ބްރިޖު މަޝްރޫޢު މިހާރު ކުރިއަށްދާގޮތުން ސްޕީޑް އިތުރަށް އަވަސްވާނެ - ޑރ. މުއްޠަލިބު

ބްރިޖު މަޝްރޫޢު މިހާރު ކުރިއަށްދާގޮތުން ސްޕީޑް އިތުރަށްވެސް އަވަސްވާނެ ކަމަށް އިމާރާތްކުރުމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިއަދު އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރް އާއެކު، ތިލަ މާލެ ބްރިޖު މަޝްރޫޢުގެ މަސައްކަތް ބައްލަވާލެއްވުމަށް މަޝްރޫޢުގެ ސައިޓަށް ކުރެއްވި ޒިޔާރާތުގައި ވާހަކަ ދައްކަވަމުންނެވެ. މި ޒިޔާރާތުގައި، ތިލަ މާލެ ބްރިޖު މަޝްރޫޢުގެ މަސައްކަތް ހިނގަމުން ދާ ގޮތާއި ނިމިފައި ހުރި މަރުޙަލާތައް ބެއްލެވުމަށްޓަކައި، ވަޒީރާއި ސަފީރާއެކު، ހައި ކޮމިޝަނުގެ އިސް ބޭފުޅުންނާއި، އިމާރާތްކުރުމާއި ބިނާރާ ބެހޭ ވުޒާރާގެ އިސްވެރީން، އަދި ޓެކްނިކަލް ޓީމެއްވެސް ބައިވެރިވެލެއްވިއެވެ.

"އިރާދަކުރެއްވިއްޔާ މިދާ ސްޕިޑުގަ ދާ ކަމަށް ވަންޏާ އަޅުގަނޑުމެންނަށް ޤަބޫލުކުރެވެނީ އަޅުގަނޑުމެންނަށް މިހާރު މަސައްކަތް އިތުރަށްވެސް ސްޕީޑް އަޕް ކުރެވި މަސައްކަތް އަވަސްކުރުމުގެ ފުރުސަތު ވަރަށް ބޮޑޭ"

ވަޒީރު، ޑރ. އަބްދުﷲ މުއްޠަލިބު ވިދާޅުވިއެވެ.

މީގެ އިތުރުން މި ޒިޔާރާތުގެ ތެރެއިން ދެނެގަނެވުނު އެކިއެކި ކަންކަމާ ގުޅޭގޮތުންނާއި، މަޝްރޫޢޫގެ މަސައްކަތްތައް ކުރިއަށް ދާ ބާރު މިނާ މެދު ހިތްހަމަޖެހިވަޑައިގަންނަވާ ކަމަށާއި، އިންޑިއާ ސަރުކާރާއި އެމްބަސީއާ ގުޅިގެން ރަނގަޅަށް މަސައްކަތް ކުރިއަށް ގެންދެވޭނެކަމަށްވެސް ވަޒީރު ވިދާޅުވިއެވެ.

މިއަދު އިމާރާތްކުރުމާއި ބިނާރާ ބެހޭ ވުޒާރާއިން ހާމަ ކުރެއްވި ގޮތުގައި މިހާތަނަށް ތިލަމާލެ ބްރިޖު މަޝްރޫޢުގެ މަސައްކަތުގެ ތެރެއިން 38.88% މަސައްކަތް ވަނީ ނިމިފައެވެ. މަޝްރޫޢުގެ ދަށުން، ޖެހުމަށް ހަމަޖެހިފައިވާ ތަނބުތަކުގެ ޕައިލިންގެ 66% ނިންމާފައިވާއިރު، އޭގެ ތެރެއިން ޕައިލް ކެޕްގެ 46% މަސައްކަތާއި ޕިއަރ ކޮލަމްސް ގެ 48% މަސައްކަތް ވަނީ ނިމިފައެވެ. އަދި މަޝްރޫޢުގެ ޑެކަށް ބޭނުންވާ ޕްރީކާސްޓް ސެގްމަންޓްސް ގެ 31% ކާސްޓުކޮށް ނިންމާފައިވާއިރު، މިހާތަނަށް ވިލިމާލޭގައި ވިހި ސެގްމަންޓް ވަނީ ލޯންޗުވެސް ކޮށްފައެވެ.