މިއަދު މިއޮތީ މީރުކޮށް ފިޝް ބަން ތައްޔާރު ކޮށްލާނެ ގޮތް!

މިއަދު ވޮއިސްގެ ބަދިގެއިން މި ގެނެސްދެނީ ވަރަށް މީރުކޮށް ފިޝްބަންސް ތައްޔާރު ކޮށްލާނެ ގޮތެވެ. ކިޔުންތެރިންނަށް ކަމުދާނެ ކަމަށް އުއްމީދު ކުރަމެވެ.

ފުށްގަނޑަށް ބޭނުންވާ ތަކެތި

1 1/2 ޖޯޑު ފުށް

2 ސައި ސަމުސާ ޔީސްޓް

1 ސައި ސަމުސާ ހަކުރު

1 މޭޒުމަތީ ސަމުސާ ތެޔޮ

10 ގުރާމު ބަޓަރ

ފެން

ލޮނު

ތައްޔާރުކުރާނެ ގޮތް

1) ފުށުގެ ތެރެއަށް ހުރިހާ އެއްޗެއް އަޅައިގެން މޮޑެލާށެވެ. އަތުން މޮޑޭނަމަ، ބަޓަރ އެއްކުރާނީ ފަހުންނެވެ.

2) އެއަށްފަހު މަތި ޖެހި އެއްޗެއްގައި 30 މިނެޓް ވަންދެން ފުށްގަނޑު ރަނގަޅަށް ފުފެންދެން ބާއްވާށެވެ.

މަސްގަނޑަށް ބޭނުންވާ ތަކެތި

1 ފިޔާ ( ތުނިކޮށް ކޮށާފައި)

1 ދަޅު މަސް

1 ސައި ސަމުސާ މުގުރި އަސޭމިރުސް

3 ލޮނުމެދު ( ކުދިކޮށް ކޮށާފައި)

1 ސައި ސަމުސާ މުގުރުރި މިރުސް

1 ގިތެޔޮ މިރުސް (ކުދިކޮށް ކޮށާފައި)

1 ހިކަނދިފަތް

ތެޔޮ (މަސް ދަޅުގެ ތެޔޮ)

ލޮނު (ނޫޑްލްސް ސޫޕް ޕެކެޓް)

1/2 ސައި ސަމުސާ އިނގުރު ޕޭސްޓް

1 ސައި ސަމުސާ ޓޮމާޓޯ ޕޭސްޓް

1 ސައިސަމުސާ ކުކުޅު ހަވާދު ( ޕެކެޓް/ހިކި ހަވާދު)

ކުޑަ ފެންފޮދެއް

1 ބިސް ( ބަނަހުގެ މަތީގައި އުނގުޅަން)

ތައްޔާރު ކުރާނެ ގޮތް

1) ތެއްޔަށް ތެޔޮ ފޮދު އަޅާފައި ތެޔޮ ހޫނު ވުމުން ލޮނުމެދު ކޮޅު އަޅާލާށެވެ. ކުޑަކޮށް ލޮނުމެދު ފްރައި ވުމުން ފިޔާ ކޮޅާއި ގިތެޔޮ މިރުހާއި، ހިކަނދިފަތް ކޮޅު އަދި އިނގުރު ޕޭސްޓް އަޅާލާށެވެ.

2) ދެން ހަވާދު، މުގުރި މިރުސް، އަސޭމިރުސް، ޓޮމާޓޯޕޭސްޓް އަދި ފެންފޮދު އަޅައި 5 މިނެޓް ވަންދެން ކައްކާލާށެވެ.

3) އެއަށް މަސްދަޅު އަޅައިގެންވެސް 5 ވަރަކަށް މިނެޓް ކައްކާާފައި ލޮނު ހެޔޮވަރު ކޮށްލާފައި އުނދުން ނިއްވާލާށެވެ

4) ބަން ހެދުމަށް، ކުރިން މޮޑެފައި ބެހެއްޓި ފުށްގަނޑުން ގުޅަ ހެދުމަށްފަހު އޭތި ކުޑަކޮށް ދަމާލާފައި އޭގެ ތެރެއަށް މަސް އަޅައި ހުރިހާ ދިމާއަކުން ބައްދާލުމަށްފަހު، ތިނެސްކަން ބަށްޓަމަށް، ނޫނީ ބަނަސް ހުންނަ ގޮތަށް ވަށްކޮށް ހަދާލާށެވެ.

5) ދެން އޭގެ މަތީގައި ރޯ ބިސް ހާކައި ފިހެލާށެވެ. އަވަނުގެ ހޫނުމިން ބަހައްޓާނީ 250 ޑިގްރީ ސެލްސިއަސް ގައެވެ. 15 ވަރަކަށް މިނެޓުން ފިހެވޭނެއެވެ.