މެސީއަށްފަހު ފުޓްބޯޅަ ލެޖެންޑް ރޮނާލްޑީނިއޯވެސް އިންޑިއާއަށް

ދައްކާލުމުގެ ހާއްސަ މެޗްތަކެއް ކުޅުމަށް ފުޓްބޯޅަ ލެޖެންޑް ރޮނާލްޑީނިއޯ އިންޑިއާއަށް ޒިޔާރަތްކޮށްފިއެވެ.

ރޮނާލްޑީނިއޯ އާއި އޭނާގެ ޓީމް އިންޑިއާއަށް މި ކުރާ ދަތުރުގައި، އިންޑިއަން އޯލް-ސްޓާސްއާ ދެކޮޅަށް ކުޅޭ "ރިޓާން އޮފް ދަ ޓައިޓަންސް" ކެރެލާ އެޑިޝަން 2026' އެގްޒިބިޝަން ފުރަތަމަ މެޗް އޮންނާނީ، މިއަދު ޖަވާހަރްލާލް ނެހުރޫ އިންޓަނޭޝަނަލް ސްޓޭޑިއަމްގައެވެ.

ރޮނާލްޑީނިއޯ ލީޑްކުރާ ޓީމުގައި ކުރީގެ ވޯލްޑް ކަޕް ކާމިޔާބުކުރި ކުޅުންތެރިންނާއި ބައިނަލްއަގުވާމީ ތަރިން ހިމެނެއެވެ. އޭގެ ތެރޭގައި ރިވާލްޑޯ، އެޑްމިލްސަން، ޕައުލޯ ސާޖިއޯ، ޖިއޮވާނީ، ރޮކޭ ޖޫނިއާ، ވިއޯލާ، ގޯމޭޒް، އަމަރާލް، ގުސްޓާވޯ ނެރީ، ރިކާޑޯ އޮލިވޭރާ، ޖޯޖީނިއޯ، ކަމަންޑުކައިއާ، އެލިވެލްޓަން، ސޫޒާ، ޕާރާ އަދި ދިއޯގޯ ހިމެނެއެވެ. މި ޓީމްގެ މެސެޖަކީ "ލެޖެންޑްސް. ޕެޝަން. ފުޓްބޯޅަ. ކެރެލާ ވެލްކަމްސް ދަ ޓައިޓަންސް" އެވެ.

އިންޑިއާ އޯލްސްޓާ ޓީމްގައި ހިމެނޭ އެންމެ ފާހަގަކޮށްލެވޭ ކުޅުންތެރިޔަކީ ބައިޗުން ބުޓިއާ އެވެ. އޭގެ އިތުރުން މި ޓީމްގައި ކެރެލާގެ މަޝްހޫރު ކުޅުންތެރިން ކަމަށްވާ އައި.އެމް ވިޖަޔަން، ސީ.ކޭ ވިނީތު، މުހައްމަދު ރަފީ، ޖޯ ޕޯލް އަންޗޭރީ އަދި ރީނޯ އަންޓޯ ހިމެނެއެވެ. މި ޓީމްގެ މެސެޖަކީ "ވަން ނޭޝަން. ވަން ޕެޝަން. ވިޓްނެސް ދަ ލެޖެންޑްސް އިން ކެރެލާ" އެވެ.

މި މެޗަށް ޖަވާހަރްލާލް ނެހުރޫ އިންޓަނޭޝަނަލް ސްޓޭޑިއަމްގެ ސަލާމަތީކަންކަން ވަނީ ވަރަށް ވަރުގަދަކޮށްފައެވެ. އަދި މަގުތަކުގެ ޓްރެފިކް ފްލޯއަށް ވަނީ ބޮޑެތި ބަދަލުތައް ގެނެސްފައެވެ. ރޮނާލްޑީނިއޯގެ މި ދަތުރުގައި ކެރެލާގެ ބައެއް އެކަޑަމީތަކުން ބާއްވާ މުބާރާތްތައް އިފްތިތާހްކުރުމާއި ޗެރިޓީ އިވެންޓްތަކުގައި ބައިވެރިވުމަށް ވަނީ ހަމަޖެހިފައެވެ.

ރޮނާލްޑީނިއީ އިންޑިއާއަށް ޒިޔާރަތްކުރިއިރު މީގެ ކުރިން ލިއޮނެލް މެސީވެސް ވަނީ މިދިޔަ އަހަރުގެ ޑިސެމްބަރުމަހު އެޤައުމަށް ޒިޔާރަތްކޮށްފައެވެ. ގޯޓް އިންޑިއާ ޓްއާ ނަމުގައި ކުރި މި ދަތުރުގެ އިންތިޒާމުތައް ދަށްވުމާއި ސިޔާސީ މީހުންނާއި ސެލެބްރިޓީންގެ އަމަލުތައް ހުރިގޮތުން ޓްއާގެ އެންމެ ހާއްސަ އެއް އިވެންޓް ނިމުނީ ބޮޑު ހަމަނުޖެހުމަކަށް ބަދަލުވެގެންނެވެ.