ހުޅުމާލޭގައި މިރެއާ މާދަންރޭވެސް ހަވާއަރުވަނީ
ލިޔުންތެރިޔާ
އަބްދުﷲ ހުސައިން
ހުޅުމާލެ ފޭސް ދޭއްގައި މިރޭ ހަވާ އަރުވާނޭކަމަށް މޯލްޑިވްސް ނެޝަނަލް ޑިފެންސް ފޯހުން ބުނެފިއެވެ.
އެމްއެންޑީއެފުން ބުނީ މިރޭ ހުޅުމާލޭގައި ހަވާ އެރުވުމަށް ނިންމާފައިވަނީ، ވިޔަފާރީގެ އުސޫލުން ޕްރައިވެޓް އިވެންޓަކަށް ކަމަށެވެ. ފަރުކޮޅުފުށީގައި ހަވާއެރުވުމަށް ނިންމާފައިވަނީ މިރޭ 21:45 ގައެވެ. ހަވާއެރުވުން ކުރިއަށްދާނީ ތިން މިނެޓަށެވެ.
މާދަމާ ރޭވެސް ހުޅުމާލޭގައި ހަވާއެރުވުމަށް ވަނީ ނިންމާފައެވެ. އެއީ އިނގިރޭސި ޕްރިމިއާ ލީގްގެ ޗެމްޕިއަންކަން ލިވަޕޫލް ހޯދުމާ ގުޅިގެން އެޓީމަށް ސަޕޯޓްކުރާ ފަރާތްތަކުން ބާއްވާ އިވެންޓެކެވެ. ހަވާ އަރުވާނީ ފޭސްދޭއް ރުއްގަނޑު ތިނެއް ސަރަހައްދުގައެވެ. ހަވާއެރުވުމާއެކު އެ ސަރަހައްދުގައި ބޮޑުބެރު ޝޯއެއްވެސް ބޭއްވުމަށްވެސް ވަނީ ހަމަޖެހިފައެވެ. މި ހަރަކާތްތައް ފެށޭނީ 19:30 ގައެވެ. ހަވާއެރުވުމަށް ނިންމާފައިވަނީ، ލިވަޕޫލާ ކްރިސްޓަލްޕެލަސް ބައްދަލުކުރާ މެޗަށްފަހު ލިވަޕޫލަށް ތަށިދޭ ވަގުތުގައެވެ. އެއީ ރައްޖޭގަޑިން 22:15 އާއި 22:30 އާ ދެމެދުއެވެ.
އުފެއްދުންތެރިކަމުގެ ޤައުމީ މައުރަޒު ފެށުމުގެ ގޮތުން ހުޅުމާލޭގައި ރޭވެސް ވަނީ ހަވާ އަރުވާފައެވެ. ހަވާއެރުވުމަކީ ގިނަ އަދަދެއްގެ ރައްޔިތުން ވަރަށް ޝައުގުވެރިވާ ހަރަކާތެކެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
