ސައިލަންސަރު އަޑުގަދަކޮށް ދުއްވާ މީހުން ހުއްޓުވާނަން: މިނިސްޓަރ އިޙްސާން
ފޭކް ނަމްބަރު ޕްލެޓްޖަހައިގެން އެހެން މީހުންނަށް އުނދަގޫވާ ގޮތަށް ސައިލަންސަރު މޮޑިފައިކޮށްގެން އަޑުގަދަކޮށް ބާރަށް ދުއްވާ މީހުން ހުއްޓުވާ އެމީހުންނާ މެދު ގާނޫނީ ފިޔަވަޅު އަޅުއްވާނެކަމުގައި ދާޚިލީ ސަލާމަތާ ފަންނިއްޔާތާބެހޭ ވަޒީރު އަލީ އިޙްސާން ވިދާޅުވެއްޖެއެވެ.
މިނިސްޓަރ އިޙްސާން މިހެން ވިދާޅުވީ މާލެ ސަރަޙައްދުގެ މަގުތަކުގެ އަމާންކަން ކަށަވަރުކުރުމަށް ފެށި "މާލެ ފަހި" މަޝްރޫޢު އިފްތިތާޙްކޮށްދެއްވި ޖަލްސާގައި މިރޭ ވާހަކަ ދައްކަވަމުންނެވެ.
މިނިސްޓަރ އިޙްސާން ވިދާޅުވީ ގާނޫނާ ގަވައިދަށް ނޫޅުމުގެ ސަގާފަތެއް ދިވެހިރާއްޖެގައި އެބޮތް ކަމަށާއި، އެސަގާފަތް ބަދަލުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ ވުޒާރާއަށް އަންގަވާފައިވާ ކަމަށެވެ. އެހެންކަމުން ރައީސްގެ ލަފާފުޅާއި އިރުޝާދުގެ ދަށުން މިކަންކަން ތަންފީޒު ކުރައްވާނެ ކަމަށް މިނިސްޓަރ ވިދާޅުވިއެވެ.
"މާލެ ފަހި" މަޝްރޫޢަކީ މާލޭގެ މަގުތަކުގައި ދިމާވާ ތޮއްޖެހުމާއި، ޓްރެފިކް މައްސަލަތައް ޙައްލުކުރުމަށް އަމާޒުކޮށްގެން ފެށި މަޝްރޫޢެކެވެ. މި މަޝްރޫޢުގެ ދަށުން މާލޭގެ މަގުތަކުގައި ދުއްވާ އުޅަނދުތަކުގެ އަދަދު މަދުކޮށް، ޕާކިންގ ނިޒާމު ހަރުދަނާކުރުމަށް ވަނީ ރޭވިފައެވެ.
މި ކަންކަމުގެ އިތުރުން، މިހާރު މާލެ ސަރަހައްދުގައި ދުއްވަމުންދާ، އާރުޓީއެލް ބަސްތަކަކީ މަގުތަކުގައި ދުއްވުމަށް އެކަށޭނެ ކުދި ސައިޒުގެ ބަހަށް ބަދަލުކޮށް އަދި ބަސް ރޫޓުތަކުގެ ފްރީކުއެންސީ އިތުރުކޮށް ޝެޑިއުލްއާ އެއްގޮތަށް ބަހަށް ދަތުރުކުރެވޭނެ ގޮތް މި މަޝްރޫޢުގެ ތެރެއިން ހަމަޖައްސެއްމަށް ވަނީ ކަނޑައެޅިފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
