ދުންފަތުން ނަގާ ޓެކްސް ބޭނުން ކުރާނީ ސިއްޙީ ދާއިރާ ވަރުގަދަ ކުރަން: ރައީސް މުޢިއްޒު

ދުންފަތުން ނަގާ ޓެކްސް ބޭނުން ކުރާނީ ސިއްޙީ ދާއިރާ ވަރުގަދަ ކުރުމަށް ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

ދުންފަތް މަނާ ކުރުމަށް ސަރުކާރުން ކުރަމުންދާ މަސައްކަތުގެ ތެރެއިން ސަރުކާރުން ވަނީ ދުންފަތް އެތެރެ ކުރުމަށް ނަގާ ޓެކްސް ބޮޑުތަނުން ބޮޑުކޮށްފައެވެ. އެކަމުގެ ސަބަބުން އިދިކޮޅު ފަރާތްތަކުން އަންނަނީ ޓެކްސް ބޮޑު ކުރީ ދުންފަތް މަނާ ކުރުމުގެ ނިޔަތް ސަރުކާރުގެ އޮވެގެން ނޫންކަމަށް ބުނެ ގިނަ ފާޑުކިޔުންތައް ސަރުކާރަށް އަމާޒުކުރަމުންނެވެ.

ރައީސް އޮފީހުން ގެނެސްދޭ ”ރައްޔިތުންނާއެކު“ ޕޮޑްކާސްޓްގެ 7 ވަނަ އެޕިސޯޑްގައި އެވާހަކަތަކަށް ރައްދު ދެއްވައި ރައީސް މުޢިއްޒު ވިދާޅުވީ، ރާއްޖޭގެ ދުންފަތުގެ އިސްތިއުމާލު ކުރާ ވަރަށް ގިނަ ބަޔަކު އެކަމަށް ދެވިހިފާފައިވާ ކަމަށެވެ. އެހެންކަމުން، ކުއްލިއަކަށް އެކަން އެއްކޮށް މަނާ ނުކުރެވޭނެ ކަމަށެވެ.

އޭގެ ބަދަލުގައި މަރުހަލާ ތަކަކަށް ބަހާލައިގެން މަނާކުރުން ކުރިއަށް ގެންދާއިރު، ޓެކްސް ބޮޑުކުރުމަކީވެސް އޭގެ ތެރެއިން ކުރައްވާ ކަމެއް ކަމަށް ވިދާޅުވިއެވެ.

ދުންފަތް އެތެރެކުރުމުން އެ ދައްކަންޖެހޭ ފައިސާ، އަޅުގަނޑުމެންގެ ސިޔާސަތުގައި ކަނޑައަޅާފައި މިއޮތީ ސިއްޙީ ދާއިރާ ވަރުގަދަކުރަން ބޭނުން ކުރަން… އަޅުގަނޑު ތަކުރާރުކޮށްވެސް މި ދަންނަވަނީ މި ވިޔަފާރި ދޫކޮށްލައްވާށޭ. އެ ލިބޭ އެއްޗެއް ވިއްޔާ އަޅުގަނޑުމެން ހޭދަކުރާނީ ޕްރިވެންޓިވް ހެލްތުކެއާއަށް. މާނައަކީ ބަލިތަކުން ދުރުވުމަށް ހޭލުންތެރި ކުރުވުމަށާ، އަދި ބަލި ޖެހުނީމާ ފަރުވާގެ ނިޒާމް ވަރުގަދަ ކުރުމަށް

ރައީސް ޑރ. މުޙައްމަދު މުޢިއްޒު

މިދިޔަ އަހަރުގެ ނޮވެމްބަރު މަހުގެ 1 ވަނަ ދުވަހުން ފެށިގެން ދުންފަތުގެ ޓެކްސް އަށް ބޮޑެތި ބަދަލުތަކެއް ސަރުކާރުން ވަނީ ގެނެސްފައެވެ. އެ ބަދަލު ތަކުގެ ތެރޭގައި ފާހަގަ ކުރެވެނީ:

* ސިނގިރޭޓާއި ބިޑިއަށް ނަގާ އިމްޕޯޓް ޑިއުޓީގެ ސްޕެސިފިކް ރޭޓު 3 ރުފިޔާ އިން 8 ރުފިޔާ އަށް ބޮޑު ކުރުން؛ މިއާ އެކު ކޮންމެ ސިނގިރޭޓަކުން 5 ރުފިޔާ ވަނީ ބޮޑުކޮށްފައި

* ސިނގިރޭޓާއި ދުންފަތުގެ އުފެއްދުންތަކުން ނަގާ އެޑްވަލޮރަމް ރޭޓު %50 އިން %100 އަށް ބޮޑު ކުރުން.

ސަރުކާރުން މި ގެނައި ބަދަލު ތަކާއެކު ސިނގިރޭޓު ފޮއްޓެއް ގަންނަން ލިބޭ އަގު 240 ރުފިޔާ އަށް މައްޗަށް ވަނީ ޖެހިފައެވެ.