ދޮންމަންމައަށް ދޭންޖެހޭ ހަލާލުބައި, ހަލާސްކުރެއްވިގޮތް ރައީސްގެ ދުލުން

ރައީސް ޑރ.މުހައްމަދު މުއިއްޒުގެ ދޮން މަންމާފުޅާ ގުޅުވައިގެން ދައްކަމުންދާ ވާހަކަތަކުގެ ހަގީގަތް މިއަދު އެމަނިކުފާނު ވިދާޅުވެދެއްވައިފިއެވެ.

ނިމިގެންދިޔަ ރިޔާސީ އިންތިހާބު ދުވަސްވަރު ރާއްޖޭގެ މީޑިއާއަކުން ވަނީ، ރައީސް ޑރ.މުއިއްޒުގެ ދޮންމަންމާފުޅުގެ ބަސްދީގަތުމެއް ހިމަނައިގެން ރިޕޯޓެއް އާއްމުކޮށްފައެވެ. އެ ރިޕޯޓްގައި ދޮންމަންމާފުޅު ވިދާޅުވެފައިވަނީ މުއިއްޒުގެ ބައްޕާފުޅު އަވަހާރަވުމަށްފަހު، ލިބެންޖެހޭ ހަލާލުބައި ލިބިފައި ނުވާކަމަށެވެ.

މި މައްސަލާގައި ފުރަތަމަ ފަހަރަށް ވާހަކަދައްކަވަމުން ރައީސް ޑރ.މުއިއްޒު ވިދާޅުވީ، ބައްޕާފުޅު އަވަހާރަވުމުން ދޮންމަންމަގެ ޤައުމުގައި ހުރި ގެތަކާއި ވިޔަފާރި ދޮންމަންމައަށް ހިބަކޮށް ދީފައިވާކަމަށެވެ. އެ ހުރިހާ އެއްޗެއް ދީފައިވަނީ، މާލޭގައި ހުރި ޑރ.މުއިއްޒުގެ ބައްޕާފުޅުގެ އިމާރާތް އެމަނިކުފާނަށް ލިބޭގޮތަށް ޝަރުއީ މަރުހަލާގެ ތެރެއިންނެވެ.

އަޅުގަނޑުގެ ބައްޕަ ނިޔާވެގެން ދިޔާމައި، ތަރިކަބެހުމުގެ ކަންތަކުގައި ހަމަ އެ އޮންނަ އުސޫލުން ކޯޓަށްގޮސްގެން ހުރިހާކަމެއް އެއޮތީ ނިމިފައި. ބައްޕަގެ ގޯތިތައް، ބިންތައް ހުރި ލަންކާގައި. ކޮލަމްބޯގައި ދެބިން. ކެންޑީގައި އެއެްބިން. ތިން ބިން. ތިން ގޯތި އިމާރާތް ހަދާފައި. އެތަނުން ދެތަނުގައި ގެސްޓްހައުސް ހަދާފައި. ވިޔަފާރިކުރާގޮތަށް. ހަމަ އާމްދަނީ ހޯދާގޮތަށް. އެއްތަނަކީ ދިރިއުޅެން ހަދާފައިހުރިތަނެއް. އެހެންވީމައި ތިން އިމާރާތް، ތިން ބިން އޮތް. އަޅުގަނޑު ނިންމީ އެ ތިން ގޯތި އިމާރާތާ އެއްކޮށް ވިޔަފާރިއާއެއްކޮށް ދޮންމަންމައަށްދޭން. ހިލޭ އެއްވެސް ބަދަލަކާ ނުލައި.

ޑރ.މުއިއްޒު ވިދާޅުވިއެވެ.

ރައީސް މުއިއްޒު ވިދާޅުވީ، އެމަނިކުފާނުގެ ބައްޕާފުޅުގެ މިލްކިއްޔާތުގައި ހުރި ފައިސާގެ ތެރެއިން ލަންކާގެ އެކައުންޓުގައި ހުރި ހުރިހާ ފައިސާއެއްވެސް ދޮންމަންމައަށް ދީފައިވާކަމަށާއި އެގޮތަށް ކަންކުރުމުން މާލޭގައި ހުފަފެން އަތްބަށް ލިބެންޖެހޭ ބައި އެމަނިކުފާނަށް ދޫކޮށްލާނޭކަމަށް ދޮންމަންމަ ވިދާޅުވެފައިވާކަމަށެވެ.

ތަރިކަ ބެހުމުގެ ކަންކަން ދިޔައީ އެ ހަމަތަކުގެ މަތިން ކަމަށާއި، މި ވީހާތަނަށް މި މައްސަލާގައި އެއްވެސް ވާހަކައެއް ދައްކަން ބޭނުންނުވީ އެއީ، އެމަނިކުފާނުގެ މިޒާޖުގައި ހުންނަ ކަމަކަށް ނުވާތީ ކަމަށެވެ. ނަމަވެސް މިހާބޮޑަށް އެމަނިކުފާނުގެ އަގު ވައްޓާލުމަށް މަސައްކަތް ކުރަމުންދާތީ މިކަން ހާމަކުރީކަމަށްވެސް ރައީސް ޑރ.މުއިއްޒު ވިދާޅުވިއެވެ. ރައީސް ޑރ.މުއިއްޒު ވިދާޅުވީ ދޮންމާފުޅުގެ ވާހަކައާ ގުޅުވައިގެން ހަގީގަތެއްނެތް ވާހަކަތައް ފަތުރަމުންދަނީ ސިޔާސީ ވިސްނުމުގައިކަމަށެވެ.

ރައީސް ޑރ.މުއިއްޒުގެ ދޮންމަންމަ އާ ގުޅޭގޮތުން ދެކެވުނު މިވާހަކަތައް، މީގެކުރިން އެމަނިކުފާނުގެ އާއިލާއިންވެސް ވަނީ ދޮގުކޮށްފައެވެ.