އިޒްމިއާއާއި ދެކޮޅަށް ލިޔުނު ލިޔުންތަކުގެ މައްސަލަ ބަލަނީ
ފުލުހުންގެ ތަރުޖަމާނު ޗީފް އިންސްޕެކްޓަރ އޮފް ޕޮލިސް އިޒްމިއާ ޒާހިރާއި ދެކޮޅަށް ވަގުތު ނޫހުން ލިޔުނު ޚަބަރުތަކާއި ރިޕޯޓްގެ މައްސަލަ ބެލުމަށް މޯލްޑިވްސް މީޑިޔާ ކައުންސިލުން ނިންމައިފިއެވެ.
އެމްއެމްސީން މިއަދު ނެރުނު ނޫސްބަޔާނެއްގައި ބުނެފައިވަނީ ވަގުތު އޮންލައިން އާއި އިޒްމިއާ އާއި ދެމެދު އުފެދުނު ނުތަނަވަސްކަމާ ގުޅިގެން އިޒްމިއާ އާއި ގުޅޭގޮތުން ވަގުތު ނޫހުގައި މިފަހުން ޝާއިރު ކުރި ބައެއް ލިޔުންތަކާ ގުޅިގެން އެ ކައުންސިލަށް ތަފާތު އެކި ގޮތްގޮތުން ޝަކުވާތައް ލިބިފައިވާ ކަމަށެވެ.
އެކަމާ ގުޅިގެން ކައުންސިލް މެންބަރުންގެ އެދުމުގެ މަތިން މިއަދު އެ ކައުންސިލްގެ ކުއްލި ބައްދަލުވުމެއް ބާއްވާފައިވާކަމަށް ބަޔާނުގައި ބުނެފައިވެއެވެ. އަދި އެކަމާއި ގުޅޭގޮތުން ފުޅާދާއިރާއެއްގައި މަޝްވަރާކޮށް އެ މައްސަލަ ބެލުމަށްޓަކާ ފަސް މެމްބަރުންގެ ހާއްސަ ކޮމިޓީއެއް ނަގާފައިވާ ކަމަށް އެމްއެމްސީން މައުލޫމާތުދެއެވެ.
އެ ކޮމިޓީގައި ހިމެނިވަޑައިގަންނަވާ މެމްބަރުން:
– އަހުމަދު އަމީން މުހައްމަދު
– އަޒްމީ އަލީ
– އަލީ އަހުސަން
– އަބްދުއްލަތީފް އަހުމަދު
– ޝިފްޒާ މުސްތަފާ
މި މައްސަލަ ބެލުމަށް އެކުލަވާލި ކޮމިޓީ އަށް ދެ ފަރާތް ވެސް ހާޒިރުކޮށް، މި މަހުގެ 31 ވަނަ ދުވަހުގެ ކުރިން މައްސަލަ ނިންމުމަށްފަހު ކައުންސިލަށް ރިޕޯޓު ހުށަހެޅުމަށް ވަނީ އަންގާފައެވެ.
ވަގުުތު ނޫޙާއި ފުލުހުންގެ ތަރުޖަމާނު އިޒްމިއާ ޒާހިރާާއި މެދު ނުތަނަވަސްކަމެއް އުފެދިގެން ދިޔަ ސަބަބަކީ ދަންޖެހިގެން މަރުވި މީހެއްގެ މައުލޫމާތު ފުލުހުންނާއި މީޑިޔާތަކުގެ ވަޓްސްއެޕް ގްރޫޕްގައި ހިއްސާކުރުމަށް އެކަމަނާ ދެކޮޅު ހެއްދެވުމުންވެސް، އެމަރުގެ ޚަބަރު ޝާއިއުކުރުމަށްފަހު ވަގުތު ނޫހުން ވަޓްސްއެޕް ގްރޫޕްގައި އެ ޚަބަރު ހިއްސާކުރުމުންނެވެ.
މިއާއި އެކު އިޒްމިއާ ވަނީ ވަގުުތުގެ ނޫސްވެރިން އެ ވަޓްސްއެޕް ގްރޫޕުން ބޭރުކޮށްފައެެވެ. އޭގެ ފަހުން ވަގުތު އޮންލައިންގެ ނޫސްވެރިންގެ ފޯން ކޯލްތަކަށް ޖަވާބުދެއްވުމަށްވެސް އެކަމަނާ ދެކޮޅު ހައްދަވާފައިވާ ކަމަށް ވަގުތު ނޫހުން ވަނީ ބުނެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
