ޝާހިދު ދެއްކެވި ވާހަކައަކަށް ދައުލަތުގެ ގިނަ ވަޒީރުންނާ އިސްވެރިން ރައްދުދެއްވައިފި

އެމްޑީޕީގެ ރައީސް ޢަބްދުالله ޝާހިދު ދެއްކެވި ވާހަކައަކަށް ދައުލަތުގެ ގިނަ ވަޒީރުންނާ އިސްވެރިން ރައްދުދެއްވައިފިއެވެ.

ރައްޔިތުންގެ މަޖިލީހުގައި ވާދަކުރައްވާ އެމްޑީޕީ ކެންޑިޑޭޓުންގެ ކެމްޕެއިން ހަރަކާތްތަކުގައި އަތޮޅުތެރެއަށް ކުރައްވަމުނުް ގެންދަވާ ދަތުރުތަކުގެ ތެރެއިން މ. ރަތްމަންދޫއަށް ވަޑައިގެން ޝާހިދު ދެއްކެވި ވާހަކަ ވަނީ އެކްސްގައި ޙިއްސާކޮށްފައެވެ.

މިއަދުގެ ސަރުކާރުން ކުޑަ ރަށެއް ބޮޑު ރަށެއް ތަފާތު ކުރުމެއް ނެތި، ތަރައްގީގެ ހުރިހާ މަޝްރޫއުތަކެއް ވަނީ ހުއްޓާލައިފަ، މިރަށުގެ ހުރިހާ މަޝްރޫއުތަކެއް ވަނީ ހުއްޓާލައިފަ

އެމްޑީޕީގެ ރައީސް ޢަބްދުالله ޝާހިދު މ.ރަތްމަންދޫގައި ވިދާޅުވިއެވެ

މީގެ އިތުރުން ޝާހިދު ވިދާޅުވީ ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ގެންދިޔައީ ކުޑަ ރަށެއް އަދި ބޮޑު ރަށެއް ވެސް ބެލުމެއްނެތި ތަރައްގީގެ މަޝްރޫއުތައް ހިންގަމުން ކަމަށެވެ. އެހެންނަމަވެސް އަދުގެ ވެރިކަން އައުމާއެކު ރަށްރަށުގައި ކުރީ ސަރުކާރުން ހިނގަމުންދިޔަ ތަރައްގީގެ މަޝްރޫއުތައް ހުއްޓާލާފައިވާކަމަށް ޝާހިދު ވިދާޅުވި އެވެ. އަދި ރާއްޖޭގެ ރަށްރަށުން ފަށާފައިވާ ތަރައްގީގެ މަސައްކަތްތައް ވީރާނާވަމުންދާ ކަމަށާއި، މި ސަރުކާރުން ރައްޔިތުންގެ އިހުސާސްތަކަށް ދަނީ ފުރަގަސްދެމުން ކަމަށްވެސް ޝާހިދު ވިދާޅުވިއެވެ. އަދި މިސްރާބު ހަމަމަގަށް އަޅުވަން ޖެހެނީ މިސަބަބަށްޓަކައި ކަމަށްވެސް ޝާހިދު ވިދާޅުވިއެވެ.

ޝާހިދު ދެއްކެވި މި ވާހަކަތަކާ ގުޅިގެން ދައުލަތުގެ ވަޒީރުންނާއި އެތައް އިސްވެރިންނެއް ވަނީ ޝާހިދުއަށާއި ކުރީ ސަރުކާރަށް ވަރަށް ބޮޑަށް ފާޑުވިދާޅުވެފައެވެ.

އެގޮތުން، ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓަރު ޑރ. ޢަބްދުالله މުއްޠަލިބު އިއްޔެ އެކްސްގައި ކުރި ޕޯސްޓެއްގައި ބުނެފައިވަނީ މ.ރައްމަންދޫގެ ބަނދަރު ޕްރޮޖެކްޓުގައި ސޮއިކުރީ އިންތިޚާބަށް ޖެހި ކަޑައަކަށް ކަމަށެވެ.

