އުތުރުގައި ހިންގި އޮޕަރޭޝަންތަކުން ގިނަ އަދަދަކަށް މަސްތުވާތަކެތި އަތުލައިގަނެވުނު: ޕޮލިސް

އުތުރުގެ އަތޮޅުތަކުގައި ހިންގި އޮޕަރޭޝަންތަކުން މިއަހަރުގެ މިހާތަނަށް ގިނަ އަދަދަކަށް މަސްތުވާތަކެތި އަތުލައިގަނެވުނުކަމަށް ފުލުހުން ބުނެފިއެވެ.

ފުލުހުންގެ އަޕާ ނޯތު ޕޮލިސް ރީޖަންގެ މަސައްކަތްތަކާ ގުޅޭގޮތުން މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމުގައި މައުލޫމާތު ހިއްސާކުރަމުން ކޮމާންޑަރ ޗީފް ސްޕްރިޓެންޑެންޓް އޮފް ޕޮލިސް އިބްރާހިމް ޒުހުރީ ވިދާޅުވީ މިދިޔަ މަހުގެ ނިޔަލަށް އުތުރުގައި ފުލުހުން 194 އޮޕަރޭޝަން ހިންގާފައިވާކަމަށެވެ. މި އޮޕަރޭޝަންތަކުގައި 169 މީހަކު ހައްޔަރުކުރިއިރު، 784.39 ގްރާމް މަސްތުވާތަކެތި އަތުލައިގަނެވުނުކަމަށް ކޮމާންޑަރު ވިދާޅުވިއެވެ.

ކޮމާންޑަރު ވަނީ މަސްތުވާތަކެތީގެ އިތުރުން އެއްގަމު ދަތުރުފަތުރުކުރުމުގެ އުސޫލާ ހިލާފަށް ވެހިކަލް ދުއްވުމުގެ މައްސަލަތައްވެސް ފާހަގަކުރައްވާފައެވެ. އެގޮތުން ނުރައްކާތެރިކޮށް ދުއްވައިގެން 273 ވެހިކަލް ޓޯކުރިއިރު، ނުރައްކާތެރިކޮށް ދުއްވައިގެން 128 އެކްސިޑެންޓް ހިނގާފައިވާކަމަށެވެ. މި މުއްދަތުގެ ތެރޭގައި 423 އުޅަނދު ޖޫރިމަނާކޮށްފައިވާއިރު، އަޑުގަދަވާނޭހެން ސައިލެންސަރު ބަދަލުކޮށްގެން ދުއްވި 147 ސައިކަލެއް ހުއްޓުވިކަމަށް ކޮމާންޑަރު ވިދާޅުވިއެވެ.

މި މުއްދަތުގެ ތެރޭގައި ފުލުހުންވަނީ އުތުރުގެ އަތޮޅުތަކުން ޖުމްލަ 7 ހާހަށްވުރެ ގިނަ އުޅަނދު ބަލާފާސްކޮށްފައެވެ.

ފުލުހުންގެ އަޕާ ނޯތު ޕޮލިސް ރީޖަންގެ ހުރިހާ ރަށްތަކެއްގައި ފުލުހުންގެ ޔުނިޓްތައް ގާއިމްކޮށްފައިވާއިރު އެ ސަރަހައްދުެގ އާބާދީ 78 ހާހަށްވުރެ މައްޗެވެ. އެއީ ރާއްޖޭގެ އާބާދީގެ 14.75 އިންސައްތައެވެ.