ވިއްސާރަ ނަމަވެސް މި އަހަރުގެ އިރުވައި މޫސުން އިއްޔެ ފެށިއްޖެ

މި އަހަރުގެ އިރުވައި މޫސުން މިިދިޔަ އަންގާރަ ދުވަހު ރާއްޖެއަށް ފެށިފައިވާ ކަމަށް މޫސުމާއި ބެހޭ ގައުމީ އިދާރާ, މެޓް އޮފީހުން ބުނެފި އެެވެ.

އިރުވައި ފެށުނު ނަމަވެސް މި ދެތީން ދުވަހު މޫސުން ގޯހެވެ. ބައެއް ގަޑިތަކުގައި ވަރަށް ބޯކޮށް ވާރޭވެހިފައިވެ އެވެ.

ރާއްޖޭގައި އޮންނަނީ ދެ މޫސުމެވެ. ދެ މޫސުމުގެ ތެރެއިން އިރުވައި މޫސުމަކީ މީލާދީ ގޮތުން ބަލާއިރު ގާތްގަނޑަކަށް ޖަނަވަރީ މަހުން ފެށިގެން މާރިޗް މަހުގެ ނިޔަލަށެވެ. ހުޅަނގު މޫސުމަކީ މޭމަހުން ފެށިގެން ގާތްގަނޑަކަށް ނޮވެންބަރު މަހުގެ ނިޔަލަށެވެ.

މެޓު އޮފީހުން ބުނީ އިރުވައި މޫސުމުގެ އަސަރުތައް އާންމު ގޮތެއްގައި ޑިސެންބަރު މަހުގެ ދެވަނަ ނުވަތަ ތިންވަނަ ހަފްތާގެ ތެރޭގައި މެދު އަތޮޅުތަކަށް ފަށާނެ ކަމަށެވެ. އަދި ޖަނަވަރީ މަހުގެ ތެރޭގައި މުޅި ރާއްޖެއަށް އިރުވައި މޫސުން ފެށޭ ކަމަށެވެ.

އެ އޮފީހުން ބުނި ގޮތުގައި މި އަހަރުގެ އިރުވައި މޫސުން ރާއްޖެއަށް ފެށިފައި ވަނީ އިއްޔެ އެވެ.

އިރުވައި މޫސުން ފެށުނު ކަމަށް ބަލާ މިންގަނޑަކީ ވައިގެ މިސްރާބު އިރުމަތީން ހުރެފައި ގަޑިއަކު 10 ނޯޓިކަލް މޭލަށްވުރެ ބާރުމިނުގައި ވައިޖެހި މި ހާލަތު ވިދިވިގެން ދެ ދުވަހަށް ނުވަތަ އިތުރަށް ދެމިގެން ދިއުމުންނެވެ.