގާފަތާއި ތަރިކަ ރައްކާތެރި ކުރުމަށްޓަކައި ނުހަނު ގިނަ ގުނަ މަސައްކަތްތަކެއް ކުރައްވަމުންނެވެ.

އެގޮތުން މާލޭގައި ހުރި އާސާރީ ބިނާތައް ސާފުކޮށް އާބާތުރަ ފިލުވުމުގެ ހާއްޞަ މަސައްކަތްކެއް ކަމާއި ގުޅުންހުރި އެހެނިހެން އިދާރާތަކާއި ގުޅިގެން އެ ވުޒާރާއިން ވަނީ ފަށާފައެވެ.