މި ހުކުރު މެންދުރު ކެއުމަށް ޗިކަން ޓިއްކާ ސަޅިވާނެ، މިއޮތީ ރެސިޕީ

ޗިކަން ޓިއްކާއަކީ ދިވެހިންގެ މެދުގައިވެސް ވަރަށް ބޮޑު މަޤްބޫލުކަމެއް ހޯދާފައިވާ މީރު ކެއުމެކެވެ. ރޮށި، ނާން ނުވަތަ ބަތާއެކު ވެސް ކާލަން ނުހަނު މީރު މި ޑިޝްއަކީ ހުކުރު ދުވަހުގެ މެންދުރު ކެއުމަށް ކަމުދާނެ ޑިޝްއެކެވެ. މިއަދު ވޮއިސް ގެ ބަދިގެއިން މި ގެނެސްދެނީ ގޭގައި ތިބެގެން ރެސްޓޯރެންޓްތަކުގެ ރަހަ ގެނެސްދޭނެ، ޗިކަން ޓިއްކާއެއްގެ ރެސިޕީއެވެ.

ބޭނުންވާ ތަކެތި:

500ގ ބޯންލެސް ޗިކަން (ބޮޑަށް މީރުވާނީ ކުކުޅުގެ ފަލަމަސްގަނޑު)

75ގ ޕްލެއިން ގްރީކް ޔޯގަޓް

2 މެޒުމަތީ ސަމުސާ އިނގުރު އަދި ލޮނުމެދު ޕޭސްޓް

1 މޭޒުމަތީ ސަމުސާ ކުކުޅު ހަވާދު

1 ސައިސަމުސާ ދިރި (މުގުރާފައި)

1 ސައިސަމުސާ ކޮތަނބިރި ޕައުޑާ

1/2 ސައިސަމުސާ ރީނދޫ

1 ސައިސަމުސާ ސްމޯކްޑް ޕަޕްރިކާ

2 ސައިސަމުސާ މުގުރި މިރުސް

1 މޭޒުމަތީ ސަމުސާ ލުނބޯ ހުތް

1/2 ސައިސަމުސާ އަސޭމިރުސް (މުގުރާފައި)

ލޮނު (ރަހަލާވަރަށް/ ގާތް ގަނޑަކަށް 1 1/2 ސައިސަމުސާ ރަނގަޅު ވާނެއެވެ.

ރަތްކުލައިގެ ކާކުލަކޮޅެއް( ބޭނުންނަމަ)

ތައްޔާރުކުރާނެ ގޮތް:

1- ޗިކަން ބްރެސްޓް ބޭނުންކުރާ ނަމަ، ތުނި ކޮށްލުމަށް މެދުން ފަޅާލާށެވެ. ތައި ބޭނުންކުރާ ނަމަ ޅިޔަ އަޅާލާށެވެ.

2- ދެން ބޮޑު ބޯތަށްޓަކަށް ހުރިހާ ބާވަތްތަކެއް (ކުކުޅު، ޔޯގަޓް، ސްޕައިސަސް، އިނގުރު-ލޮނުމެދު ޕޭސްޓް، ލުނބޯހުތް ، ލޮނާއި އަސޭމިރުސް، ކާކުލަ) އަޅައި، ރަނގަޅަށް އެއްކޮށްލާށެވެ.

3- އެއަށްފަހު، ތަށީގެ މަތި ބަންދުކޮށްފައި މަދުވެގެން ދެ ގަޑިއިރު ވަންދެން ފުރިޖުގައި ބަހައްޓާށެވެ. އެންމެ މީރު ރަހަ ނެރުމަށްޓަކައި ރޭގަނޑު އެއްކޮށް މެރިނޭޓްވާން ބެހެއްޓުން ވަރަށް ރަނގަޅެވެ.

4- ދެން 220 ޑިގްރީ ސެލްސިއަސްއަށް 5 މިނެޓް ވަންދެން، އަވަން ހޫނުކޮށްލަން ބަހައްޓާށެވެ. އެއަށްފަހު، މެރިނޭޓްކުރި ކުކުޅުކޮޅުތައް ޓްރޭއަކަށްލުމަށްފަހު ފިހަން ލާށެވެ.

5- ގާތްގަނޑަކަށް 20 މިނެޓް ފިހެވުމުން މެރިނޭޓްކުރި އިރު ހެދި ސްޕައިސް ޕޭސްޓްގެ ތެރެއިން ބޯތަށީގައި ހޭކިފައި ހުރި ބައި ކުކުޅުމަތީގައި އުނގުޅާލާށެވެ. މި ވަގުތުގައި ބޭނުން ނަމަ، ލުނބޯ ހުތްކޮޅެއްވެސް އުނގުޅާލެވިދާނެއެވެ. ދެން ކުކުޅު ރަނގަޅަށް ރޯފިލަންދެން ފިހެލާށެވެ.