ވެރިކަން ނިމުނުއިރު އީއައިއޭ ހަދާފަވެސް ނެތް. އަބްދުއްރަހީމް ވިދާޅުވާހެން މަނިކުފާނަކީ ދޮގެއްވެސް ތެދައްވުރެ މޮޅަށް ވިދާޅުވާ ބޭފުޅެއް

މުއްޠަލިބު ވިދާޅުވިއެވެ

މީގެ އިިތުރުން ހޯމްލޭްންޑް ސެކިއުރިޓީ އެންޑް ޓެކްނޮލޮޖީގެ މިނިސްޓަރު އަލީ އިހުސާން ވެސް ވަނީ ހޫނު ރައްދެއް ދެއްވާފައެވެ. އިހުސާން އިއްޔެ އެކްސްގައި ކުރި ޕޯސްޓެއްގައި ބުނެފައިވަނީ، ރައްޔިތުން ކުރީ ސަރުކާރަށް "ނޫނެކޭ" ބުނީ މިސްރާބު ހުރިގޮތް ގޯސްވުމުން ކަމަށެވެ.

ޕްރޮޖެކްޓް ހިންގުމުގެ ނަމުގައި 9 ބިލިއަން ރުފިޔާ ރައްޔިތުންނަށް ދަރާފައި އޮތީ ސަރުކާރު ނިމުނުއިރު. 12 މިލިއަަނަށް ނިންމޭ އިމާރާތް ހަދަން ދިނީ 39 މިލިއަނަށް. މިއީ ހަމަމަގު ތޯ؟

އިހުސާން ވިދާޅުވިއެވެ

ޝާހިދު ދެއްކެވި ވާހަކައަށް ރައްދުދެއްވަމުން ސިޓީޒް، ލޯކަލް ގަވަމަންޓް އެންޑް ޕަބްލިކް ވޯކްސްގެ މިނިސްޓަރު އާދަމް ޝަރީފު އުމަރު ވިދާޅުވީ، ރ.އަލިފުށީ އެއާޕޯތް ހެދުން ހުއްޓުނީ ކުރީ ސަރުކާރުގެ ވެރިކަމުގައިކަން ނޭނގުމަކީ ދެރަކަމެއް ކަމަށެވެ. މީގެ އިތުރުން ރ.ހުޅުދުއްފާރު މަގުތަކުގައި ފަސްބަޑީ ޖަހައި މުޅި ރަށް ޚަރާބުކޮށްލީ އެމްޑީޕީން ކަމަށްވެސް އާދަމް ޝަރީފް ވިދާޅުވިއެވެ.

ރައީސް ޑރ. މުޙައްމަދު މުއިއްޒު އެ ގެންދަވަނީ ހުއްޓިފަހުރި ހުރިހާ ޕްރޮޖެކްޓުތައް ފެއްޓޭނެ ގޮތްތައް ހޯއްދަވަމުން. އަޅުގަނޑުމެން މިދަނީ ރަށް ރަށުގެ ހާލަތު ވަރަށް ގާތުން ބަލައި، ޕްރޮޖެކްޓުތައް އަވަސްކުރުމަށް މަސައްކަތް ކުރަމުން. ނަތީޖާ ދައްކާނަން. ޢަބްދުالله

އާދަމް ޝަރީފް ވިދާޅުވިއެވެ

ޝާހިދު ގެ ވާހަކަފުޅާ ގުޅިގެން މިނޫނަސް އެތައް ވަޒީރުންނަކާއި ދައުލަތުގެ ސިޔާސީ އިސްވެރިން ދަނީ ފާޑުވިދާޅުވަމުންނެވެ. މިއީ އިދިކޮޅު ފަރާތަކުން އެކްސްގައި ޙިއްސާކޮށްލި ވާހަކައަކަށް އަދުގެ ސަރުކާރަކުންް މިހާ ގިނަ ވަޒީރުންނާއި އިސްވެރިން ރައްދުދެއްވާ ޓްވީޓުކުރި ފުރަތަމަ ފަހަރެވެ.