މިއޮތީ ތައްޔާރު ކޮށްލަން ފަސޭހަ، ރަހަމީރު ޓޯޓީއާ ޕިއްޒާ ކޯންގެ ރެސިޕީ

ކޯން ޕިއްޒާ އަކީ މިހާރު އެންމެ ޓްރެންޑިން ގިނަ ބައެއްގެ މެދުގައި ވަރަށް މަގުބޫލު އެއްޗަކަށް މިވަނީ ވެފައެވެ. އެހެންކަމުން މިއަދު ވޮއިސްގެ ބަދިގެއިން މި ގެނެސްދެނީ ޗިކަން ޓޯޓީއާ ޕިއްޒާ ކޯންގެ ރެސިޕީއެވެ.

ބޭނުންވާ ތަކެތި

500ގ ކުކުޅު (މުގުރާފައި/ ކުދިކޮށް ކޮށާފައި)

1 ފިޔާ (ޗޮޕް ކޮށްފައި)

1 މޭޒުމަތީ ސަމުސާ ލޮނުމެދު ޕޭސްޓް

4 މޭޒުމަތީ ސަމުސާ ޓޮމާޓޯ ޕޭސްޓް

1 ސައި ސަމުސާ އަސޭމިރުސް

1 ސައިސަމުސާ ލޮނުމެދު ޕައުޑާ

1/2 1 ސައިސަމުސާ މުގުރި ރަތް މިރުސް

1 ސައިސަމުސާ ޗިލީ ފްލޭކްސް

1 ޖޯޑު ބެލްޕެޕާ (ކުދިކޮށް ކިޔުބްކޮށް ކޮށާފައި)

2 މޭޒުމަތީ ސަމުސާ ތެޔޮ

ލޮނު

8 ޓޯޓީއާ

16 ޓޫތް ޕިކް

ސްޕްރޭ ކޮށްލަން ތެޔޮ ފޮދެއް

މޮޒެރެއްލާ ޗީޒް

ތައްޔާރު ކުރާނެގޮތް

ޓޯޓީއާތައް މެދުން ފަޅާލުމަށްފަހު ކޯން އެއްގެ ބައްޓަމަށް އޮޅާލުމަށްފަހު ޓޫތްޕިކް އިން ހަރުކޮށްލާށެވެ. ދެން ތެޔޮ ސްޕްރޭ ކޮށްލުމަށްފަހު، އަވަނަށްލައި، ބޭރު ރަންމުށިކުލަ އަރަންދެން ފިހެލާށެވެ.

މަސްގަނޑު ތައްޔާތު ކޮށްލުމަށް ފިޔާ، ލޮނުމެދު ޕޭސްޓް ތެޔޮ ފޮދުގައި ފްރައިކޮށްލާށެވެ.

ދެން ކުކުޅު، ލޮނު، އަސޭމިރުސް، ލޮނުމެދު ޕައުޑާ، މުގުރި މިރުސް އަދި ޓޮމާޓޯ ޕޭސްޓް، އެޅުމަށްފަހު ކުކުޅުކޮޅު ރޯފިލަންދެން ކައްކާލާށެވެ.

ރޯ ފިލުމުން، ޗިލީ ފްލޭކްސް، އަދި ބެލްޕެޕާ ކޮޅުވެސް އަޅާލާށެވެ. މާ ހިކި ނަމަ، ކުޑަ ފެންފޮދެއް އަޅައިގެން މަޑު ގިނީގައި އިރުކޮޅަކު ކައްކާލާށެވެ.

އެއަށްފަހު، މަސްގަނޑު، ކުރިން ތައްޔާރު ކުރި ކޯންގެ ތެރެއަށް އަޅާށެވެ. އަދި އޭގެ މައްޗަށް ގާނާފައި ހުރި ޗީޒްވެސް އަޅާލާށެވެ.

ދެން، ކޯންތައް ލެވޭ ކަހަލަ ފުން ޓްރޭ އަކަށް އެ ކޮޅަށް ހުންނަ ގޮތަށް ލުމަށްފަހު، ޗީޒްކޮޅު މެލްޓް ވަންދެން އަވަނަށްލައި ފިހެލާށެވެ.

ޕިއްޒާ ކޯން އެހުރީ ތައްޔާރު ވެފައެވެ.