ބީއެމްއެލްއުން ރާއްޖޭގައި ފުރަތަމަ ފަހަރަށް ބައިނަލްއަގުވާމީ ބޭންކިން ކޮންފަރެންސްއެއް ބާއްވަނީ
ލިޔުންތެރިޔާ
ޝަފްރާޒް އަހްމަދު
ދިވެހިރާއްޖޭގައި ބާއްވާ ފުރަތަމަ ބައިނަލްއަގުވާމީ ބޭންކިން ކޮންފަރެންސް ބޭންކް އޮފް މޯލްޑިވްސް (ބީއެމްއެލް) އިން ރާވާ އިންތިޒާމްކުރާ ގޮތަށް ހަމަޖެހިއްޖެއެވެ.
ބީއެމްއެލްއިން އިންތިޒާމްކުރުމަށް ހަމަޖެހިފައިވަނީ އޭޝިއަން އެސޯސިއޭޝަން (އޭބީއޭ)ގެ ކޮންފަރެންސްއެވެ. މި ކޮންފަރެންސް ބޭއްވުމަށް ހަމަޖެހިފައިވަނީ މި ހިނގާ ނޮވެންބަރު މަހުގެ 15 އަދި 16 ވަނަ ދުވަހުއެވެ. މިފަހަރު ރާއްޖޭގައި ބޭއްވުމަށް ހަމަޖެހިފައިމިވަނީ އޭބީއޭގެ 35 ވަނަ އަހަރީ ކޮންފަރެންސްއެވެ.
ކުރުނބާ މޯލްޑިވްސްގައި "ބޭންކިން އިން އޭޝިއާ: ދި ނެކްސްޓް ފްރޮންޓިއާ" ޝިއާރުގެ ދަށުން ބޭއްވުމަށް ހަމަޖެހިފައިވާ މި ކޮންފަރެންސްގައި އޭޝިއާ ސަރަހައްދުގެ މަލީ އިދާރާތަކުގެ އެންމެ މަތީ ފަންތީގައި މަސައްކަތްކުރައްވާ ބޭފުޅުން ބައިވެރިވާނެކަމަށް ބީއެމްއެލްއުން މައުލޫމާތުދެއެވެ. މީގެ އިތުރުން 25 ގައުމަކުން ޖުމްލަ 100 އަށްވުރެ ގިނަ ބޭފުޅުން މި ކޮންފަރެންސްގައި ބައިވެރިވާނެކަމުގައިވެސް ބީއެމްއެލްއިން ބުނެފައިވެއެވެ.
މި ކޮންފަރެންސްގައި މައިގަނޑު ގޮތެއްގައި މަޝްވަރާ ކުރުމަށް ހަމަޖެހިފައިވަނީ އޭޝިއާ ސަރަހައްދުގައި ބޭންކިން ކުރިއަރަމުންދާ ގޮތުގެ މައްޗަށެވެ. އޭގެ އިތުރުން ޒަމާނާއެކު ތަރައްގީވަމުން އަންނަ ޓެކްނޮލޮޖީގެ ދުނިޔޭގައި މާލީ ހަރުދަނާކަމައި ނަޒާހަތްތެރިކަން ދެމެހެއްޓުމުގެ މުހިންމުކަމާމެދުވެސް މަޝްވަރާކުރެވިގެންދާނެއެވެ.
އަމިއްލަ ފަރުދުންނާއި ވިޔަފާރިތަކާއި ކޯޕަރޭޓްތަކަށް ރާއްޖޭގައި އެންމެ ފުޅާކޮށް މާލީ ހިދުމަތް ފޯރުކޮށްދޭ ބީއެމްއެލްއަކީ ރާއްޖޭގެ އެންމެ ބޮޑު ބޭންކެވެ. ޓެކްނޮލްޖީ އަށް މުހިންމު އިސްކަމެއްދޭ ބީއެމްއެލް އަކީ ރާއްޖޭގައި ފުރަތަމަ ފަހަރަށް ޑިޖިޓަލް ބޭންކިން ހިދުމަތް ދޭން ފެށި ބޭންކު ވެސް މެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
