ޑިއޮމާންޑޭގެ ލަނޑާއެކު ރެއާލް މެޑްރިޑުން، ވިޔަރެއާލް ބަލިކޮށްފި

ބައިނަލްއަގުވާމީ މެޗުތަކުގެ މެދުކެނޑުމަށްފަހު ސްޕެއިންގެ ރެއާލް މެޑްރިޑް ކުޅުނު ފުރަތަމަ މެޗުން އެޓީމް މޮޅުވެއްޖެއެވެ.

ސްޕެނިޝްލީގްގައި ރެއާލް މެޑްރިޑް ރޭ ނިކުތީ ވިޔަރެއާލްއާ ދެކޮޅަށެވެ. މިމެޗް ރެއާލުން ކާމިޔާބުކުރީ 1-0 ގެނަތިޖާއިންނެވެ.  ސެންޓިއާގޯ ބާނަބާއޫގައި ކުޅުނު މި މެޗުގެ ފުރަތަމަ ހާފުގައި ދެޓީމުގެ ފަރާތުންވެސް ފެނުނީ ވަރަށް ވާދަވެރި ކުޅުމެކެވެ. މެޗުގެ ހަތްވަނަ މިނެޓުގައި ކިލިއަން އެމްބާޕޭ އަށް ލަނޑު ޖަހާނެ ރަނގަޅު ފުރުސަތެއް ލިބުނު ނަމަވެސް، އޭނާ ފޮނުވާލި ބޯޅަ އަމާޒުވީ ގޯލުގެ އަރިމަތީ ދަނޑިއަށެވެ. އަދި އޭގެ ފަހުން ޓްރެންޓް އެލެކްސެންޑާ އާނޯލްޑް ދިން މޮޅު ބޯޅައަކުން އެމްބާޕޭ އުފެއްދި ހަމަލާ، ވިޔަރެއާލްގެ ކީޕަރު ގުލާޗީ ވަނީ ހުށިޔާރުކަމާއެކު ދިފާއުކޮށްފައެވެ.

މެޗުގެ ދެވަނަ ހާފުގައި ރެއާލް މެޑްރިޑުން ވަނީ އެޓީމްގެ ކުޅުން ވަރުގަދަކޮށްފައެވެ. ނަތީޖާއަކަށް ވެގެން ދިޔައީ މެޗުގެ 62 ވަނަ މިނެޓުގައި ފެޑެރީކޯ ވަލްވާޑޭ ދިން ބޯޅައަކުން، ޒުވާން ކުޅުންތެރިޔާ ޔާން ޑިއޮމާންޑޭ ލަނޑުޖެހުމެވެ. މިއީ މެޑްރިޑްގެ ޖާޒީގައި އޭނާ ކާމިޔާބުކުރި ފުރަތަމަ ލަނޑެވެ. ފުރަތަމަ މި ލަނޑު އޮފްސައިޑް ކަމަށް ނިންމި ނަމަވެސް، ވީއޭއާރް ބެލުމަށްފަހު ރެފްރީ ވަނީ އެއީ ސައްހަ ލަނޑެއް ކަމަށް ކަނޑައަޅާފައެވެ.

މެޗުގެ ފަހުބައިގައި ރެއާލް މެޑްރިޑަށް ވަނީ އިތުރު ނުތަނަވަސްކަމާ ކުރިމަތިވެފައެވެ. އެއީ ވިޔަރެއާލްގެ ސަލީބާއަށް ކުރި ފައުލަކާ ގުޅިގެން ވިނީ ޖޫނިއާސްއަށް ރަތްކާޑު ދެއްކުމެވެ.

މެޑްރިޑުން އެއް ކުޅުންތެރިއަކު މަދުކޮށް ކުޅެން ޖެހުމުގެ ފައިދާ ނަގައި، ވިޔަރެއާލުން ނަތީޖާ ހަމަހަމަކުރުމަށް ގިނަ ހަމަލާތަކެއް އުފެއްދިއެވެ. ނަމަވެސް ރެއާލްގެ ކީޕަރު ތިބޯ ކޯޓުއާ ވަނީ އާދަޔާ ހިލާފު މޮޅު ސޭވްތަކެއްކޮށްފައެވެ.

މެޗަށްފަހު ރެއާލް މެޑްރިޑް ޕޮއިންޓް ތާވަލްގެ ތިންވަނައަށް ޖެހިލިއިރު ވިޔަރެއާލް އުޅެނީ ތާވަލްގެ 10 ވަނާގައެވެ.